Puwedeng maging instructors sa Reserve Officers' Training Course (ROTC) ang mga celebrity reservists para matugunan ang kakulangan sa personnel.
Ito ang inihayag ni Senator Ronald Dela Rosa noong January 29, 2023, sa isang radio interview.
Ayon sa senador, ang presensiya ng mga celebrity reservists ay makakapagbigay-inspirasyon din sa mga estudyanteng kukuha ng panukalang mandatory ROTC.
Binanggit ni Dela Rosa ang aktor na si Matteo Guidicelli, na puwede raw sumailalim sa Instructors Development Course (IDC).
Si Matteo ay may ranggong 2nd Lieutenant bilang Army reservist.
Nagsanay siya noon kasama ng Scout Rangers at ng Presidential Security Group.
Maging ang mga beauty queens na sina Winwyn Marquez at Beatrice Luigi Gomez ay sumailalim sa basic military training.
Matatandaang Top 1 si Wynwyn sa Basic Citizen Military Course na isinagawa noong September to November 2020. Reservist siya sa Philippine Marines.
May ranggong sergeant naman si Beatrice bilang Philippine Navy reservist.
Ayon pa kay Dela Rosa, “Puwedeng i-tap ang mga reservist. Maaari ding bigyan ng allowance yung mga celebrity katulad ni Lt. Guidicelli.
“Sapat na yun. Mag-train pa sila sa IDC.”
Related articles:
- Arci Muñoz starts Philippine Air Force reservist training
- JM de Guzman and Kiko Estrada begin Philippine Air Force reservist training
- Ronnie Liang promoted to 1st lieutenant of Army Reserve
- Rocco Nacino is officially a Philippine Navy reservist
Ang pahayag ni Dela Rosa ay bilang reaksiyon sa pangamba ng Department of National Defense (DND) na wala itong sapat na personnel para sa tinatayang 2,400 schools sa buong bansa.
Kada eskuwelahan ay mangangailangan ng hanggang apat na instructors.
Pinawi rin ng senador ang pangamba ng pang-aabuso sa mga sasailalim sa mandatory ROTC training.
Aniya, may mga sapat na safeguards ang isinumite niyang Senate Bill No. 1349 o ang Reserve Officers Training Corps for Tertiary Education Act of 2022.
Gayundin din daw ang lima pang ROTC measures na inakda naman ng kanyang mga kapwa mambabatas.
Magkakaroon ng committee sa bawat school, na kabibilangan ng mga kinatawan ng DND, school administrations, at ng Commission on Higher Education, na siyang hahawak sa mga reklamo ng pang-aabuso.
Sinabi rin ni Dela Rosa na ang mandatory ROTC training ay hindi nakatuon lang sa paggamit ng mga baril at combat familiarization.
Tuturuan din ang mga estudyante ng tungkol sa pangangalaga ng kalikasan, pagtugon sa mga kalamidad, at kabutihang asal.
Inaprubahan ng House of Representatives noong December 2022 ang panukalang batas para sa two-year mandatory National Citizens Service Training program, at ang optional four-year ROTC program.
Wala pang reaksiyon ang mga celebrity reservists sa pahayag ni Dela Rosa.
Ilan sa mga taga-showbiz na reservists ay sina Christopher de Leon, Vilma Santos, Manny Pacquiao, Dingdong Dantes, Gerald Anderson, Julia Barretto, Geneva Cruz, Ronnie Liang, JM de Guzman, Arci Munoz, Rocco Nacino, Enzo Pineda, Kiko Estrada, at marami pang iba.