GORGY RULA
Masaya si David Licauco sa panibagong parangal na natanggap ng Maria Clara at Ibarra.
Namahagi ng parangal ang Trinity University of Asia ng kanilang Platinum Stallion National Media Award 2023.
Ang Kapuso drama series ang napiling Best Primetime Drama Series.
Si Barbie Forteza ang nagwaging Best Actress, si Dennis Trillo ang Best Actor, si Andrea Torres ang Best Supporting Actress, at si David ang Best Supporting Actor.
Pangalawang award na itong natanggap ni David, kaya nagpapasalamat siya sa nagawa ng Maria Clara at Ibarra sa kanyang showbiz career.
Proud siya sa bagong award na natanggap niya dahil mga estudyante ang pumili nito at para sa kanya, hindi sila naiumpluwensiyahan ng sino man.
“Gaya nga ng mga sinabi nila na kapag galing daw sa isang school, ang award ay wala siyang bias. So, siyempre extra special din siya for me and for everyone na nakatanggap kami ng ganung klaseng award.
“Para siyang… it will serve as an inspiration for me and for them para paghusayan pa ang trabaho namin bilang artista,” pahayag ni David sa mediacon ng Sparkle na ginanap sa Novotel ngayong Huwebes, February 16, 2023.
Tinanong din siya ng PEP Troika tungkol sa matinding katapat ngayon ng Maria Clara at Ibarra. Naging isyu kung natalo na nga ba ng FPJ's Batang Quiapo ang kanilang drama series.
Read: FPJ's Batang Quiapo pilot episode, sobrang lakas online; Maria Clara at Ibarra, extended ng one week
Para kay David, hindi na raw siya naniniwala sa network war. Sa katunayan, may collaboration na nga ang ABS-CBN at GMA-7.
Ang mahalaga ay napapasaya raw ang mga manonood ng mga ganitong magagandang programa.
“Different naman yung market e. Kumbaga, yung Maria Clara, I feel nasa Gen Z side, and pinapanood nila yun because of the history, because of the romantic side.
"Pero yung sa FPJ, pinapanood siguro yun dahil ahhh... ano ba ang story nun? Hindi ko alam. Action siya, e. Of course si Coco Martin yun and malaki na yung napatunayan niya.
“Ako for me, hindi naman ako na-challenge o na-insecure kasi I feel na na-build naman namin yung market namin, kumbaga yung mga viewers namin. So, I mean… at the end of the day, I don’t believe in the network war.
“I mean, as long as we’re making people happy and nakakalimutan ang mga trabaho at problema nila, okay na rin yun. Whether manood sila ng ABS or GMA, okay na yun,” pahayag ni David.
JERRY OLEA
Malaki ang utang na loob ni David sa Maria Clara at Ibarra dahil bukod sa nakakatanggap na siya ng acting awards, dumarami pa ang endorsements niya.
Bukas ay ilulunsad siya bilang brand ambassador ng Bluewater Day Spa. Kaya mapalad daw siyang siya ang napiling gumanap bilang si Fidel sa seryeng ito.
“So, I’m just really happy and grateful na sa akin napunta, and siyempre all credits to the directors… iba kasi ang mga shots e.
“Imagine ang mga shots namin, yung mga romantic scenes. Kung hindi namin trinabaho yun, hindi rin naman siya magti-trending. Hindi rin ako makikilala.
“So, sa mga directors, sa writers pa rin talaga yung credit dapat.”
Congrats kina Dennis, Barbie, Andrea, David, at Maria Clara at Ibarra!
NOEL FERRER
Congrats kay David sa awards niya.
Pero napansin ko lang na ang dami-dami nang namimigay ng awards na kung minsan hindi nga naiimpluwensyahan pero koneksiyon at iyung iba ay fan mentality o pakikisama ang umiiral.
Wish ko lang kilalanin at respetuhin si David Licauco bilang tunay na aktor, at hindi isang star o starlet lang na dadaan sa showbiz.