JERRY OLEA
Nanguna ang Partners in Crime sa Top 10 Movies in the Philippines Today ng Netflix, at pumangalawa ang Labyu With An Accent.
Parehong kalahok sa Metro Manila Film Festival (MMFF) 2022 ang Partners in Crime nina Vice Ganda at Ivana Alawi, at Labyu With An Accent nina Coco Martin at Jodi Sta. Maria.
Sabay silang nag-umpisang mag-streaming sa Netflix nitong Marso 25, 2023, Sabado.
At least, parehong gawang Pinoy ang dalawang pinakapinapanood na pelikula ngayon sa Netflix. Wala nang ibang pelikulang Pilipino sa talaan.
Nasa Top 10 Movies in the Philippines Today ang tatlong naunang John Wick films ni Keanu Reeves, habang rumaratsada sa takilya iyong pang-apat. Pangatlo sa talaan ang John Wick: Chapter 3 — Parabellum (USA).
Pang-apat ang Furies (Vietnamese). Panlima ang animated film na The Magician’s Elephant. Pang-anim ang John Wick (USA).
Pampito ang High & Low The Worst Cross (Japanese). Pangwalo ang John Wick Chapter 2 (USA). Pansiyam ang martial arts movie na The Legend of Wukong (Chinese). Pansampu ang crime thriller na Luther: The Fallen Sun (British).
Dominated pa rin ng K-dramas ang Top 10 TV Shows in the Philippines Today. Out of ten, pito ay mula sa South Korea.
Pero ang nangunguna ay ang American action thriller na The Night Agent, kung saan bida si Gabriel Basso.
Ang pangalawa hanggang panlima ay K-drama… The Glory, True Beauty, Unlock My Boss, at Mr. Queen.
Pang-anim ang American fantasy series na Shadow and Bone. Pampito ang K-drama na Crash Course in Romance. Pangwalo ang Japanese anime na My Hero Academia.
Ang kumumpleto sa Top 10 TV Shows ay ang mga K-drama na Melancholia at Crash Landing On You.
Ten days nang wala kahit isang Pinoy teleserye sa Top 10.
Streaming na sa Marso 31, Biyernes, sa Netflix ang pelikulang Nocebo, kung saan kasama sa cast si Chai Fonacier.
Sa Abril 7, Biyernes Santo, naman ang streaming ng fantasy-adventure film na Chupa, starring Demian Bichir and Christian Slater. Pampamilya ang Chupa.
Read: Pornhub docu at family movie na "Chupa," kabilang sa latest offerings ng Netflix
Sa Abril 14 naman ang streaming doon ng Kapuso historical fantasy series na Maria Clara at Ibarra, kung saan bida sina Babie Forteza, Dennis Trillo, Julie Anne San Jose, at David Licauco.
Abangan natin kung raratsada sa Netflix ang Nocebo, Chupa, at Maria Clara at Ibarra.
NOEL FERRER
Streaming seems to be the most accessible way to consume content now. Habang nagka-bout ako with vertigo, Netflix, Prime, at HBO ang pinagpistahan ko.
Para sa mga Pinoy content, hanga ako sa mga nagtiwala sa Prime kasi medyo strictly curated sila. Ang galing.
Sa Netflix, mas popular ang choices nila ng panoorin.
Sa HBO, mas haling ako doon sa mga documentaries.
At sa Viu naman, skewing over Korean-like content.
Pero salamat sa kanilang lahat. Admittedly, they provide an affordable. and enjoyable alternative sa panonood natin ng sine na naiba na.
Pero sana sa 1st Summer Metro Manila Film Fest (Abril 8-18, 2023), magbalik-sinehan pa rin ang mga tao. Please!!!
GORGY RULA
Three months lang, palabas na sa streaming platforms ang apat sa walong pelikula ng Metro Manila Film Festival.
Nauna na iyong Deleter sa Prime Video, at Nanahimik Ang Gabi sa iWantTFC, and then sa Netflix itong Partners in Crime at Labyu With An Accent.
Ewan ko kung makakatulong ito sa mga pelikula natin, lalo na sa mga sinehan.
Malamang ang ilang entries ng 1st Summer Metro Manila Film Festival ay may negotiation na sa Netflix at sa ibang streaming app. Sana, hindi ito makaapekto sa kung ano ang magiging boxoffice result ng Summer MMFF.
Ang ilang producers ay gumagawa na ngayon ng pelikula na pang-streaming platform na lang.
Naglalaban na ngayon ang mga streaming platforms kung alin ang mas may magandang offer sa mga pelikulang ginagawa. Hindi na mahalaga kung mabibigyan ng booking sa mga sinehan. Puwede na silang makabawi sa streaming at sa ibang platforms.
Paano na ngayon ang mga sinehan?
Ang John Wick: Chapter 4 na nag-open nitong March 24-26 sa North America, nanguna siyempre, at tinatayang $73.5M ang opening weekend gross.
Nauna nga itong ipalabas sa Pilipinas noon pang Marso 22, Miyerkules, kasabay ang D’ Aswang Slayerz at Baby Boy, Baby Girl.
Worldwide, naka-$137.5M na ang John Wick: Chapter 4. So far ay pang-apat na ito sa pinakamalalakas na movies na ni-release globally this year.
Ang top 3 so far ay Ant-Man and The Wasp: Quantumania ($467M), Creed III ($246M), at Scream VI ($139M).
Sa Marso 29, Miyerkules, ay palabas na sa local cinemas ang Dungeons & Dragons: Honor Among Thieves, The Unseen, Ditto, at Working Boys 2: Choose Your Papa.
Abril 8, Black Saturday, naman ang umpisa ng 1st Summer MMFF, na tatagal hanggang Abril 18.
Sa Abril 19 nakatakdang ipalabas sa local cinemas ang The Super Mario Bros The Movie, AIR, at Voltes V: Legacy.
Puwede nang makabili ng tiket para sa Voltes V: Legacy sa SM cinemas. Noong Marso 25, Sabado pa nag-start ang advance ticket selling nito.
