JERRY OLEA
Eleven consecutive days na nanguna ang A Very Good Girl sa listahan ng Top 10 Movies in the Philippines Today sa streaming platform na Netflix.
Read: A Very Good Girl nina Kathryn Bernardo at Dolly de Leon No. 1 na sa Netflix
Mula Disyembre 29, 2023, hanggang Enero 8, 2023, Lunes, ay nasa top spot ang irreverent movie na tinampukan nina Kathryn Bernardo at Dolly de Leon.
Ngayong Enero 9, Martes, ay bumaba na ito sa pangatlong puwesto.
May dalawa pang pelikulang Pilipino sa Top 10 list na iyan, ang Monday First Screening nina Gina Alajar at Ricky Davao, at ang Kidnap for Romance nina Cristine Reyes at Empoy Marquez.
Ang most watched film sa Netflix PH ngayong Enero 9, Martes, ay ang survival thriller film na Society of the Snow.
Ang Spanish film na ito ay tungkol sa 1972 airplane crash sa Andes, kung saan labing-anim ang survivors.
Ang Top 10 Movies in the Philippines Today sa Netflix — Society of the Snow, Exodus: Gods and Kings, A Very Good Girl, Redeeming Love, Monday First Screening, The Taking of Pelham 123, The Abandoned, Rebel Moon Part One: A Child of Fire, Kidnap for Romance, at Sing 2.
Ang Top 10 TV Shows in the Philippines Today sa Netflix — Gyeongseong Creature, My Demon, Fool Me Once, The Brothers Sun, Berlin, Welcome to Samdal-ri, Bitch and Rich, Can’t Buy Me Love, Yu Yu Hakusho, at Single’s Inferno.
Sa talaan ng most watched TV shows sa Netflix PH, nanguna ang Yu yu Hakusho mula Disyembre 17 hanggang 24, ang Gyeongseong Creature mula Disyembre 25 hanngang 31, at ang Berlin mula Enero 1 hanggang 6.
Bumalik sa top spot ang Gyeongseong Creature kahapon Enero 8, Lunes.
GORGY RULA
Isa sa tinututukan ko sa mga TV show ay ang Can’t Buy Me Love, na hindi nalalaglag sa top ten trending.
Nakakainis na ang ilang episodes na halatang pinapahaba na lang, at hindi pa rin humantong sa nagkakagustuhan na sina Bingo (Donny Pangilinan) at Caroline (Belle Mariano).
Ang ikinatutuwa ko lang talaga sa seryeng ito ay ang magaling na pagganap nina Maris Racal, Anthony Jennings, at siyempre si Donny Pangilinan.
Nitong mga huling episode ay may pa-sexy pa si Joao Constancia na nagsa-shower, at may pa-topless. Pero wala lang abs, kaya kailangan niyang magpa-fit pa ng katawan.
Naloka pa nga si Ruffa Gutierrez nang sinabi ko sa kanyang parang dyowa pa niya tingnan si Joao kesa sa anak. Parang naalangan pa akong panoorin siyang nanay siya ng singer-actor.
“Hahaha! My gosh! Tapos Joao pa ang name niya, parang dyowa!” natatawang bulalas ni Ruffa.
Nakakaaliw rin ang iba pang support na kitang-kita mong close silang lahat at kampante na sila sa isa’t isa.
Binanggit ko nga ito nung nakatsikahan namin minsan si Vivoree Esclito, talagang nag-e-enjoy raw sila sa taping ng Can't Buy Me Love.
Aniya, “Nakaka-touch yung sinabi ng iba na walang tapon sa cast. Siyempre kabilang ako sa cast… yung kuwento kasi, ang dami kasing twists sa Can’t Buy Me Love. So, wala ding tapon sa lahat na episodes, sa mga eksena.”
Sabi ko pa kay Vivoree, nakakatuwa silang tingnan na parang magkakapitbahay talaga sila nina Alora Sasam, Anthony, pati sina Nova Villa at marami pa.
“Lahat po na mga co-actors, very welcoming, very genuine. Humble silang lahat. So, it’s not hard to work with them,” sabi pa ni Vivoree.
NOEL FERRER
Ewan ko ba, pagkatapos nitong MMFF, sana nagbago na kahit papaano ang viewing habit ng mga Pinoy.
Sa akin, susubukan kong panoorin muna ang pelikula kung saan ko nakasanayang panoorin ito — a shared experience at the theaters.
Tapos, uulitin ko na lang sa Netflix kung sadyang kaulit-ulit. Iyan ang magiging personal kong panuntunan sa local films.
Ibang usapin naman sa foreign films. Hehehe!