JERRY OLEA
Excited si Direk Joel Lamangan sa isang bagong pelikulang tatampukan ng mga baguhan at mapangahas na artista.
“Parang sagot ko iyon sa In The Realm Of The Senses,” nakangiting sambit ng multi-awarded director sa thanksgiving party ni Madam Baby Go noong Pebrero 4, 2024, Linggo ng gabi, sa Valle Verde Country Club, Pasig City. Ano?!
Hindi ba’t ayaw na niyang gumawa ng erotic films?! Ayaw na nga niyang mag-Vivamax, ah?!
Read: Director Joel Lamangan against MTRCB: "Dapat walang ganyan na!"
“Pero iba, maano…”
Period film ba ito gaya ng 1976 erotic art film ni Nagisa Oshima na In The Realm of the Senses, na fictionalized treatment ng isang murder case noong 1936?
A scene from In The Realm of the Senses
"Contemporary! Hindi naman ako period, masyado akong manggagaya? Ikaw naman, gusto mo, gayahin ko?!” tili ni Direk Joel.
“Hindi naman ako yung gumagaya-gaya na direktor. Iba! Hindi ako!”
Sinu-sino ang mga artista niya, if ever?
“Hindi pa, hindi pa muna ibo-broadcast. Basta, mga bago sila.”
Sa Marso ay nakatakda nang ipalabas sa mga sinehan ang pelikula niyang Apo Hapon, kung saan bida sina JC de Vera at Sakura Akiyoshi.
Kasama rin sa cast niyon sina Lianne Valentin, Perla Bautista, Fumiya Sankai, Jim Pebanco, Rico Barrera, Nella Dizon, Marcus Madrigal, at Prince Clemente.
Read: Japanese actress Sakura Akiyoshi, "sobrang takot" kay Direk Joel Lamangan
Para sa BG Productions ni Madam Baby Go, naka-lineup na gawin niya ang isang horror family drama.
Baby Go and Joel Lamangan
“Gusto niya sa cast ng family drama sina Carmina Villarroel, Richard Yap, at Jillian Ward. Fan kasi siya ng Abot-Kamay Na Pangarap. Sinusubaybayan niya yon,” sey ni Direk Joel.
May movie project din siyang gagawin para sa BenTria Productions, na hopefully ay pagbibidahan ng isang kontrobersiyal na aktres.
Naatasan na rin si Direk Joel na idirek ang pelikulang isinulat ng National Artist na si Ricky Lee.
May gagawin ba siyang pelikula para sa 50th Metro Manila Film Festival (MMFF)?
“Iniisip ko pa kung Viva o Regal,” sey ni Direk Joel.
Sa kasaysayan ng MMFF ay tatlo silang direktor na nakatatlong best director award sa December filmfest — siya, si Direk Jose Javier Reyes, at ang namayapang National Artist na si Marilou Diaz-Abaya.
Tigdadalawa naman ng best director trophy sa MMFF sina Erik Matti, Mark Meily, Chito Roño, Laurice Guillen, Eddie Garcia, Mario O’Hara, Brillante Mendoza, at National Artist Lino Brocka.
NOEL FERRER
Nasa FPJ’s Batang Quiapo pa rin si Direk Joel bilang plastikadang si Roda. Kaya lang, recently ay tinatalo na ng Black Rider sa ratings ang teleserye ni Coco Martin.
Read: Direk Joel Lamangan, agaw-eksena bilang mahaderang Roda sa FPJ's Batang Quiapo
“Wala akong pakialam basta ako, binabayaran nang malaki!” bulalas ni Direk Joel.
“Hindi ako tinipid! At ako, kaliwaan. After taping, give! At may cut off ako sa taping, ha? Alam nila na hindi ako puwedeng magpuyat-puyat. Hindi.
“Sinasabi ko, ‘Hoy! Makinig kayo, aalis na ako. Mag-aalas-diyes na. Alam nila yon.”
Nakaisang taon na si Direk Joel bilang Roda sa FPJ’s Batang Quiapo, at hahaba pa raw ang exposure niya roon.
GORGY RULA
Pero iba na ang panahon ngayon.
Sabi nga ni DirekJoel Lamangan, kailangan pa ring bigyang halaga ang kalusugan.
Nababahala siya sa mga pumanaw, at ikinagulat nga niya nang husto ang pagpanaw ng ABSCBN executive na si Deo Endrinal.
Read: ABS-CBN executive Deo Endrinal dies
“Iniisip ko talaga, lahat ng mga nadi-dead, kilala ko,” bulalas ni Direk Joel.
“Kaya dapat mag-ingat ingat na tayong lahat. Hindi ko na ginagawa ang mga dati kong ginagawa.”
Gusto pa rin ng premyadong direktor na magtrabaho. Wala pa sa plano niya ang magpahinga o pabaka-bakasyon na lang.
“E, di lalo akong mamatay!” kaagad niyang sagot nang sinabi ni Jerry na puwede naman siyang tumigil sa pagtanggap ng trabaho.
“Sabi nga ng doktor, ‘Do what you would like to do, but in moderation.’”
Siyangapala, maraming nakalinyang pelikula ang BG Productions this year.
Malamang na sa Australia i-shoot ang BG movie project nina Bela Padilla at Allen Dizon, sa direksiyon ni Adolf Alix Jr.
Sa Zamboanga naman isusyut iyong Pokwang movie directed by Louie Ignacio.
Ikinakasa naman ni Direk Neal “Buboy” Tan ang comedy flick featuring veteran singers Pilita Corales, Imelda Papin, Eva Eugenio, and Dulce.
Iniiikot na sa mga international filmfest ang BG movie na AbeNida starring Allen Dizon and Katrina Halili, na syinuting ni Direk Louie Ignacio sa Paete, Laguna.