JERRY OLEA
Go for gold ang superhero film nina Ryan Reynolds at Hugh Jackman na Deadpool & Wolverine.
Three consecutive weekends nang kampeon ito sa takilya ng North America.
Ayon sa Box Office Mojo, noong nakaraang weekend, Agosto 9-11, 2024 ay humamig ito ng $53.8M sa USA at Canada.
Ang domestic gross ng D&W ay pumalo na sa $494M. At ang worldwide gross nito ay mahigit 1B na!!!
Marvelous & marvelous!
Ang pumangalawa sa takilya ng North America last weekend ay ang bagong bukas na It Ends With Us, with $50M.
Bidang babae rito si Blake Lively, ang wife ni Ryan Reynolds. Take note na nag-cameo si Blake sa D&W bilang Ladypool.
Ang production budget ng It Ends With Us ay $25M lamang. Ang global gross nito ay umabot na sa $86M. Certified hit!
Certified flop naman ang Borderlands na nag-open sa ikaapat na puwesto with $8.6M.
On its second weekend ay nasa pangwalong puwesto ang Harold and the Purple Crayon, with $3M. Ang domestic gross nito ay $12.8M pa lang. Semplanganguk!
MOVIES IN LOCAL CINEMAS iN GHOST MONTH
Agosto 4, Linggo, nag-umpisa ang Ghost Month 2024, at magtatapos ito sa Setyembre 2, Lunes.
Sa Agosto 18, Linggo, ang Ghost Festival.
Noong Agosto 7, Miyerkules, ay nag-open sa local cinemas ang Unang Tikim nina Angeli Khang at Robb Guinto, pati When The World Met Miss Probinsyana nina Rhian Ramos at Sid Lucero.
Tatlong banyagang pelikula ang kasabay ng mga ito — It Ends With Us, Borderlands, at Project Silence.
Ngayong Agosto 14, Miyerkules, ang opening day sa local cinemas ng reunion movie nina Joshua Garcia at Julia Barretto, ang Un/Happy For You.
Happy ang JoshLia fans na ipamalitang maganda ang pre-selling ng tickets sa ilang sinehan nito.
Tatlong foreign movies ang kasabay ng Un/Happy For You today — Alien: Romulus, Oddity, at ang exclusive sa SM Cinemas na The Roundup: Punishment.
Take note na ngayong Wednesday afternoon ang engrandeng welcome parade kay Carlos Yulo at iba pang Olympians.
Parang maigting na drama sa pelikula o teleserye ang mga kaganapan sa pag-uwi ni Carlos kasama ang pinakamamahal na kasintahan.
Read: Lolo ni Carlos Yulo, bakit di nakasama sa airport salubong?
CLASSIC FILMS AT THE MET
Sa Agosto 18, Linggo, ay dalawang hiyas ng sineng Pilipino ang mapapanood nang libre sa Metropolitan Theater ng Maynila.
May online registration ito. 10:00 A.M. ang free screening ng Minsa’y Isang Gamu-gamu (1976), kung saan sinabi ng National Artist na si Nora Aunor ang linyang, “My brother is not a pig!”
2:00 P.M. naman ang free screening ng Goyo: Ang Batang Heneral ni Paulo Avelino. May talkback session after the screening.
Sa susunod na Miyerkules, Agosto 21 nakatakdang mag-showing sa local cinemas ang 113-minute documentary ni Ramona Diaz na And So It Begins.
Nag-premiere ito sa Cinemalaya XX filmfest noong Agosto 9, Biyernes ng gabi, sa Ayala Malls Manila Bay. Dumalo roon ang dating VP ng bansa na si Leni Robredo.
Sa schedule ng 20th Cinemalaya, nakalista na ang cast members ng And So It Begins ay sina “Rodrigo Duterte, Leni Robredo, Ferdinand Marcos Jr., Maria Ressa, Lea Navarro, Manolo Quezon.”
May bali-balitang hinaharang ang showing ng documentary na ito, kung paanong kinansela ang dalawang Cinemalaya screening ng documentary na Lost Sabungeros dahil sa “security reasons.”
Read: Docu film Lost Sabungeros, kanselado ang screening sa Cinemalaya
Ayon sa Click The City website, nakatakda ring ipalabas sa Agosto 21 ang Whispers in the Wind nina Carlo Aquino at Barbie Imperial, Blink Twice, at Seventeen Tour ‘Follow’ Again To Cinemas.
Nasa August 28 playdate naman ang Pagtatag! The Documentary tampok ang SB19, Real Life Fiction nina Piolo Pascual at Jasmine Curtis-Smith, Look Back, at A Legend.
Maaaring magkaroon ng changes sa playdates ng movies sa local cinemas.
Para sa updates, bisitahin ang Facebook pages ng Cinema Exhibitors Association of the Philippines (CEAP), SM Cinema, Robinsons Movieworld, at Ayala Malls Cinemas, maging ang website ng Click The City.
NOEL FERRER
At this writing, pipito pa lang kami na nakabili ng ticket para sa first showing ng Un/Happy For You nina Julia Baretto at Joshua Garcia sa Trinoma.
Nakakalungkot dahil buong akala ko, ito na ang pelikulang lokal na may chance magpabalik ng mga Pinoy fans sa sinehan… na hindi MMFF.
Sana, dumami pa ang manood mamaya at sa mga susunod na araw. Nabahala tuloy ako.
Sana, yung mga mambabatas natin (lalo na yung mga galing sa ating industriya), sana hindi lang itong sexual harassment case ang pagbuhusan nila ng pansin at panahon, kundi itong nakakabahalang sitwasyon ng pelikulang Pilipino.
Hayyyy, nakakalungkot talaga!
GORGY RULA
Curious ako kung ano ang kalalabasan nitong Un/Happy For You kahit parang mas naka-focus ang promo nila sa social media.
Kung maganda ang pelikula, puwedeng may word of mouth.
Mas inaabangan pa kasi ng mga tao ngayon ang Heroes Hero's Welcome for Paris 2024 Philippine Olympians.
Mag-uumpisa ang parada ngayong Miyerkules ng 3:00 P.M. sa Aliw Theater, Vicente Sotto St., CCP Complex. Babagtas ang parada sa Roxas Boulevard, Padre Burgos St., Finance Road, Taft Avenue, P. Quirino Avenue, Adriatico Street, at magtatapos sa Rizal Memorial Coliseum.
Paanyaya ng Facebook page na Manila Public Information Office, “As the country welcomes the return of our champions in the field of sports, everyone is invited to take part of this momentous event as we celebrate Pinoy Pride!
“Spectators may stay along the parade route to welcome our athletes as they raise the flag of our country. Motorists, however, are highly advised to take alternate route before and during the parade to avoid traffic.”
Sabi ng taga-MMDA, tinatayang 10 hanggang 15 thousand katao ang mag-aabang sa parada. Kaya baka makaapekto ito sa mga pelikulang magso-showing ngayon.
Noong nakaraang linggo ay mahina pa rin ang mga pelikulang nag-showing lalo na ang Unang Tikim na ang sabi nga nila, ayaw nilang makitikim.
Pero baka maganda ang pagtanggap sa Un/Happy For You, na showing sa mahigit 200 theaters nationwide, kahit medyo bitin pa ang promo.