JERRY OLEA
Nanguna sa takilya ng North America last weekend, August 16-18, 2024, ang bagong bukas na Alien: Romulus.
Ang sci-fi horror film na ito ay ikapitong installment sa Alien franchise.
Ayon sa Box Office Mojo, ang opening weekend gross nito ay $42.0M.
On its fourth weekend ay bumaba sa second place ang Deadpool & Wolverine, na marvelous pa rin ang hinamig na $30M.
Read: Deadpool & Wolverine, naka-$1B na; JoshLia movie, showing na
Ang semplanganguk na Borderlands, on its second weekend sa U.S. at Canada ay naka-$2.4M.
At ang isa pang certified flop na Harold and the Purple Crayon, on its third weekend ay naka-$1.1M. Tsk! Tsk! Tsk!
Sa lupang hinirang ay hindi ang Alien: Romulus ang humataw to the max.
UN/HAPPY FOR YOU STILL GOING STRONG
Kasabay nitong nag-open sa local cinemas noong Agosto 14, Miyerkules, ang reunion movie nina Joshua Garcia at Julia Barretto na Un/Happy For You.
Ispageting pataas nang pataas ang kita ng JoshLia movie, at parami nang parami ang mga sinehan nito. Ang lakas-lakas nito noong Sabado at Linggo!!!
Read: Joshua Garcia at Julia Barretto movie, kumita ng P40M in two days
Haping-happy siyempre ang theater owners, ang producers ng movie, ang mga artista at crew ng JoshLia movie, at ang stakeholders ng local movie industry.
“There is cause for celebration today,” sabi ni Direk Jose Javier Reyes sa pa-mediacon ng Film Development Council of the Philippines [FDCP] noong Agosto 16, Biyernes, sa Kandle Cafe, Mother Ignacia Avenue, Quezon City.
“Ang laki-laki-laki-laki ng kinita, OK, ng Joshua-Julia Barretto movie. Palakpakan natin ito because this is such a major event.
“After Cinemalaya, nangyari ito. Teka, baka may hope na, na bumalik na ang tao na manood ng pelikula, at mabigyang-buhay muli ang pelikula…
“It’s all about content, OK. ‘Build and they shall come.’ OK, you do the right movies and they will watch.
“But if you do more of the same, OK… di ba?” pag-ismid nang slight ng multi-awarded scriptwriter-director.
Read: Joey Reyes on Un/happy For You success: "It gives us hope."
As of August 19, Monday, naka-P170M na ang Un/Happy For You sa first six days nito sa local cinemas, according sa source ng PEP Troika.
Simula Agosto 22, Huwebes, ay raratsada na ang international screenings ng JoshLia movie umpisa sa Australia at New Zealand, na susundan sa Agosto 23, Biyernes, ng pagpapalabas sa USA, Canada, Guam, at Saipan.
Coming soon ang Un/Happy For You sa Middle East (UAE, Oman, Qatar, Bahrain, Saudi Arabia), Italy (Rome, Milan), Cambodia, at Malta.
Sa Agosto 31, Sabado, ay may thanksgiving tour sina Joshua at Julia sa KCC Gensan Convention Center at KCC Koronadal, kasama sina Aljon Mendoza at Bianca de Vera.
NEW MOVIES IN CINEMAS
Ayon sa Facebook page ng Cinema Exhibitors Association of the Philippines (CEAP), siyam na pelikula ang opening sa local cinemas ngayong Agosto 21, Miyerkules.
Pito sa mga ito ay bago, at dalawa ay luma. Sa pitong bagong pelikula, dalawa ay gawang-Pinoy.
Ang dalawang pelikulang Pilipino na opening today ay ang Whispers in the Wind na pinagtambalan muli nina Carlo Aquino at Barbie Imperial, at ang documentary ni Ramona S. Diaz na And So It Begins.
Ang limang bagong foreign films na opening today sa ating mga sinehan ay Blink Twice, The Crow, Harold and the Purple Crayon, Seventeen Tour ‘Follow’ Again To Cinemas, at ang exclusive sa SM Cinemas na Case Closed: The Million-Dollar Pentagram.
Kaugnay sa Ghost Month ay may pa-Thrill Fest ang Ayala Malls Cinemas.
Handog nito for August 21-27 ang Gremlins (1984) at Interview with the Vampire (1994).
For August 28-September 3, hatid naman ng Ayala Malls Cinemas ang A Nightmare on Elm Street (1984) at The Towering Inferno (1974).
Ang SM Cinema ay merong AuGhost Exclusives sa Agosto 28-Setyembre 3.
Sa halagang PHP150 bawa’t isa, apat na banyagang pelikula ang magdudulot ng hilakbot — Haunted Universities 3, Mystery Writers, The Cursed Land, at Z-Mom.
Nasa August 28 playdate din ang inaabangan ng mga A’Tin na Pagtatag! The Documentary, ang Cinemalaya 2024 entry na Love Child nina RK Bagatsing at Jane Oineza, pati na ang Real Life Fiction kung saan nakaka-nosebleed ang umaatikabong Inglesan nina Piolo Pascual at Jasmine-Curtis Smith.
Ayon sa website ng Click The City, makikipagrambulan din sa mga ito ang A Legend ni Jackie Chan, Look Back, at Voice of the Shadows.
Nakapuwesto naman sa September 4 playdate ang Beetlejuice Beetlejuice, at ang 40 nina Cindy Miranda at Kiko Estrada.
Maaaring magkaroon ng pagbabago ang playdates ng upcoming movies.
Para sa updates, bisitahin ang Facebook pages ng CEAP, SM Cinema, Robinsons Movieworld, at Ayala Malls Cinemas, maging ang website ng Click The City.
GORGY RULA
Naka-text ko noong nakaraang linggo ang producer ng Mavx Productions na si Mr. Erwin Blanco. Kinumpirma niyang August 21 na ang showing ng pelikula nilang Whispers in the Wind.
Tinanong namin, bakit hindi man lang ito na-promote nang mabuti. Walang presscon at hindi na itinuloy ang premiere night.
Meron na sanang naka-schedule na premiere night at sabay presscon, pero nang nanalasa sa Metro Manila ang bagyong Carina noong Hulyo 24, nabago ang plano.
Ang nakalaan nilang budget sa premiere night at presscon ay ginamit na nila sa mga food packs at school supplies na ipinamigay nila sa ilang bahagi ng Metro Manila na nabahaan.
Pagkatapos ng bagyong Carina ay tumuloy ang buong team ng Mavx sa Barangay Kaligayahan, Fairview, Quezon City, para ipamahagi ang food packs at school supplies sa mahigit isang libong tagaroon.
Hango sa nangyaring lindol at tsunami sa Japan ang kuwento ng Whispers In The Wind, kaya naisip ng mga taga-Mavx na ibahagi nila sa mga nasalanta ng bagyong Carina ang inilaan nilang budget para sa promo nito.
Nagsipag na lang sila sa pagpo-promote sa social media, at nasa out-of-town shoot si Carlo Aquino.
Maaring iniiwas na lang si Barbie sa pagkaka-link nito kay Richard Gutierrez kaya hindi na sila nagpa-presscon.
Marami pa silang natulungan at nabiyaan ng mga inihanda nilang relief goods.
Nag-advance na rin sila sa pagbebenta ng tickets sa SM cinemas sa halagang 275 pesos lamang sa Metro Manila, at 230 pesos sa mga probinsya.
Rated G pa ito ng MTRCB kaya para talaga sa pamilya.
Sana, kahit mangalahati man lang ito sa box-office success ng Un/Happy For You, maganda na ito para sa napakagandang pelikulang ito ng Mavx Productions.
NOEL FERRER
Aside from the box office hit Un/Happy For You na umaariba pa ngayon at sana, marami pa ang audience this coming long weekend, isang magandang local film tungkol sa isang young couple dealing with autism ang tema ng pelikulang Love Child.
Simpleng maganda at nakakaiyak ito, at ang gagaling ng mga artista sa pangunguna nina Jane Oineza at RK Bagatsing.
Sana, tangkilikin ito ng marami nating kababayan, pati na ang Real Life Fiction.
Marami pang Filipino films ang mapapanood sa Setyembre, lalo na’t ipagdiriwang ng FDCP ang 4th Philippine Film Industry Month (PFIM), at merong 6th Sinag Maynila sa Setyembre 4-10 sa select cinemas.
SINAG MAYNILA 2024
Dalawampu’t apat na pelikula sa tatlong section ang magko-compete sa Sinag Maynila 2024.
Maliban riyan ay may sampung world premiere, isang international premiere, isang Asian premiere, at isang Philippine premiere.
Sampung short films ang maglalaban-laban, samantalang tigpito sa sections ng documentary at full-length features.
Ang pitong full-length feature films na finalists ng Sinag Maynila 2024 ay ang mga sumusunod:
Social drama The Gospel of the Beast by Sheron Dayoc starring Janssen Magpusao and Ronnie Lazaro;
Family drama Her Locket by J.E. Tiglao starring Elora Espano;
Action picture Banjo written, directed and starring Bryan Wong;
OFW-themed romance shot in Canada by Benedict Mique entitled Maple Leaf Dreams starring Kira Balinger and LA Santos;
Psychological thriller What You Did by Joan Lopez Flores starring Tony Labrusca, Mary Joy Apostol, Epy Quizon, Mercedes Cabral and Ana Abad Santos;
Drama Salome by Gutierrez Mangansakan II starring Perry Dizon, Tommy Alejandrino, and Dolly de Leon;
Thriller Talahib (Legend of the Tall Grass) by Alvin Yapan starring Joem Bascon, Gillian Vicencio, and Kristoff Garcia.
Ang tema ng 4th PFIM ay “Tuloy Ang Tradisyon ng Pelikulang Pilipino,” kung saan pagpupugayan ang labing-isang National Artists for Film na sina Eddie Romero, Lamberto Avellana, Fernando Poe Jr., Nora Aunor, Manuel Conde, Marilou Diaz-Abaya, Ricky Lee, Lino Brocka, Ishmael Bernal, Gerry de Leon, at Kidlat Tahimik.
Ang opening ceremony ay sa Setyembre 1, Linggo, 3:00-8:00 P.M. sa Metropolitan Theater ng Maynila.
May special screening ang pelikulang Aguila (1980) na pinagbidahan ni FPJ, sa direksyon ni Eddie Romero.
Sa Setyembre 4-27 ay tampok ang Pamanang Pelikula: Honoring The Masterpieces of National Film Legends sa FDCP Cinematheque Centres sa Manila, Iloilo, Negros, Davao, at Nabunturan.
Maliban sa Aguila, naka-line up diyan (in alphabetical order) ang Anak Dalita, Ang Panday, Bulaklak ng City Jail, Genghis Khan, Karnal, Manila by Night also known as City After Dark, Maynila sa mga Kuko ng Liwanag, Moises Padilla Story, at Perfumed Nightmares.
Sa Setyembre 14, Sabado, ilulunsad ang Films for Peace sa Intramuros Centro de Turismo sa Maynila.
May screening ng pelikulang Tatlong Taong Walang Diyos (1976) na pinagbidahan ni Nora Aunor.
Sa Setyembre 15-21 ang screenings ng Films for Peace sa Cinematheque Centres nationwide.
Maliban sa Tatlong Taong Walang Diyos ay dalawa pang movie ang naka-line up diyan, ang Bagong Buwan (2001) at Women of the Weeping River (2016).
Sa Setyembre 18-24 naman ang Sine50: Pelikula ng Bayan screenings and film talks sa Trinoma, SM Southmall, Robinson’s Galleria, at Cinematheque Centres.
Joint celebration ito ng PFIM at Philippine Creative Industries Month (PFIM), sa pakikipagtulungan ng CEAP.
Sa halagang PHP50, mapapanood sa piling sinehan ang regional films na Tu Pug Imatuy, Cleaners, Huwebes Huwebes, at Little Azkals.