GORGY RULA
Pumunta ang PEP Troika sa pangalawang araw ng burol ni National Artist Nora Aunor noong Biyernes Santo, April 18, 2025, sa Chapels 7, 8, and 9 ng The Heritage Park, Fort Bonifacio, Taguig City.
Si Matet de Leon ang unang bumungad sa amin sa labas ng chapel. Ipinakilala niya kami sa dalawang kapatid na sina Kiko at Kenneth.
Read: Matet de Leon on mom Nora Aunor's death: "Parang tumigil yung mundo namin."
Bumati kami kay Ian de Leon at tinanong ko na rin kung pupunta ba ang papa niyang si Christopher de Leon.
“Mamaya daw po,” kaagad na sagot ng nag-iisang biological child nina Christopher at Nora.
Read: Ian de Leon reveals cause of death of Nora Aunor
Tumuloy na kami sa kabaong ni Nora para mag-alay ng maikling panalangin. Nasa harapan na upuan si Lotlot de Leon na mahigpit yumakap sa amin.
Kausap niya roon ang magkapatid na sina Charo at Malou Santos, kasama ang production secretary na si Aida Espiritu.
Nasa kabilang upuan naman si Direk Joel Lamangan, na dumating bago mag-4:00 P.M. kasama si Jim Pebanco, na katabi si Frank Rivera.
INTERVIEW WITH RICHARD MERK
Nandoon din si Richard Merk, na pinakiusapan naming kapanayamin dahil matagal-tagal din silang nagkasama at nagkaroon ng collaborations ng Superstar.
Read: Richard Merck, nagpakasal kay Nora Aunor: "I lost my ex-wife."
Habang ini-interview namin si Richard sa labas ng chapel, namataan namin si John Rendez.
Pagkatapos ng mahaba-habang interbyu kay Richard Merk, pumasok ako ng chapel para tingnan kung ano ang ginawa at nasaan si John.
Nakaupo ito sa bandang likuran, sa lugar ng media at ilang nakiramay.
Ilang sandali, lumapit si John sa kabaong ni Ate Guy, parang kinakausap niya ito nang malapitan. Umiiyak siyang bumalik sa upuan niya sa likuran.
Matatandaang present si John sa 70th birthday celebration ni Ate Guy noong Mayo 20, 2023, sa Seda Vertis North, Quezon City, kung saan kumpleto ang limang magkakapatid na sina Ian, Lotlot, Matet, Kiko, at Kenneth.
At that time, bida si John sa pelikulang Tomacruz… Sa Puso Ng Isang Anak, kung saan si Nora mismo ang executive producer.
Kasama sa cast ng Tomacruz sina Matet, Ian, Kenneth, at Nora.
Nakiusap pa noon ang Superstar na sana ay "magbati" na ang mga anak at si John.
Ang bilin niya, “Sana makita ko na magmahalan kayo. Kasi ako naman, matanda na ako, e.
“Magpasalamat tayo sa kanya na mula noon hanggang ngayon, nandiyan pa rin siya.
“So, yun lang, gusto ko lang malaman ng tao na intindihin natin siya, unawain natin siya."
Read: Nora Aunor, ipinakiusap sa mga anak na mahalin si John Rendez
Sa burol nitong Biyernes Santo, walang eksenang nangyari between John at sa mga anak ni Ate Guy.
Ni hindi namin siya nakitang kausap ang sinuman sa mga anak.
CHRISTOPHER DE LEON'S ARRIVAL
Pasado 7:00 P.M., dumating si Christopher sa burol. Lumapit sa kanya si Ian, kasama ang anak na isang batang lalaki.
Nandoon din si Kiko.
Lumapit si Snooky Serna at bumeso kay Christopher.
Maya-maya, pumasok si Janine Gutierrez, nasa likuran lang niya si Jericho Rosales.
Sumunod na ring pumasok si Lotlot, na yumakap sa kanyang ama at hindi napigilang umiyak.
Niyakap din siya ni Boyet at tinapik-tapik sa likod.
JOHN RENDEZ AND CHRISTOPHER DE LEON SHAKE HANDS
Nasa likuran lang ng upuan namin si John na biglang tumayo at lumapit uli sa kabaong ni Ate Guy.
Ilang sandali ay tumuloy na si Boyet sa kabaong ni Ate Guy, hawak sa kamay ang kanyang apo at nasa likuran niya si Ian. Nandoon pa sa harap ng kabaong si John na parang kausap si Snooky.
Pagkalapit ni Boyet, tumingin sandali sa kabaong, nagkatinginan sila ni John, at nagkamay.
Kaagad na umalis si John, at bumalik na sa kinauupuan niya sa likod at may kinausap siyang babae.
Ang anak ni Lotlot na si Max ang nag-lead ng novena prayer, at pagkatapos nito ay bumalik uli si John sa kabaong.
Pagbalik niya ay nagkasalubong sila ni Ian. Bahagya siyang tumango at ngumiti kay Ian, at nag-respond naman ang huli.
Hindi na namin siya nakitang kumain sa labas.
Tumitiyempo pa sana kaming kapanayamin ito, pero halatang emosyunal siya.
Earlier, nagpaunlak ng interview si John sa isang vlogger.
Pumayag si John na after that ay PEP Troika naman ang mag-iinterbyu sa kanya.
Pero more or less ay one minute lang ang interview ni John sa vlogger.
Masyado na itong naging emosyunal, kaya hindi na rin muna namin kinausap.
Tumitiyempo pa sana kaming kapanayamin ito, pero halatang emosyunal siya all throughout that night hanggang umalis siya.
Hindi na rin nagpaunlak ng interview si Christopher.
“Nasabi na nila lahat, e…” sabi ni Christopher sa akin.
Noong Miyerkules Santo pa lang ng gabi ay nag-message na ako sa kanya kung puwede siyang magbigay ng mensahe, pero hindi na siya sumagot.
Nung nagkausap kami sa telepono kinabukasan ay iba na ang napag-usapan namin.
Naging tahimik lang ang pangalawang gabi ng burol ni Ate Guy.
Mas nag-focus muna ang mga anak niya sa huling sandaling makakasama nila ang kanilang ina.
Naging civil at maayos ang pakikitungo nilang lahat kay John.
Hangad naman ng lahat, lalo na ang mga anak at malalapit na pamilya, na payapa nilang maihatid sa huling hantungan si Ate Guy.
NOEL FERRER
Sumunod naman ang mga tao na para sa mga kaibigan at pamilya ang viewing kagabi, Biyernes Santo, ikalawang araw ng lamay ni Ate Guy.
Nandoon din sina Evangeline Pascual, Rita Avila at Direk FM Reyes, Juan Rodrigo, Bembol Roco, Direk Laurice Guillen, Lani Mercado, Carla Abellana, pati na si Justice Esperanza Fabon-Victorino, na saglit nating nakapanayam.
Nakita rin natin si Tata Nanding Josef, si Atty. Joji Alonso at ang kanyang anak na si Nico Antonio, musical director Homer Flores at ang kanyang asawa na si Rocky Flores, na napagkamalan ni Tito Gorgy na si Myra Manibog.
Nandoon din ang mga WEA Dancers ni Ate Guy.
Bago umuwi ang Troika, nakausap natin si Jackie Lou Blanco kasama ang kanyang mga anak na si Ara at Rikimae Davao, na ang sabi, “Long time, no see.”
Grabe, hindi pa man lubusang nagsi-sink in ang pagkamatay ng kanilang Mamita Pilita Corrales ay heto na ulit sila, sa kabilang side naman ng Heritage para suportahan pa rin sina Lotlot at Janine Gutierrez.
Dating mother-in-law ni Lotlot si Pilita.
Aminin natin, maraming times noong nandoon tayo na natatahimik dahil talagang malungkot.
Parang may malalim na puwang ang nawala sa atin na di nating maipaliwanag hanggang sa ating pag-uwi.
Sa lahat ng panayam at alam natin, parang pelikula ang buhay ni Ate Guy.
Naisip ko nga, parang kuwento ng ating bayan—sumasabay ang kuwento rin ng buhay ng ating Pambansang Alagad Ng Sining.
Nakakalungkot. Pero puno ng pagpapasalamat.
Sana’y magsilbing inspirasyon na lang ang buhay niya, na puwede tayong magtulungan, magsuportahan, para bumuti ang buhay.
Mami-miss ka namin, Ate Guy!
JERRY OLEA
May sundalong nakatayo at hindi nagsasalita sa bandang paanan ng kabaong ni National Artist Nora Aunor.
May karelyebo ang sundalong bantay sa tuwi-tuwina.
Sa ibabaw ng kabaong ni Ate Guy ay may watawat ng Pilipinas.
Dalawa ang naka-pin sa kanyang suot, sa may dibdib. Isa roon ay ang watawat.
Sa bandang ulunan ni Ate Guy ay takaw-pansin ang dalawang wreath na magkatabi. Ang isa ay mula kay President Ferdinand Marcos Jr. at ang isa pa ay mula kay former President Rodrigo Duterte.
Naka-display ang ilang tropeo ni Nora bilang best actress, maging ang medalyon sa Orden ng Pambansang Alagad ng Sining.
Bawal maglitrato at mag-video sa loob ng chapel. Humingi kami ng permiso sa magkapatid na Lotlot at Matet na magkuha ng litrato, pumayag sila.
Pakiusap ni Matet, huwag kunan ng litrato ang mukha ni Nora. May nagkuha raw niyon before at ipinost online.
NORA AUNOR WAKE DAY 3
Ngayong Sabado de Gloria, Abril 19, ng umaga, ay dumagsa na ang Noranians sa Heritage Memorial Park para magbigay-pugay sa Superstar.
Maayos na pumipila ang fans, at may mga pulis para gabayan sila.
Kahit fans na naka-wheelchair o naka-walker ay pumipila.
Namataan namin, pasado 1:00 P.M. sina Nadia Montenegro at Shyr Valdez na punong-abala.
Afterwards ay dumating si John Rendez.
Nagko-condole ang fans kay John, nakikipagkamay, yumayakap, nagpapa-picture.
Habang kumakain si John ay andaming tumatawag sa pangalan niya, kumakaway, nagsasabi ng, “Condolence.”
Kumakaway rin si John at nagbibigay ng mensahe sa mga ito.
Natuloy sa pagkakataong ito ang eksklusibong panayam ng PEP kay John.
Bahagi ng mensahe ni John para sa fans, “Let’s just honor her legacy na lang. Remember her memory, and this should be a time for remembrance… celebrating her life!”
Bago mag-2:00 P.M. ay namataan na rin natin sa burol si Matet de Leon.
Sabi ng waiter na nakausap namin ay nasa lamay na rin sina Ian de Leon, Lotlot de Leon, at Janine Gutierrez.