GORGY RULA
Wala pa ring inilalabas na statement ang Happy Time kaugnay sa isyu nina Janno Gibbs at Kitkat.
Ang Happy Time ay ang daily noontime show ng Net 25, kunsaan main hosts sina Janno, Kitkat, at Anjo Yllana.
Dapat ay babalik na sila sa live episode nitong Miyerkules, February 24.
Pero dahil sa hindi pa rin pala nagkaayos sina Janno at Kitkat, pansamantala munang ipinalit ang komedyanteng si Boobsie kasama si Mico Aytona at ang talent ng Eagle Broadcasting Company na si CJ Hirro.
Maganda ang feedback sa kanila, lalo na si Boobsie na plakado ang mga patawa nila ni Anjo.
Kaya nang lumabas ang statement ni Janno na pinapaalis na sila sa Happy Time, tinanong ko si Boobsie kung siya na ba ang ipinalit.
“Hihihi! Yun po ang sabi,” text niya sa akin.
Hindi na muna niya sinagot ang ilan ko pang tanong dahil mas mabuting manggaling na raw sa mga taga-Happy Time kung kumpirmadong siya na ang regular na makakasama ni Anjo.
“Napaka-blessed ko nga po. Thank God,” dagdag niyang text.
“Halata mong Masaya at Pure Happiness ang nakikita ko ke Kuya Anjo dyAn. walang stress Masaya lang po kami. heheheheh,” sabi pa ni Boobsie sa pictures nila nina Anjo, Mico, at CJ.
Sinubukan ko ring kunan ng pahayag si Anjo pero hindi na niya sinagot ang ilan ko pang katanungan.
Wala naman daw siyang alam sa nangyaring gulo dahil absent daw siya nung araw na iyun.
So far, wala pa raw sinasabi sa kanya kung tatanggalin na ba talaga sina Janno at Kitkat, at kung sino ang ipapalit.
Pero sa totoo lang, magaling si Boobsie, at meron na rin naman siyang iba pang programa sa Net 25, kaya swak na rin kung regular na rin siyang mapapanood sa Happy Time.
NOEL FERRER
Moral of the story: the one that rocks the boat is thrown out of it!
I wonder kung ano ang masasabi ng Viva na namamahala ng career ni Janno, at kung sino man ang manager ni Kitkat.
Ano kaya ang nakasaad sa kontrata nila rito?
Sana, beyond work—at kahit sa likod ng camera—ay magkaayos din sina Janno at Kitkat sa tamang panahon at pagkakataon.
Pandemya, mas kailangan tayong magtulungan kaysa magbangayan.
Tuloy, sila ang nadehado’t nawalan ng trabaho.
JERRY OLEA
Nobody is indispensable. Pinapalamig na muna ng Net 25 ang sitwasyon.
Nawa’y magbigay ng official statement ang istasyon para malinaw kung ano ang status nina Janno at Kitkat sa Happy Time.
Basta, happy tayo para kay Boobsie sa opportunity na ipinagkatiwala sa kanya!