Hindi pabor si Philippine National Police (PNP) Chief Police Director General Ronald ‘Bato’ dela Rosa sa mungkahi ng aktor na si Robin Padilla na magkaroon muna ng dayalogo, sa pagitan ng PNP at ng mga namumuno sa showbiz industry, bago isapubliko ang pangalan ng mga artistang pinaniniwalaang sangkot sa ilegal na droga.
Read: Robin Padilla not in favor of publicly naming showbiz personalities involved in drugs
Sa report ng State of the Nation ng GMA News TV ngayong gabi, August 31, sinabi ni Dela Rosa na unfair ang suhestiyon ni Robin sa mga nauna nang pinangalanan na mga pulitiko at iba pang kilalang personalidad na sangkot diumano sa illegal drug trade.
Pahayag ng PNP chief, “Ay, hindi na tayo fair diyan sa lahat, di ba?
“E, selective na itong ating naging kampanya.
“Kailangan maging transparent tayo sa lahat.”
Payo ni Dela Rosa sa mga taga-showbiz na posibleng sangkot sa ipinagbabawal na gamot, sumuko na sa mga awtoridad upang malinis ang kanilang mga pangalan.
Dahil sa kampanya ng administrasyon ni Pangulong Rodrigo Duterte na puksain ang paglipana ng droga sa bansa, may mga taga-entertainment industry na ring kusang nagsagawa ng drug testing.
Kabilang na ang Star Magic, ang talent arm ng ABS-CBN, kung saan 40 talents nila ang boluntaryong nagpa-drug test; katulad na lamang nina Jake Cuenca, Diego Loyzaga, at Enrique Gil.
Ang iba pang celebrities na boluntaryong nagpa-drug test ay sina Luis Manzano, Baron Geisler, at Patrick Garcia.
Pawang negatibo ang resulta ng kanilang drug tests.
Kahapon, August 30, nagbabala na ang pamunuan ng Philippine Drug Enforcement Agency (PDEA) na magkakaroon sila ng extensive surveillance sa mga artistang nakuhaan ng CCTV footage na pabalik-balik diumano sa isang condo unit sa Mandaluyong City, kung saan nahulian ang dalawang tenants nito ng milyong halaga ng party drugs.
Read: PDEA to conduct extensive surveillance of showbiz personalities involved in illegal drugs