Nahaharap ngayon sa diumano'y patung-patong na reklamong may kaugnayan sa drugs, firearms, at fuel trafficking ang presidente ng Miss Universe Organization (MUO) na si Raul Rocha.
Sa ulat ng Mexican newspaper na Reforma nitong Miyerkules, November 26, 2025, itinuturing umano si Rocha ng Mexico’s Fiscalía General de la República (FGR) o Attorney General’s Office bilang pinuno ng isang kriminal na organisasyong sangkot sa pagpuslit ng fuel gamit ang mga bangka na dumaraan sa Usumacinta River na inililipat sa mga truck patungong Queretaro, Mexico.
RAUL ROCHA'S alleged involvement in drug and firearm trafficking
Nabanggit din sa ulat na noong August 6, inilabas ni Yazmín Mayoral Marín, mula sa Specialized Prosecutor's Office for Organized Crime ng Mexico, ang arrest warrant laban kay Rocha.
Kaugnay ito ng mga kasong organized crime dahil umano sa pagkakasangkot ni Rocha sa illegal drug at firearm trafficking.
Sinasabi sa arrest warrant na ang kriminal na organisasyon umano ni Rocha ay may "connections with politicians and authorities at all three levels of government to deliberately carry out their mission, which includes the sale of hydrocarbons, narcotics, and the trafficking and sale of large quantities of weapons of war.”
Read: R’Bonney Gabriel responds to Raul Rocha’s swipe at her IG fans
Nagsagawa rin daw ng raid ang FGR at dito tumambad sa kanila ang mga rekord ng kontribusyong pinansiyal umano ni Rocha sa naturang kriminal na organisasyon, kabilang ang halagang 2.1 million Mexican pesos.
Kaugnay nito, noong Oktubre ay lumapit daw si Rocha sa FGR upang makipagkasundo para sa isang plea bargain at magbigay ng impormasyon kapalit ng kanyang immunity mula sa prosekusyon.
Habang isinusulat ang artikulong ito ay wala pang inilalabas na pahayag si Rocha tungkol sa mga nasabing alegasyon.
Read: Anne Jakrajutatip, may arrest warrant; tumakas umano sa Mexico
RAUL ROCHA'S MISS UNIVERSE CONTROVERSY
Ang pagkakasangkot ni Rocha sa diumano'y ilegal na gawain ay nangyari sa gitna ng kontrobersiyang bumabalot sa MUO matapos idaos ang 74th Miss Universe noong November 21, sa Thailand.
Kaugnay ito ng sunud-sunod na batikos sa MUO, kay Rocha, at sa nanalong Miss Universe 2025 na si Fátima Bosch ng Mexico.
Kasama rito ang mga alegasyon ng nag-resign na huradong si French-Lebanese composer Omar Harfouch at ang pag-alma ng ilang kandidata dahil umano sa hindi maipaliwanag na dahilan ng pagkapanalo ni Fátima.
Read: Pagkapanalo ni Fatima Bosch, nabahiran ng kontrobersiya
Dahil sa kaliwa't kanang batikos sa organisasyon, nagpahayag si Rocha na kung magtutuloy-tuloy ito ay hindi imposibleng ibenta niya ang MUO na nabili lang niya noong January 2024.