#TheBarrettoFamilyFeud
Mas tumitindi ang gusot sa pagitan ng estranged sisters na sina Gretchen, 49, at Marjorie Barretto, 45.
Ito ay dahil sa akusasyon ni Gretchen na nais daw ni Marjorie na angkinin ang bahay ng kanilang yumaong ama na si Miguel Barretto, 82, sa Subic, Zambales.
Sa kanyang Instagram Stories (IG Stories) nitong Miyerkules ng gabi, October 23, isiniwalat ni Gretchen na binayaran daw ni Marjorie at ng anak nitong si Julia Barretto, 22, ang hospital bills ng namayapang Barretto patriarch kapalit ang bahay nito sa Subic.
Naratay sa St. Luke's Medical Center, Bonifacio Global City, Taguig City, ang ama nina Gretchen at Marjorie sa loob ng 16 araw—14 araw sa Intensive Care Unit (ICU) at dalawang araw sa regular room—mula September 29 hanggang sa kamatayan nito noong October 15, 2019.
Sabi ni Gretchen (published as is), “Ask Marjorie itchie-very
“How much did you contribute to pay for the hospital bill od dad?
“50k?
“Julia? 500k.
“But you asked for pikey subic home in return for the 500k.”
Dagdag pa niya: “He was still alive & you wanted to take his home to pay st. lukes.
“That’s not love
“That’s not helping
“Last few days of your lolo pikey life, you wanted his home to the tune of 500k.”
"Pikey" ang tawag ng Barretto grandchildren sa kanilang yumaong lolo.
Sa loob ng 16 araw na pagkaka-confine sa ospital ni Miguel Barretto, hindi nakadalaw si Gretchen dahil ayaw raw nitong makabanggaan si Marjorie.
Pumunta si Gretchen sa unang gabi ng burol para sa nakaalitang ama sa Heritage Memorial Park sa Taguig City noong October 16.
Ngunit ang tahimik sanang pagdadalamhati para sa namayapa ay humantong sa isang komosyon sa pagitan nina Gretchen, Marjorie, at ang pamangkin nilang si Nicole Barretto, anak ng kanilang kapatid na si J.J. Barretto.
Ito ay kahit nasa harapan pa nila si Pangulong Rodrigo Duterte.
Nagpadala ang PEP.ph (Philippine Entertainment Portal) ng mensahe kay Marjorie upang hingin ang kanyang panig ukol sa akusasyong ito ni Gretchen.
Kaagad naming ilalathala ang kanyang pahayag kapag tumugon na ito sa aming mensahe.