Pinangunahan nina Janella Salvador at Joshua Garcia ang #StarMagicStandsWithABSCBN campaign ng Star Magic sa Instagram.
Ang Star Magic ang talent arm ng ABS-CBN, kung saan itinuturing na prime artists ang dalawang young stars.
Kahapon, February 18, in-upload sa official Instagram account ng Star Magic ang mga larawan nina Janella at Joshua, kasama ang iba pang talents ng network, na nakasuot ng puting damit.
Kapansin-pansing naka-pin sa kanilang damit ang ribbon na sumisimbolo sa mga kulay ng ABS-CBN—pula, asul, at berde.
Sa caption ay kapansin-pansin din ang paggamit nila ng hashtags na #StarMagicStandsWithABSCBN at #InTheServiceOfTheFilipino.
Ang "In The Service Of The Filipino" ang slogan ng Kapamilya network.
Bukod kina Janella at Joshua, naka-post din sa Instagram account ng Star Magic ang mga larawan nina Nyoy Volante, Jameson Blake, Seth Fedelin, Luke Conde, Daniella Stranner, Kira Balinger, at Chantal Videla.
GAG ORDER?
Nag-post ng #StarMagicStandsWithABSCBN campaign ang talent arm ng ABS-CBN matapos hilingin ng Office of the Solicitor General (OSG) sa Supreme Court na mag-isyu ito ng gag order sa network kaugnay ng quo warranto case na kinahaharap nito.
Nag-ugat ang “Very Urgent Motion for Issuance of Gag Order” ni Solicitor General Jose Calida at iba pang abugado ng gobyerno kahapon, February 18, matapos maglabas diumano ng propaganda campaign ang ABS-CBN laban sa pamahalaan.
Ipinakalat diumano ito ng network sa lahat ng platforms nila, kasama na ang airwaves, online, at pati na ang ilang artista at personalities na may kaugnayan sa ABS-CBN.
Nakalagay sa reklamo ng SolGen sa SC “to issue an order prohibiting the parties and persons acting on their behalf.”
Ang quo warranto petition ng OSG sa SC laban sa ABS-CBN ay naglalayong bawiin ng korte ang iginawad na prangkisa sa istasyon dahil sa mga nalabag daw nilang mga probisyon ng kanilang legislative franchise.
Binigyan ng Supreme Court ng sampung araw ang network upang sumagot sa quo warranto petition at limang araw naman para sa gag order issue.
Sa March 30, 2020 nakatakdang magtapos ang franchise ng ABS-CBN.