Nagpaabot ng suporta ang Thai transwoman billionaire na si Jakkaphong "Anne" Jakrajutatip sa ABS-CBN.
Si Anne ang owner at chief executive officer ng JKN Global Media Public Company Limited, isang multi-million-dollar media company sa Thailand.
Noong 2016 pa nagsimula ang business partnership ng kumpanya ng Thai media mogul sa Kapamilya network.
“My heart will go on for you ABS-CBN…. I know we will work again one day soon!!! Never surrender!!! [Kiss emoji]," mensahe ni Anne sa kanyang Instagram Story nitong Huwebes, August 27.
Wala mang detalye, malinaw na ang words of encouragement ni Anne ay may kinalaman sa pagpapasara sa ABS-CBN.
Tuluyang nagsara ang ABS-CBN matapos ibasura ng Kongreso, noong July 10, ang apela ng network na mabigyan ng panibagong 25-year-franchise.
Ang JKN Global Media ay isang global content distributor at channel operator ng iba't ibang TV series at movies mula sa Asian countries, partikular ang Pilipinas at India.
Ang JKN Global ang distributor sa Thailand ng ilang mga teleserye mula sa ABS-CBN at GMA Network.
Ang kumpanya ng Thai billionaire ay kabilang sa listahan ng "Asia’s 200 Best Under a Billion" na inilabas ng Forbes ngayong Agosto 2020.
Nakapagtala ang kumpanya ni Anne ng net income na eight million U.S. dollars o katumbas ng PHP387,640,000.
OPEN TO “JOIN” BOY BUNDA AFTER COVID-19
Bukod sa message of support sa ABS-CBN, ibinahagi rin ni Anne na naimbitahan siya noon ng ABS-CBN na lumabas sa Tonight with Boy Abunda.
Ang late-night entertainment talk show ni Boy Abunda ay isa sa mga natigil matapos mamaalam sa ere ang ABS-CBN.
Kalakip ng larawan ni Boy, ito ang mensahe ni Anne sa isa pang Instagram Story, “ABS CBN invited me to the Talk Show called Boy Abunda. I supposed to go to his show since April.”
Pahabol niya, “I’m considering it again to join his show after Covid 19.”
Pero sa ginawang pagpapasara sa TV network, walang update kung itutuloy ba ang programa ni Boy sa natitirang Kapamilya cable channels at social media accounts.
ANNE’S PAST BUSINESS DEALS WITH ABS-CBN
Noong 2018, inanunsiyo ng ABS-CBN ang pagbili ng JKN Global ng 290 hours of content mula sa Kapamilya network.
Kinabibilangan ito ng pitong Kapamilya teleserye na ilalabas sa Thailand at Laos: La Luna Sangre, I’ll Never Say Goodbye, The Promise of Forever, Till I Met You, FPJ’s Ang Probinsyano, at ang lifestyle show ni Pia Wurtzbach na Pia’s Postcards.
Bago ang mga ito, nauna nang binili ng JKN Global media ang rights para sa mga teleseryeng Got To Believe, The Legal Wife, at Bridges of Love na tinangkilik sa Thailand.
Sa partnership na ito, ilang beses na ring naimbitahan ang Kapamilya stars sa Thailand para i-promote ang kanilang shows doon, kagaya nina Kathryn Bernardo, Daniel Padilla, Maja Salvador, at Jericho Rosales.
Ganito rin ang naging proseso ng business deals ni Anne sa GMA Network.
ABS-CBN PROGRAMS BID GOODBYE
Samantala, gaya ng inaasahan, nagtuluy-tuloy na ang pamamaalam ng mga empleyado at mga programa ng ABS-CBN sa media platforms nito, partikular sa telebisyon at radyo.
Matapos ibasura ang petisyon ng TV network para sa panibagong license to broadcast, sumunod na ang balita tungkol sa malawakang retrenchment ng 11,000 empleyado ng network pagsapit ng Agosto.
Gayunpaman, ilang araw lamang pagkatapos ng ABS-CBN franchise hearing, nadama na sa social media ang pighati ng network employees.
Nagkaroon ng pagbabawas ng shows at pagre-retrench ng mga empleyado na kinabilangan din ng top personalities kagaya nina Ces Drilon, Anthony Taberna, Gerry Baja, at Korina Sanchez.
Sa mga sumunod pang araw, isa-isang nalagas ang Kapamilya employees.
Ngayong Biyernes, August 28, sabay-sabay namaalam sa himpapawid ang mga programa ng ABS-CBN, ABS-CBN Regional Network Group (RNG), at ang ABS-CBN AM station na DZMM, ang FM station nitong My Only Radio (MOR).
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika