Nami-miss na raw ni Korina Sanchez na mambara ng bashers at trolls.
Ilang araw na kasing walang nangtu-troll sa 55-year-old veteran broadcaster.
Sa kanyang post ukol sa mga benepisyo ng collagen noong nakaraang Sabado, September 5, ibinahagi ni Korina ang isang magandang larawan niya.
Sa caption, may mahaba siyang paliwanag ukol sa mabuting maidudulot ng pag-inom ng collagen supplement.
Sa post niyang ito, puro papuri ang mga komento kay Korina mula sa mga kaibigan at followers.
May isang komento ang sinagot ni Korina.
Tanong ng netizen, “Wala bang basher na aaway kay Ma'am Korina? Tawa ako ng tawa pag nababara mga basher. Hahahaha”
Tugon ng beteranang news anchor na tila natatawa: “@kutch.iro Oo nga miss ko na nga eh hahaha.”
“BRUHA-SLAYER”
Noong nakaraang linggo, tila aprubado kay Korina ang binyag sa kanyang “bruha-slayer” ng isang netizen.
Madalas kasing tawaging “bruha” ng dating ABS-CBN news personality ang mga nambubuska sa kanya.
Nag-ugat ang pagsagot-sagot ni Korina sa mga bashers matapos magpaalam sa himpapawid ang ABS-CBN, ang network na pinaglingkuran niya ng halos tatlong dekada.
Hindi raw kasi niya maatim na may mga taong ikinatutuwa pa ang pagsasara ng network kahit na katumbas nito ang pagkawala ng hanapbuhay ng libu-libong empleyado.
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika