“DI AKO MAG AADJUST SA INYO!”
Ito ang sagot ni Ryza Cenon sa mga netizens na pumupuna sa pagbabago umano ng kanyang boses.
Nakatanggap kasi ng pamba-bash ang 33-year-old actress nang imbitahan niya ang kanyang 1.3 million Instagram followers na mag-subscribe sa YouTube channel niya.
Sa post ni Ryza nitong Martes, February 2, gamit niya ang cute na cute na picture ng baby boy niyang si Night.
Sa caption, naka-tag ang link sa YouTube channel ni Ryza, na sa kasalukuyan ay mayroong 274,000 subscribers.
Sabi kunwari ni Night (published as is): “Ahhh guys nood naman po kayo ng vlog namin ni mommy. [smiley]”
Isang babaeng netizen ang nag-comment ng “no!” sa post na iyon ni Ryza.
Hindi raw niya panonoorin ang vlog ni Ryza dahil “OA” at sobrang “pa-cute” na raw ngayon kung magsalita ang aktres.
Pansin ng netizen, hindi naman daw ganoon dati kung magsalita si Ryza.
Nagbago lang daw ang paraan ng pagsasalita nito simula nang isilang si Night.
Maikling “di ka pinipilit” ang reply ni Ryza sa netizen.
Hindi na nagawang magkomento uli ng netizen dahil kinuyog na siya ng fans ni Ryza na dumepensa para sa aktres.
RYZA cenon ADDRESSES BASHERS
Makalipas ang ilang oras, binura na ni Ryza ang comment na iyon ng netizen, kasama ang humaba nang thread na nalikha niyon.
Gayunman, makikita sa comments section ng post na iyon ni Ryza na may mangilan-ngilan pa ring fans ng aktres ang nagtatanggol sa kanya at umaaway sa netizen.
Mayroon ding sumang-ayon sa puna ng netizen na “naiba” raw ang pagsasalita ni Ryza.
Habang isa naman ang nag-akusang “dinadamay na sa vlog” ng aktres ang kanyang newborn son “Kasi Wala ng career.”
Miyerkules ng gabi, nag-post si Ryza sa Instagram Story ng sagot niya sa natanggap na pamba-bash.
Ipinost niya ang isang selfie habang karga ang anak na si Night—pero kapansin-pansin ang talim ng pagkakairap ni Ryza.
All capital letters ang caption ng aktres: “REACTION KO KAPAG MAY ISSUE SILA SA BOSES KO!
“KUNG AYAW NYO DI WAG
“DI AKO MAG AADJUST PARA SA INYO!”
October 31, 2020 nang isilang ni Ryza si Night, ang firstborn nila ng boyfriend niyang si Miguel Antonio Cruz, isang freelance cinematographer.