Aminado si Christian Bautista, 39, na mas nagiging matatag ang samahan nila ng kanyang misis na si Kat Ramnani, 30, sa gitna ng COVID-19 pandemic.
Bilang singer, apektado si Christian sa limitasyon sa entertainment industry na magsagawa ng physical live shows at concerts simula nang ipatupad ang community quarantine isang taon ang nakararaan.
Sa eksklusibong panayam ng PEP.ph (Philippine Entertainment Portal), naging bukas si Christian sa pagsasabing naging hamon sa kanyang patunayan na kaya niyang magtaguyod ng buhay may-asawa kahit may pandemya.
Dalawang taon nang kasal sina Christian at Kat.
Paano ba si Christian bilang asawa?
"Siyempre we just got married. Marami pa kaming adjustments sa isa't isa," bungad na sagot ni Christian.
Patuloy niya: "Ako naman, ang main challenge ko sa sarili ko, kahit pandemic, how do I still provide?
"That's a tough challenge.
"Being the entertainment industry is the last to open, how do I show my wife na kahit walang entertainment industry, makaka-create ako ng whatever business or income.
"Yun ang na-prove ko sa kanya. Nagawa ko naman."
Si Christian ay isang Kapuso star na napapanood sa Sunday variety show na All-Out Sundays (AOS).
Tumagal ng 17 weeks na sa social media platform muna ng GMA-7 ipinalabas ang stay-at-home shows ng AOS.
Alinsunod ito sa protocols nang ipatupad ang ECQ sa bansa noong March 15, 2020 hanggang May 31, 2020.
Nakabalik sa pag-ere sa telebisyon ang AOS noong July 2020.
Isa rin si Christian sa celebrity judges ng Kapuso reality show na The Clash Season 3, na umere mula October hanggang December 2020.
Bukod dito ay naging line producer si Christian sa virtual concert ni Alden Richards noong December 2020.
QUALITY TIME WITH WIFE KAT
Sa patuloy na kuwento ni Christian sa PEP.ph, naging daan naman daw ang stay-at-home protocol para mas magkaroon sila ni Kat ng oras para sa isa't isa.
Si Kat ay may career sa corporate world.
Sabi ni Christian sa bonding moments nilang mag-asawa: "Simpleng-simple. Lunches together. Dinners together.
"Kasi pag nagwo-work ako or nagwo-work siya. Siyempre nasa office siya. Ako either nasa probinsiya, abroad, or nasa studio.
"Pero iba pa rin yung magkasama talaga kayo—nagkukuwentuhan, nagmamahalan."
Proud din si Christian sa isang nadiskubreng katangian ni Kat, "She's an amazing cook."
Sa parte niya, gusto raw ni Christian na napapakita ang pagmamahal kay Kat sa simpleng bagay tulad ng paghatid niya rito sa opisina noong araw na nakapanayam siya ng PEP.ph.
"Drinive ko siya sa office niya because that's what husbands do," ani Christian.
Paglalarawan pa niya sa sarili, "Very good husband."
CHRISTIAN BAUTISTA ON PEP VOICE CHAT ROOM IN CALAMANSI
Nakapanayam ng PEP.ph si Christian noong March 9.
Ang Kapuso singer-host ang unang celebrity guest sa PEP.ph voice chat room sa Calamansi App, isang live streaming social media app na may iba-ibang voice chat room.
Bukod sa pakikipagkuwentuhan kay Christian, nagkaroon ng pagkakataon ang ilang netizens na nakinig nang live sa PEP voice chat room sa Calamansi na magsampol ng kanilang kanta.
Bilang kilalang hurado si Christian sa Kapuso reality show na The Clash, game siyang nagbigay ng comments sa netizens na nagpakitang-gilas sa kanya.
Pati si Christian ay biglaang nagsampol din ng kanyang bagong cover song ng "Ikaw Lamang" ng OPM band na Calla Lily.
Ang version ni Christian ng "Ikaw Lamang" ay dedicated daw para sa kanyang asawa na si Kat.
"Siyempre! Sino pa ba?" masayang saad ni Christian.
Pinagbigyan din ni Christian ang request ng listeners sa PEP.ph voice chat room na magsampol siya ng version niya ng "Beautiful Girl."
Mag-download lang ng Calamnsi App sa app stores ng mobile phones para makasali sa kuwentuhan sa PEP.ph Voice Chat Room.
Mayroong twice a week show ang PEP.ph sa Calamansi kada 9:30 p.m. tuwing Martes at Huwebes.
Dito ay may tsansa ang masuwerteng listeners na PEPsters na live makipagkuwentuhan sa PEP.ph senior writers tungkol sa showbiz happenings at pati na sa upcoming celebrity guests sa susunod na episodes.