Kasalukuyang napapanood ngayon sa GMA Telebabad na Heartful Café ang Kapuso Primetime Princess na si Barbie Forteza.
Special guest siya sa seryeng pinagbibidahan nina Julie Anne San Jose at David Licauco. At kahit special guest lang siya, nag-enjoy daw siya talaga.
“Sobra akong nag-enjoy kahit na guesting lang siya para sa akin,” sabi ni Barbie.
“Number one, dahil ang saya ng role ko, ang sarap paglaruan.
"At saka, first time ko kasing magkaroon ng gano’ng sophisticated role. Kontrabida in a way—mataray, inglisera. Kasi palagi akong mabait, loving daughter.
“Ngayon, very sophisticated girlfriend ni Ace Nobleza [David Licaudo's character].”
Kahit off-cam, masaya raw para kay Barbie ang naging guesting sa Heartful Café dahil nagsilbi itong reunion niya sa director ng serye na si Mark dela Cruz.
"Pati PD [production designer] namin, si Paul Infante at siyempre, si Julie,” dagdag niya.
BARBIE DOESN'T MIND PLAYING SUPPORTING ROLES
Si Barbie ang tinaguriang Kapuso Primetime Princess. Kaya nga tinanong namin siya kung hindi nagiging isyu sa kanya na ginagawa pa rin siyang guest sa primetime serye kunsaan iba ang bida.
“Siyempre, kailangan nating mag-work, di ba? Si Judith, tuluy-tuloy 'yan,” natawang hirit niya.
Saka niya sinabing, “Kidding aside, para sa akin naman bilang actor, mas fulfilling sa akin na mas nae-explore ko yung acting range ko sa iba’t ibang characters.
“So sa akin, hindi naman nagma-matter kung bida ba siya or supporting role as long as interesting yung character, very remarkable. Mas may impact, kumbaga.
“It wouldn’t matter to me kung bida siya or supporting role, as long as malakas ang impact ng character.”
BARBIE AND JULIE ANNE, BEST FRIENDS
Napapansin namin na sa social media, silang dalawa ni Julie Anne ang madalas na mag-comment sa post ng isa’t isa.
Masasabi ba niyang isa si Julie sa maituturing niyang malapit na kaibigan?
“Oo naman,” mabilis niyang pag-amin.
“E, di magpapalitan kami ng comment sa Instagram, 'tapos magka-text din kami,” tsika niya na natatawa.
“Tungkol din doon yung pinag-uusapan namin. Para kaming high school best friends. Dapat laging may bagong chika. Hindi puwedeng wala.
“We talk about even the most random things hanggang sa the most personal things. Iyon naman ang masasabi ko kay Julie. Parang yung friendship namin, parang hindi artista phase.
“Parang kaming dalawa, pini-figure out namin ang womanhood together. We deal with our problems together.”
Kaya na-excite nga raw siya nang malaman niya na maggi-guest siya sa Heartful Café.
“Actually, ang sinabi ko lang kay Julie, damihan niya yung baon niyang pagkain. Kasi for sure, makikikain ako sa kanya,” natawang sabi niya.
“Pero hindi, dyusko, excited na excited ako at minessage ko siya agad.
"Sabi ko, 'O, Julie, puwede bang maki-guest muna sa show mo? Kasi, mahina ang bentahan ngayon, e. Maraming bayarin.'
"Pati sa AOS [All-Out Sundays], noong maging regular na ako, sabi ko, ‘O, Julie ha, pasali sa show mo. Kailangan natin, e,'” biro pa rin niya.
BARBIE ENJOYS DOING SOPHISTICATED AND MATURE ROLES
Mula umpisa halos ng career ni Barbie ay mga bida roles na ang naibibigay sa kanya ng Kapuso network. Marami na rin siyang nagawang iba’t ibang klase ng karakter.
Pero kung siya ang tatanungin, ano pa ang gusto niyang gawin pagdating sa teleserye?
Aniya, “Wala naman pong problema sa akin kahit ano, pero kung mabibigyan ako ng chance na mag-suggest ng character, honestly, I would say, I really enjoyed my character as Cors [her character in Heartful Café].
“So I wouldn’t mind kung magagawa ko siya ulit for a longer period of time. Iyong mas sophisticated, mas dalaga, mataray.”
Dugtong din niya, “Pero gusto ko siyempre romcom. Para fun lang.”
BARBIE WANTS TO WORK WITH BF JAK ROBERTO
May mga real-life couple na pagdating sa mga serye nila, mas gustong hindi na muna sila ang magkasama.
Pero si Barbie, gusto raw niya na ang boyfriend na si Jak Roberto ang maging leading man pa rin.
“Tinatanong pa ba ‘yan?
“Well, siyempre naman, para magkasama na ang harot at trabaho,” pabirong hirit niya.
“E kasi, kagaya niyan, hindi kami magkasama. Kasi, nagku-quarantine na siya para sa serye niya.
"Unlike kung magkasama kami sa show, puwede kaming magkasama na mag-quarantine, o di ba?”
“Harot pala ang goal!” muli niyang hirit.