Naging emosyunal ang komedyanteng si Betong Sumaya dahil sa pagsorpresa sa kanya ni Alden Richards.
Noong maghahatinggabi ng September 25, Sabado, ay nagsagawa si Betong ng online selling ng kanyang pre-loved items at Marvel collectibles.
For bidding ang lahat ng mugs, sombrero, at iba pang mga personal niyang koleksiyon.
Sa bandang dulo ng kanyang Facebook live, isang “RJ Richards” ang nagtanong sa kanya.
Noong una, hindi nakilala ni Betong kung sino ang netizen na nagtanong.
Mensahe ni "RJ Richards" kay Betong: “Magkano lahat ng ibebenta mo diyan? RJ Richards.”
Medyo napaisip sandali si Betong matapos niyang basahin ang komento nito hanggang sa napagtanto niyang si Alden Richards nga ito, na kasamahan din niya sa Kapuso network.
Sabi ni Betong: “RJ Richards? Ha? Alden, ikaw ba 'yan?”
Tumugon naman ang Asia’s Multimedia Star.
Sagot nito: “Magkano lahat ang ibinebenta mo diyan, Bets?”
Tinanong niya muli kung si Alden nga ba ang nagkomento.
Dito na napasigaw si Betong dahil nalaman niyang ang kaibigang si Alden nga ang nanonood at nagtatanong sa kanyang online selling.
Sabi niya, “Siya yun! Ay, sumagot na nga.
"Ay, si Alden nga talaga ito! My God, Alden! Grabe naman 'to!”
Kasunod nito, sinabi ni Alden, “Bigyan mo ako ng P40K [worth].”
Dito na mangiyak-ngiyak ang komedyante.
Hindi makapaniwala si Betong na biglang sumulpot si Alden at nag-alok ng malaking halaga katumbas ng ilan niyang mga paninda.
Sabi ni Betong sa kaibigan, “Sige, Alden, sige. Wow, my goodness Alden, napaiyak mo naman ako dun.
"Oh my God, Alden, thank you.
"Ano ba 'yan, Alden, pinaiyak mo naman ako dito.
"Sige, Den, iano ko, iku-compute ko, thank you.
"Ano ba 'yan, si Alden naman, o! Napaiyak talaga ako, sobra.
"Sige, Den, ku-compute-in ko, ha. Yung sabi niya kasi, worth P40 thousand. Thank you, Den."
Lalo pang napahagulhol si Betong dahil makalipas lamang ang ilang sandali, nagbayad na si Alden ng halagang ipinangako sa kanya.
Pasigaw na sabi ni Betong, "Hala, nagbayad na!
"Den, salamat, ha. From the bottom of my heart and my soul, maraming salamat.
"Hindi ko ini-expect na dadaan ka dito. Thank you."