"Tanggapin niyo po ang aplikasyon ko. Ako’y buong loob na tumatakbo bilang pangulo ng bansa."
Ito ang mensahe ni Manila Mayor Isko Moreno nang pormal siyang naghain ng certificate of candidacy bilang presidential candidate sa 2022 elections.
Nagtungo siya sa Commission on Elections sa Sofitel Philippine Plaza Hotel sa Pasay City, bandang 11:30 a.m., ngayong Lunes, October 4.
Kasama ni Isko ang running mate niyang si Dr. Willie Ong. Tatakbo sila sa ilalim ng partidong Aksyon Demokratiko.
Ang desisyon ni Isko na maghain ng kandidatura ngayong araw ay pagbibigay-pugay niya sa pumanaw na Master Showman na si German Moreno, o mas kilala bilang Kuya Germs.
Si Kuya Germs ang mentor ni Isko nang siya ay mapasok sa sikat na youth-oriented show noon na That's Entertainment.
Sa ulat ng CNN Philippines, nagbigay ng mensahe si Isko tungkol sa nararamdaman niya ngayong pormal na siyang sasabak sa 2022 elections.
"Lahat ng politiko pangarap ito, pero hindi ko akalaing aabot ako sa moment na ito," saad ni Isko.
Ayon sa alkalde, nais nilang tutukan ni Dr. Ong ang "paghilom sa bansa, kabuhayan, at kalusugan."
"Sa dami ng sinalihan kong halalan, ngayon ako kabadong-kabado... Pero balewala yung pakiramdam ko sa hirap na pinagdadaanan ng mga kababayan natin," saad ni Isko.
Full support ang maybahay ni Isko na si Diana Lynn Ditan na naroon din sa COMELEC.
Namataan ding pumirma si Isko sa Integrity Pledge standy na nasa venue.
