Muling susubukang masungkit ng Jukebox Queen at kasalukuyang Camarines Sur vice governor na si Imelda Papin ang pinakamataas na posisyon sa lalawigan.
Ngayong araw, October 8, pormal naghain ng kanyang kandidatura si Imelda bilang gobernadora ng Camarines Sur sa ilalim ng Partido Federal ng Pilipinas.
Makakalaban ni Imelda si Luigi Villafuerte, kapatid nina Congressman LRay Villafuerte at incumbent Governor Migz Villafuerte.
Taong 1995, lumaban na rin si Imelda sa pagkagobernador katapat si Luis Villafuerte Sr. Natalo siya sa laban.
SHARIFA AKEEL
Naghain na rin si Miss Asia Pacific International 2018 Sharifa Akeel-Mangudadatu ng kanyang kandidatura sa pagkagobernador sa Sultan Kudarat kahapon, October 7.
Pagbabahagi ni Sharifa sa kanyang post sa Facebook: “This is it! I have formally filed my Certificate of Candidacy as Governor of the province of Sultan Kudarat! Alhamdulillah.
“Today is a great day to celebrate this opportunity to fight for what I believe in, and in what every Sultan Kudarateño deserves. A better chance for a good life!
“Samahan niyo po ako sa aking bagong tatahakin na landas. #SAMasamaParaSaPAGBABAGO”
Tatakbo si Sharifa sa ilalim ng Aksyon Demokratiko na pinamumunuan ni Manila Mayor Isko Moreno, na tatakbo namang pangulo sa 2022 elections.
NIÑA JOSE
Kahapon din ay naghain ng kanyang kandidatura ang dating Pinoy Big Brother :Teen Edition housemate na si Niña Jose.
Tatakbo siyang alkalde sa Bayambang, Pangasinan kahalili ng kanyang asawang si Mayor Cezar Quiambao na magtatapos na ang termino sa susunod na taon.
Sabi ni Niña sa kanyang Facebook post: “Ang puso ko ay para sa Bayambang #NIÑAarotaka”
Hanggang alas-singko ng hapon ngayong araw, October 8, ang deadline ng pagsusumite ng certificate of candidacy (COC) para sa mga nais tumakbo sa halalan sa susunod na taon.