Mukhang totoo ang usap-usapang may mataas at mahalagang posisyon si Willie Revillame sa Advanced Media Broadcasting System Inc. (AMBS) ni former senator at business tycoon Manny Villar.
Kasunod ito ng birong pambubulgar ng brodkaster na si Anthony Taberna sa kaswal na pag-uusap nila ni Willie matapos lumabas ang balitang hanggang February 11, 2022 na lamang ang programa ng TV host sa GMA-7, ang Wowowin.
Magkaibigan at magkababayan sina Anthony at Willie dahil pareho silang mula sa Cabanatuan City, Nueva Ecija.
Sa kanyang Facebook Live noong Linggo, February 6, nagkuwento si Anthony tungkol sa naging usapan nila ni Willie sa telepono.
Bahagi ng kuwento ni Anthony: “Kaya minissage ko si Kuya Wil. Sabi ko, ‘Ano po ba ang balita?'
“Ang message niya sa akin ganito... kabayan ko kasi ito, e, taga-Cabanatuan ‘to si Kuya Wil.
“Sabi niya sa akin, mga kaibigan, magmumuni-muni daw muna siya kung ano ang susunod niyang gagawin dahil mahigit six years na raw siyang nagtatrabaho nang walang pahinga.
“E, tama din naman na walang pahinga. Grabe, walang pahinga.”
Ang tinutukoy ni Anthony ay ang trabaho ni Willie sa kanyang variety-game show sa GMA-7 na Wowowin: Tutok To Win na nagsimula noong 2015.
Dagdag pa niya, “Ngayong balitang-balita po na si Willie Revillame, si Kuya Wil, ay lilipat sa Channel 2, pero hindi sa Channel 2 ng ABS-CBN, kasi yung Channel 2, frequency po 'yan na nakuha ng grupo ni Senator Manny Villar.
“Sa February 14 na ang test broadcast ng AMBS.
“Ang pagkakaalam ko pati radio [frequency] yata, kasama sa nakuha ng mga Villar, e.
"Well, anyway, abangan natin ang susunod na kabanata.”
Ipinagkaloob ng National Telecommunications Communication (NTC) ang dating frequency ng ABS-CBN sa AMBS ni Villar, na siyang pinakamayamang tao ngayon sa Pilipinas. Si Villar ay kilala rin bilang kaalyado ng pamahaalaan ni Pangulong Rodrigo Duterte.
Read: Richest Pinoy Manny Villar takes over ABS-CBN channels: A Timeline
Kasunod nito ay nagbiro si Anthony na baka raw pinipirata siya ni Willie sa kanilang usapan.
“E, natawa ako dito kay Kuya Wil, e, mukhang pipiratahin pa ako.
"Mga bossing ko sa DZRH, ha, gusto ko lang ikuwento ito, ang message sa akin ni Kuya Wil kaagad, ‘Hanggang kailan ba ang kontrata niyo sa DZRH?’
“Kukunin pa yata ako!” natatawa niyang kuwento.
Gaya ni Willie, pareho ring galing sa ABS-CBN si Anthony.
Pumirma si Anthony at ka-tandem na si Gerry Baja sa DZRH noong August 20, 2020.
Ayon pa sa ilang balita, mukhang makakaray ni Willie ang best friend na si John Estrada at Aga Muhlach sa AMBS.