Pinalagan ni Maymay Entrata ang isang video upload sa YouTube kung saan tinawag na “peke” ang kanyang foreigner boyfriend.
Sa kanyang Twitter account ngayong Martes, February 22, 2022, tinuligsa ng Big Winner ng Pinoy Big Brother: Lucky 7 ang mapanirang post.
Nakalagay sa caption ng YouTube video (published as is): “it’s confirm! Jowang nireveal ni Maymay Entrata it’s a FAKE pala?...”
Ayon sa Kapamilya star, false information ito na mapanira sa ibang tao.
Banta pa niya, kapag hindi binura ng uploader ang nasabing video ay baka umabot sila hanggang sa korte.
Buong post ni Maymay: “!!FAKE NEWS!! Kapag di nyo po buburahin at patuloy nyo pong pag s-spread ng false information para manira ng buhay ng ibang tao, wag nyo na po sanang hintayin na aabot tayo sa husgado. Maraming salamat po.”
Ipinost din ito ni Maymay sa kanyang Instagram Story.
Makalipas ang ilang oras, burado na sa YouTube ang nasabing video.
Noong nakaraang Valentine’s Day, February 14, ipinost ni Maymay ang larawan nila ng nobyo sa Instagram.
Kuha ang litrato sa Canada kunsaan nagbakasyon si Maymay.
"Happy Birthday my Valentino," simpleng caption niya sa hugging photo nila ng boyfriend.
View this post on Instagram
Magkayakap sila sa litrato kaya malinaw na espesyal ang relasyon ng dalawa.
Noong January 31, unang ipinahiwatig ni Maymay na "Aaron" ang pangalan ng kanyang nobyo.
Hanggang ngayon ay hindi pa ipinakikilala nang lubos ni Maymay ang katauhan ng boyfriend sa publiko.