Nangatuwiran si Dawn Chang, 33, matapos akusahang “sawsawera” kasunod ng kanyang post tungkol sa domestic violence sa mga kababaihan.
Noong Biyernes, March 18, 2022, nag-post ang Kapamilya dancer-TV personality ukol sa domestic abuse sa mga babae.
Walang tinukoy si Dawn kung ano ang kanyang pinanggagalingan, pero ipinost niya ito sa kasagsagan ng balitang pananakit diumano ng aktor na si Kit Thompson sa girlfriend nitong si Ana Jalandoni.
Makahulugan niyang mensahe: “No woman deserves violence or any form of abuse from their partner. May it be physical, financial, emotional or even sexual abuse.
“Be brave enough to leave the relationship but be strong for the aftershock because the abuse sometimes continues even after leaving the relationship.”
Ginamit din niya ang hashtags na #NoToViolence, #NoToAbuse.
Nagsunud-sunod na ang batikos na ibinato ng netizens kay Dawn.
Ilan sa mga ipinukol sa kanyang salita ay “epal,” “papansin ng taon,” at “sawsawerang starlet.”
Sinagot ni Dawn ang isang basher na tinawag siyang “sawsaw suka.”
Malinaw na sinisita ng female netizen si Dawn dahil sumasawsaw na naman daw ito sa isyu.
Komento ng netizen (published as is): “Ayan na naman sya sawsaw suka…. Kahit lalaki hndi din deserve and any form of violence.”
Hindi naman ito kinontra ni Dawn, bagkus sinang-ayunan pa ang netizen.
Pero iginiit niya ang pagkontra sa karahasan laban sa mga kababaihan pagdating sa relasyon.
Sagot ni Dawn: “Tama ka no one including men deserves violence."
Sabi pa niya sa netizen: "Sana hindi mo nararanasan yan ngayon. Sana hindi rin maranasan ng anak mo pag laki nya.
“Kaya please guide your daughter well because one day she will love hard and she will give her all.”
DAWN CHANG'S POST AGAINST TONI GONZAGA
Si Dawn ay kilala sa paghahayag ng kanyang opinyon sa social media.
Noon lamang February 2022, nadawit siya sa kontrobersiya matapos niyang mag-post ng pagkondena kay Toni Gonzaga kaugnay ng political affiliation nito.
Diretsang sinabi ni Dawn na "deeply insulted and disappointed by the actions" ni Toni, ukol sa pagpanig nito kay presidential candidate Ferdinand Marcos Jr.
Sa isang political rally ay todo-promote pa si Toni kay Representative Rodante Marcoleta.
Isa si Marcoleta sa 70 congressmen na bumoto para ibasura ang franchise renewal ng ABS-CBN, ang home network nina Toni at Dawn.
Samantala, si Dawn ay vocal din sa pagiging feminist at nagpo-post pagdating sa pagsusulong ng mga karapatan ng mga babae.