Pasabog ang pagdalo ni Rufa Mae Quinto sa hiwalay na campaign rally nina presidential aspirants Ferdinand Marcos Jr. at Manny Pacquiao.
Hindi inasahan ng netizens na dalawang kandidato ang waring sinusuportahan ng sexy comedienne na kilala sa kanyang comic lines na "Go! Go! Go!" at "Todo na 'to!"
RUFA MAE AT UNITEAM CAMPAIGN RALLY
Noong March 29, 2022, unang nakita si Rufa Mae na nag-perform sa kampanya ng UniTeam, ang partidong pinangungunahan ni Marcos Jr.
Ginanap iyon sa Summit Center ng Unibersidad de Zamboanga sa Zamboanga.
Nag-trend ang pangalan ni Rufa Mae sa Twitter noong araw na iyon, pero hati ang reaksiyon ng netizens.
Marami sa supporters ni Marcos Jr. ang natuwa sa pagpapakuwela ni Rufa Mae sa kampanya ng UniTeam.
Pero inis naman ang netizens na hindi pabor sa sinuportahan niyang kandidato.
RUFA MAE AT MANNY PACQUIAO'S CAMPAIGN RALLY
Pero hindi lang pala ang UniTeam rally ang dinaluhan ni Rufa Mae.
Nag-perform din siya sa campaign rally ni Pacquiao sa Dumaguete noong April 2, 2022.
Kalat ang video kunsaan nag-perform siya ng "Firework" ni Katy Perry, pati na ang pag-endorso niya kay Pacquiao para sa pagkapresidente sa May 9 elections.
Ikinalito ng netizens ang anila'y "plot twist" sa kung sino ang ineendorsong kandidato ni Rufa Mae.
Biro naman ng iba, "Todo Na To Presidential Tour" ang ginawa ni Rufa Mae.
Hindi na raw sila magugulat kung pati campaign rally ng iba pang presidentiables ay puntahan ng sexy comedienne.
May mga nagsabi pang tila "hustling" o todo-kayod ang dating ni Rufa Mae sa pagdalo sa kampanya ng dalawang magkaribal na presidentiable.
Hindi naman malinaw kung boluntaryo o kinuhang talent si Rufa Mae sa mga okasyong ito.
