Na-resurrect ang isyu na mandatory drug testing sa mga artista matapos maaresto ang aktor na si Dominic Roco sa drug buy-bust operation noong Oktubre 1 2022, Sabado.
Read: Dominic Roco kasama sa limang arestado sa drug buy-bust operation sa Quezon City
Noong Oktubre 5, Miyerkules, ay nauna nang magpa-drug test si Senador Robinhood Padilla sa PDEA. Negatibo ang resulta.
Nag-post kapagkuwan sa Facebook si Inday Garutay, “I remember nung nasa malalaking comedy bar pa ako nag-suggest ako sa bar owner ng Mandatory drug testing sa lahat ng entertainer.
“Biglang nagalit sa akin yung karamihan ng mga Stand Up Comedian na kasama ko, Hanggang sa unti unti na nila akong pinagkakaisahan.
“Sorry ha hindi ko talaga pwedeng tawagin magaling ang isang comedyante pag Kargado, Kesehoda mga big names pa kayo ngayon.”
Sa 50th birthday party ng showbiz writer na si Allan Diones noong Oktubre 8, Sabado ng gabi, sa Valencia Events Place, Quezon City, inusisa ng PEP ang ilang artista sa kanilang salooban kaugnay sa usapin ng mandatory drug testing.
Dapat bang huwag bigyan ng trabaho ang isang artist kung hindi ito sasailalim sa drug testing?
ALI SOTTO
Pahayag ni Ali Sotto, “Kasi ang rationale nila, iniidolo daw kasi ang mga artista. Hindi naman lahat ng artista, iniiodolo.”
Hindi pabor si Ali sa nasabing panukala.
Pagmamatuwid ni Ali, “Why just the celebrities? Bakit artista lang, di ba?!
“Don’t single them out. At saka ang influencers ngayon ng kabataan, hindi na artista lang. Number one, hindi lahat ng artista, iniidolo ng kabataan.
“Number two, hindi lang artista ang iniidolo. Ang socmed, marami nang influencers ngayon.
“Kaya ang dapat, yung mga magulang… tingnan mo, sino ang pinipili ng anak mo na influencer, di ba?
“Yung mandatory drug testing and just singling out artists, actors and actresses? No, cannot be!”
Sina Ali at Pat-P Daza ang hosts ng TV program na Ano Sa Palagay N’yo? (ASPN) mula Lunes hanggang Biyernes, 8:00-10:00 a.m. sa NET 25.
ARMAN FERRER
Pananalig ng theater actor at mang-aawit na si Arman Ferrer, “Maganda rin yun para healthy living pero kung merong ganun sa artists, dapat may check din sa pulitika, di ba? I-check ang lahat.
“Kumbaga, kung iche-check ang artists, dapat ding i-check ang public officials. Yung lahat, basta across the board, di ba?
“Sana lang, kung maghihigpit sila sa mga artist… dapat maghigpit na sila sa lahat, di ba? Kasi bakit nila inaano yung mga artist?
“So parang may sinasabi ba sila na pag artist, didiretso sa drug? Hindi naman ganun. Huwag naman nating i-single out yung mga artist.
“Kasi, pare-pare naman tayong nagtatrabaho. Pare-pareho tayong kumukuha ng living. So huwag nating istriktuhan yung mga artist.”
Sa experience niya bilang artist sa theater at music industry, prevalent ba ang prohibited drugs sa mga nakakasalamuha niya?
“Sa amin, hindi. Sa circle of friends ko, wala naman sa amin na drug user. Walang drug abuser. So far, OK naman,” tugon ni Arman.
Tampok si Arman sa concert na Triple Threats: All Of Me sa Nobyembre 18 ng 7:30 p.m. sa Tanghalang Ignacio Gimenez (CCP Black Box Theater).
KYCH MINEMOTO
Tila alingawngaw ng paniniwala ni Arman Ferrer ang pananaw ni Kych Minemoto.
Ayon kay Kych, “Siguro, for me, feeling ko… discrimination siya sa industry. Siguro kung gagawin natin ito, siguro umpisahan din natin sa government natin.
“Kasi, kung tayo naapektuhan, sila rin naman. Tao rin naman sila, and pare-parehas lang tayo na gustong magtrabaho. Iwasan natin na mag-discrimination.”
Exposed ba siya sa mga kasamahan sa showbiz industry na tumitikim o gumagamit ng bawal na gamot?
“Feeling ko kasi, sa industry, hindi naman po natin maiiwasan iyan, di ba? Andiyan na po iyan,” sambit ni Kych.
“Pero lumilipas ang mga oras, naggu-grow tayo as a person. Nao-overcome natin ang mga ganung bagay.”
Si Kych ang bidang lalaki na pag-aagawan o pagsasaluhan nina Andrea del Rosario at Gold Aceron sa pelikulang May-December-January na palabas sa local cinemas umpisa Oktubre 12, Miyerkules.
JAK ROBERTO
Lahad ni Jak Roberto, “Kung ano po ang ikakaganda ng sistema, bahala na po. Basta po ako, sumusunod lang po ako sa government kung ano man po ang ipapatupad.”
Wala raw ipag-aalala si Jak sakaling i-drug test siya dahil maalaga siya sa katawan, ganundin ang kasintahan niyang si Barbie Forteza.
“Healthy lang dapat,” pakli ni Jak.
RICKY DAVAO
Pro-choice ang actor-director na si Ricky Davao.
Paliwanag ni Ricky, “Mas gusto ko na choice ko. Kung ayaw, sana huwag pilitin. Kasi may mga talagang ayaw. Bakit mo pipilitin?
“Ang malaking problema lang dun… halimbawa, ayaw mong magpa-vaccine.
“Pag ayaw mong magpa-vaccine, there are establishments na bawal ang hindi vaccinated.
“So choice mo yun, kung ayaw mong magpaano e di ka papasok diyan. Kung ayaw mong magpa-vaccine, huwag kang magtrabaho dito dahil right naman yun ng employer, o ng establishment.
“Pero yung pipilitin mo talaga sila, hindi OK.”
Parallel sa drug testing, hindi raw kukunin sa TV o pelikula ang artista kapag hindi nagpa-test? “Yun ang ano dun. So choice mo yun, di ba?”
LANI MERCADO
Sa tingin ni Congresswoman Lani Mercado, “Huwag mag-zero in sa mga artista. Mandatory drug testing is being done already pag kukuha ka ng lisensya.
“Actually pag kakandidato ka nga, di ba? Kailangan mag-mandatory drug testing. Nag-a-apply ng trabaho.
“It should be the prerogative now of the movie outfit, or the broadcast company, or the producers of the broadcast channel. Nasa kanila na yun.
“Yun nga lang, it’s very sad na eto na naman, nagsi-zero in na naman sa mga artista.
“So, talagang dapat, tayo rin naman as responsible showbiz personalities, let’s do our obligation to be role models. Ganun ang buhay, e.”
Naka-recess ngayon ang Congress, kaya hindi pa batid ni Lani kung anu-anong partikular na bills ang ipa-file kaugnay rito.
“So far naman, everything is in place, e,” pakli niya.