Tila ang higpit-higpit ng Movie and Television Review and Classification Board (MTRCB) these days.
“Para sa akin, noon ko pa inilalaban, dapat walang ganyan na!” bulalas ni Direk Joel Lamangan sa last day ng lamay kay Manay Ethel Ramos nitong Setyembre 13, 2023, Miyerkules, sa Nacional Chapels & Crematory, G. Araneta Avenue, Quezon City.
“Wala nang MTRCB! Dyusko! Ibigay na sa mga industry ang karapatan na i-police nila ang sarili nila.
“I’m against censorship. Being a director, I’m really against it.”
Dating board member ng MTRCB si Direk Joel, pero hindi siya naniniwala sa MTRCB.
“Classification is correct pero dapat strict sa classification,” pagmamatuwid ng multi-awarded director, who’s turning 69 years old on September 21, Thursday.
“Hindi yung paganun-ganun, paganun-ganun, hindi puwede ito, paganun-ganun.”
SETTLING ISSUE WITH BOSS VIC
Sa recent movies na tinapos niya, meron bang ka-censor-censor o posibleng ma-X
Mabilis na tugon ni Direk Joel, “Ay, wala! Hindi naman ako nagbi-Vivamax!”
Bakit naman? Marami-rami rin siyang pelikulang streaming sa Vivamax. Nami-miss na ng iba iyong tatak-Joel Lamangan sa Vivamax.
“Ay! Hindi na ako! Hindi na raw ako puwedeng mag-Vivamax. Puwede ako sa Viva One,” pagngiti ni Direk Joel.
Kailan siya gagawa para sa pampamilyang streaming platform na Viva One?
“Soon! Meron akong gagawin sa Viva One.”
Sigurado ba iyan?
“Yes!!! Sinabi sa akin ni Boss Vic!”
Nagkausap na sila ng big boss ng Viva na si Vic del Rosario? Galit ito sa kanya, di ba?
Read: Joel Lamangan, naglabas ng saloobin hinggil sa isyu nila ng Viva
Masayang sagot ni Direk Joel, “Bati na kami! Ha! Ha! Ha! Ha! Bati na kami! Hindi naman daw niya ako inaway.
“Mahal daw niya ako! Mahal ko rin siya! Ha! Ha! Ha! Last week lang kami nagkausap! Ha! Ha! Ha! Ha!
“Kaya gagawa na ako sa Viva One!”
Dahil bati na sila ni Boss Vic, puwedeng gumawa uli siya ng pelikula o serye para sa Vivamax!
Umiling si Direk Joel, “Ayoko ng k*nt*t*n nang k*nt*t*n lang. Ayoko na, napakahirap gawin nun. Kawawa ang mga bata.”
Sabi-sabi, OK lang sa mga baguhang artista ng Vivamax ang maghubad, kaya more and more ang pumapasok dito? Gusto nila para makilala sila…
Pagkontra ni Direk Joel, “Ay! Hindi sila ang may gusto nun. Ang pangangailangan ng pera… hindi!”
'APO HAPON'
Kumusta ang pelikulang Apo Hapon? Inulan sila sa shooting sa Benguet!
“Wait! Titila, bubuhos ng malakas, wait! Titila nga, ganun,” saad ni Direk Joel.
“Pero eight days talaga ang shooting namin. Natapos ko!”
Kumusta ang Haponesang bida na si Sakura Akiyoshi, pati si Fumiya Sankai ng Pinoy Big Brother? E, si Lianne Valentin na idinirek niya before sa remake ng Valiente (Pebrero-Hunyo 2012).
Read: Japanese actress Sakura Akiyoshi, "sobrang takot" kay Direk Joel Lamangan
“Okey sila. Sakura is very good! I was shocked, mahusay siya!” sambit ni Direk Joel.
“Mahusay rin si Lianne na naging artista ko na nung bata pa siya. Ngayon, magandang bata, mahusay! Napakusay niya.
“Kumustahin mo ang Ang Ina Mo?”
Bagong Insiang (1979) ba iyang Ang Ina Mo nina Lotlot de Leon, Charlie Dizon, at Rico Barrera?
“May pagkaganun. Lotlot at Charlie Dizon, mahusay silang dalawa!” palatak ni Direk Joel.
“Mahusay. Laban silang dalawa! Ang galing ni Lotlot. Hindi nagpahuli si Charlie, lumalaban! Diyos ko!”
Personal choice ni Direk Joel si Charlie sa Ang Ina Mo. Napanood kasi niya ito sa Fan Girl (2020), at bumilib siya rito.
RHODA IN 'BATANG QUIAPO'
Matapos masaksak nang uling ulit ang karakter niyang si Rhoda sa FPJ’s Batang Quiapo, akala ni Direk Joel ay babu na siya sa teleserye ni Coco Martin.
Read: Direk Joel Lamangan, agaw-eksena bilang mahaderang Rhoda sa FPJ's Batang Quiapo
“Akala ko nga, namamatay na ako. Hindi pa ako namatay. Sinaksak-saksak na ako, buhay pa ako!” pagkukuwento ni Direk Joel sa karakter niyang si Roda na ubod ng matapobre.
“Nanakawa ako at nasunog ang buong bahay ko. Tapos yung bahay ni Pen Medina, di ba, nakasanla sa akin? Dun ako tumira, nasa squatter na rin ako.
“Tapos dumating si Pen, dinutsi-dutsi ako! Inaway-away ako. Crayola ako kasi mahirap na ako, inaway-away pa ako ni Pen.
“Tinapon lahat ng gamit ko. Kanya raw iyon.”
Sabi ng iba, wala raw bago sa FPJ’s Batang Quiapo. Parang rehash daw ng FPJ’s Ang Probinsyano. Lumang estilo, sabi ng iba.
Tumikwas ang kilay ni Direk Joel, “Sabihin nila sa napakadaming nanonood — top rating show iyon! Dun nila sabihin! Ha! Ha! Ha! Ha!
“Top rating! Napaka-top rating sa lahat!”