Naging "third party" ang career ni Phoebe Walker sa relasyon nila ng kanyang ex-boyfriend.
Ito ang inamin ng aktres, na ikinuwentong nag-break sila ng ex-boyfriend habang nagsu-shoot siya para sa pelikulang Buy Bust Queen.
Aniya sa panayam ng PEP.ph (Philippine Entertainment Portal), "Hindi kasi fully na-support yung ano ko, my career.
“This was like the turning point in our, in my past relationship.”
Bagamat noong una ay hesitant siyang magkuwento, ibinahagi ni Phoebe na mas ipinaglaban niya ang kanyang career kaysa sa ex-boyfriend.
"Of course,“ bulalas ni Phoebe.
“Kasi everybody I meet knows naman that I’m an actress and that’s my priority.
"I’ve been acting for so long, more than ten years na. So kailangan talaga supportive yung boyfriend at naiintindihan yung trabaho.”
Read: Phoebe Walker, tinanggihan ang isang international film dahil sa nudity
Ano ang hindi matanggap ng naturang ex-boyfriend sa career ni Phoebe?
“Hindi nakayanan ang mga, siyempre nagla-love scenes ako before, mga onscreen partners, pa-sexy, ayaw niya.
"So iyon, medyo naging mahirap lang kasi feeling ko kailangan kong itago ang mga ganito.
"But then dahil naging bida ako, nagkaroon ako ng love triangle, so iyon yung parang naging last straw sa kanya."
Ka-love triangle ni Phoebe sa Buy Bust Queen sina Ervic Vijandre at Alex Medina.
“Ito mismo, dito kami nag-break,” pagtukoy pa ni Phoebe sa Buy Bust Queen, na isang action-drama kaya wala siyang ni isang love scene dito.
Gayunpaman, ayon kay Phoebe ay nagselos pa rin ang ex niya.
“Very seloso yung guy,” sabi ng aktres.
“But it’s okay, happy na po ako, you know, may reason naman iyan lahat.”
Taong 2021 nag-shoot si Phoebe para sa pelikula, at ito rin ang taon na nag-break sila ng dati niyang kasintahan.
PHOEBE'S personal transition while shooting movie
Ang pakikipag-break sa ex-boyfriend ang tinutukoy ni Phoebe na "transition" na kanyang pinagdaanan.
Sabi ng aktres sa panel interview, “Personally, during itong filming na ito, I was going through a transition phase din.
"So talagang nagpatung-patong yung pressure sa akin in the midst of filming this.”
Paglalahad pa niya, “It’s personal, I was going through something in my relationship at the time, so it was during this production, so iyon.
“During this time, 2021, we… nag-ano kami, we broke up during this production. So iyon, a lot happened kasi, bigla akong nagkaroon ng love triangle here with my co-actors na hindi napaalam, ganun."
Nagamit naman daw niya ang pinagdaanan para lalong pagbutihan ang kanyang role na naka-base sa totoong Buy Bust Queen na si Director III Charlene Magdurulang, isang dating PDEA female agent na ngayon ay Regional Director of PDEA Region 13 CARAGA.
Ani Phoebe, “So parang naging issue siya, so I really took it out in my role, this is a very important role talaga in terms of my personal life din.
"Kasi tatawagin ako ng direktor, umiiyak pa ako, ‘Direk wait lang po,’ you know.
"So sobrang internalize ko ang mga action scenes ko and it got me through it, and I’m happy now, everything happens for a reason.”
Dahil dito ay memorable ang pelikulang Buy Bust Queen para kay Phoebe.
“Naging matibay ako dito. Not only physically but also emotionally.”
Ginanap ang premiere ng Buy Bust Queen noong Pebrero 27, 2024, sa Cinema 3 ng Gateway Mall sa Cubao, Quezon City.
Palabas na ngayon sa mga sinehan ang Buy Bust Queen, na mula sa Pinoyflix Films and Entertainment Production sa kooperasyon ng Philippine Drug Enforcement Agency (PDEA) at sa direksyon ni JR Olinares na siya ring line at supervising producer ng pelikula na ang executive producer ay si Zaldy Lumacang.
May special participation sa movie si former PDEA Director General Wilkins Villanueva (as himself).
new relationship
Samantala, ang boyfriend ngayon ni Phoebe ay si Rico Robles na isang actor/DJ at former housemate sa Pinoy Big Brother Celebrity Edition (2006).
Read: DJ Rico Robles, actress Phoebe Walker now in a relationship
Mag-iisang taon at kalahati na silang magkarelasyon.
Ang kuwento pa ng dalaga, “Nagkakilala kami sa gym and you know, parehas kaming in a relationship at that time. And then sabay kaming naging single and you know mabait naman siya.
“And iyon rin yung gusto ko, pareho kaming nasa industry so naiintindihan niya yung requirements ng trabaho ko kaya mas ano ngayon, mas harmonious, happy relationship,” ang nakangiting wika pa ni Phoebe.
In-acknowledge pa ni Phoebe si Rico na dumalo sa premiere ng pelikula ng aktres.
Wala na raw siyang balita o komunikasyon sa dati niyang karelasyon non-showbiz guy.
Samantala, kasama rin sa pelikula sina Ritz Azul, Maxine Medina, Ellaine Ochoa, Cheng Alessa, Ameera Johara, Ayeesha Cervantes, at Jeffrey Santos, at sina Christian Vazquez, Jeric Raval Jeffrey Santos, Dindo Arroyo, Ping Medina, at Ricardo Cepeda.
Ang cinematographer ng pelikula ay sina Jimboy Signo and Rico Jacinto, screenplay ni Lawrence Nicodemus, editing at visual effects ng Outpost Frontier and Cre8Team Multimedia, production manager ay si Rochelle Fermano, at ang assistant director ay si Ambo Junicto.