Excited si Ruby Ruiz na mapanood ang remastered version ng Bona (MMFF 1980) na closing film ng Cinemalaya Bente: Loob Lalim Lakas.
Ang Bona ay pinagbidahan ng National Artist na si Nora Aunor, sa direksiyon ng National Artist na si Lino Brocka (1939-1991).
Ipapalabas ang Bona sa Agosto 10, Sabado ng 8:30 P.M. sa Cinema 2, 9, 8 and 10 ng Ayala Malls Manila Bay.
Read: Cinemalaya XX top best actress contenders: Marian, Mylene, Jane
RUBY RUIZ ON SHOOTING BONA WITH NATIONAL ARTISTS NORA AUNOR AND LINO BROCKA
Iyon ang unang pelikula ni Ruby. Gumanap siya roon bilang nakababatang kapatid ni Nora aka Ate Guy, ang Superstar ng local showbiz.
“Kasi si Lino Brocka, siya ang executive director namin that time sa PETA,” kuwento ni Ruby sa birthday party ni Direk Brillante Mendoza noong Hulyo 30, Martes ng gabi, sa Secret Garden, Barangka Drive, Mandaluyong City.
Ang PETA na tinutukoy ni Ruby ay ang Philippine Educational Theater Association, na ang theater center ngayon ay nasa Eymard Drive, New Manila, Quezon City.
Pagpapatuloy ni Ruby, “So, nung company call, sabi niya, ‘O, sino ang gusto ng extra allowance?’ Mga estudyante kami, so magre-raise ka ng hand.
“Pero ako, hinand pick niya, ‘Ay! Wait lang! Parang may hawig ito, puwede, puwede! Puwede ito, may hawig kay Ate Guy!’
“Younger sister ni Ate Guy ang role. Dalawang eksena lang ako. Bilang na bilang ko.”
Read: Ruby Ruiz, next Pinay international star kasunod ni Dolly de Leon?
Ang bayad sa kanya sa Bona, PHP350 para sa isang araw.
“Ang laki nun! Two days, naka-PHP700 ako. E, ang baon ko lang noon, PHP25 a day. Ang laki na ng PHP700!” pagbabalik-tanaw ni Ruby.
“College na ako noon. O, e, di parang siyempre, Nora Aunor daw ang makakaeksena. Sa burol, OK.
“Namatay ang tatay, lalayas siya, di ba? Pasaway ang ate. Ang linya ko, hindi ko na maalala, ha, kung na-edit out pero parang hindi.
“Dun sa original, hindi, ha. Pero ewan ko ngayon sa restored.
“Pipigilin ko siya. Parang, ‘Ate!’ Ganun, something like that.
“Iisang linya, call time ko, 7:00 A.M. Siyempre habang sinasabi ko yun, kailangan crayola dahil namatayan kami.
“Call time ko, 7:00 A.M.; pinag-breakfast kami, 7:30. Tapos, mga 8:00 o’clock, nandun ako sa isang sulok.
“Si Mama Lino… hindi ko alam kung sino ang PD noon, kung si Joey Luna ba o whoever, kung sino ang production designer ng Bona.
“Nag-iikot siya [Lino] dun sa bahay, ‘O, dito ilagay nyo yung ganito, ganito, ganito,’ ganyan. Alam mo naman si Lino, parang hands on sa lahat.
“Pagpunta nila sa isang kuwarto, sa isang sulok… nakita niya ako, nasa isang sulok. ‘Uy! Sino ‘to?!’
“Paglingon kong ganyan, ‘O, Ruby, anong ginagawa mo?’ ‘Nag-i-internalize po.’ ‘Gagah! Mamayang alas siete o alas otso ng gabi pa kukunan ang eksena mo!’”
Read: Nora Aunor, wala sa special screening ng Bona sa Cannes
RUBY RUIZ ON DOING A SCENE WITH NORA AUNOR
Na-intimidate ba siya na si Nora ang makakaeksena niya?
“Hindi. Kasi, pinalaki kami sa PETA na makapal ang mukha, e,” kaswal na tugon ni Ruby.
“Pero kailangan, hindi ka ma-intimidate kung prepared ka. Kaya nga alas siete pa lang ng umaga, nag-aano na ako, di ba?
“Hindi pa uso yung karga-karga noon.”
Take 1 noon si Ruby sa eksena with Nora?
“Opo. Hindi ka puwedeng maging cause of ano pag si Lino Brocka ang direktor.”
Todo-iyak si Ruby nang pumanaw si Lino noong Mayo 22, 1991.
“Iyak ako nang iyak noon. Hu! Hu! Hu! Hu! Lahat kami,” pagbabalik-tanaw ni Ruby.
“May mga pinag-promise-an niya, ‘Ibi-build up ko kayo!’ Yun ang iniiyak namin. ‘Paano na, nategi?!’ ‘Kailangan mabuhay si Mama!’
“Kulang na lang, pumunta kami sa East Avenue din.”
Sa East Avenue, Quezon City naaksidente si Direk Lino, kasama si William Lorenzo. Isinugod si Direk Lino sa East Avenue Medical Center.
Read: Showbiz History: The great Lino Brocka questions MMFF 1977 winners; walks out in protest
LIFE AFTER LINO BROCKA'S DEATH
Paano siya naka-move on sa pagpanaw ni Direk Lino?
“After nun, wala na…”
Pinangarap niyang maging sikat na artista?
“No, hindi sikat. Yung parang makikilala as good actors. Kasi yun lang naman ang pangarap ng mga taga-teatro, e,” pagtatapat ni Ruby.
“Parang alam naman namin yung look… yung parang limitation… noon kasi, sikat, Hilda Koronel. Idol namin yan.
“So, kailangan maputi ka, mestisa. E, lahat yon, parang hindi kami nagpo-fall dun.
“Pero gusto naming makilala na good actors.”
Kasama rin si Ruby sa Cinemalaya XX entry na The Hearing, kung saan tampok sina Mylene Dizon, Nor Domingo, Ina Feleo, Enzo Osorio, Angie Castrence, Marvin Yap, Rom Factolerin, Rome Mallari, at Ruslan Jacob Asumbrado, sa direksiyon ni Lawrence Fajardo.
Excited din siyempreng magsyuting si Ruby sa MMFF 2024 entry na The Kingdom, starring Vic Sotto, Piolo Pascual, Sid Lucero, Sue Ramirez, and Cristine Reyes, sa direksiyon ni Michael Tuviera.
Nang ipabatid kay Ruby na may in-offer sa kanyang role sa The Kingdom, ang tanong lang niya ay kung may eksena ba na kasama niya si Piolo.
Nang sabihing oo, agad-agad na tinanggap niya ang proyekto.
Read: MMFF 2024: May mga nagbabalik at may mga bagong kumbinasyon