Malaki ang pasasalamat ni Bryan Brazil sa mga namamahala ng QCinema International Film Festival 2024 (QCinema) dahil naipalabas sa sinehan ang kanyang documentary na Lost Sabungeros.
Nakapanayam ng PEP.ph (Philippine Entertainment Portal) ang direktor sa premiere night noong Sabado, November 9, 2024, sa Gateway, Cubao, Quezon City.
Matatandaang kasama dapat sa Cinemalaya Film Festival noong August ang Lost Sabungeros, ngunit hindi ito ipinalabas dahil umano sa ilang “security concerns.”
Read: Docu film Lost Sabungeros, kanselado ang screening sa Cinemalaya
“Masaya naman, finally naere na namin yung pelikula na matagal na naming ginawa, and hoping na mas marami pang makapanood sa mga susunod na araw,” sagot ni Direk Bryan nang tanungin siya tungkol sa fully-packed screening.
Well-attended ang premiere night na dinaluhan ng mga kasamahan ni Bryan sa GMA Pictures at GMA Public Affairs, na nag-produce ng pelikula.
Kasama sa mga nanood sina Jessica Soho, Atom Araullo, Emil Sumangil, Ricky Lee, at Quezon City Mayor Joy Belmonte.
“Sobrang thankful kami sa kanila. Sinamahan nila kami sa journey. Hindi sila nagdalawang-isip. Actually tinatanong ko nga sila kung final answer na ba ito? Wala na itong bitawan. So yun, na-appreciate namin itong QCinema,” dagdag ni Direk Bryan.
Read: Lost Sabungeros premieres in QCinema International Filmfest
Dumalo rin ang ilang karakter sa documentary, na mga kamag-anak ng ilan sa mga dinukot na sabungero.
THE MAKING OF LOST SABUNGEROS
Ang documentary ay tungkol sa buhay ng mga kamag-anak ng higit sa 30 sabungero na nawala mula 2021 hanggang 2022.
Sinubukan nitong alamin kung ano ang nangyari sa mga hindi pa rin nahahanap na mga biktima.
Sabi Direk Bryan tungkol sa mga nakausap na kamag-anak, “Sila mismo, masasabi nila yung mga pinagdadaanan nila.
"Mas personal yung pagkukuwento kasi sila mismo naman talaga yung nakakaranas at lumalaban para sa hustisya."
Malalaking tao umano ang nasa likod ng pagdukot sa mga biktima.
Ayon pa kay Direk Bryan at sa mga kasama niya sa pelikula, malaking bagay na nakahanap sila ng ilang mga whistleblowers na pumayag humarap sa camera at magkuwento tungkol sa kanilang nalalaman.
“Siyempre may takot naman pong nararamdaman, pero sineryoso po namin.
"May mga usapan po kami, may mga precautions, mga dapat gawin anuman ang mangyari," saad niya.
Bukod sa takod, nakarandam din sila ng frustrations.
Aniya, “Kasi napansin niyo ba, lahat ng efforts ginawa na namin. Lahat ng mga authorities na-exhaust na for possible leads and justice. Ang dami na naming nilapitan dun.
"Pero sa dulo, parang wala na kaming mapiga. Sobrang hirap lalo na kapag binubuo na namin yung kuwento.
"Siyempre gusto namin ng solid na kuwento, pero ang dami naming balakid para doon.”
BRYAN BRAZIL'S NEXT STEPS
Pero hindi ito pipigil sa kanya para sumuong ulit sa isa pang documentary.
Mayroon na nga raw siyang naisip na topic.
Sa ngayon, patuloy pa rin ang paghahanap nila ng paraan para maipalabas ang Lost Sabungeros.
Maaari nga raw na sa mga paaralan ang susunod na screening.
“May mga schools na lumapit sa amin. Natutuwa kami kasi may mga students, tinap nila kami para dalhin yung pelikula sa schools nila para mapanood nila personally.
"Yung gesture na yun, sobrang na-touch ako. Kasi yung mga kabataan natin may pakialam sila sa mga nangyayari sa paligid. It’s a good sign,” pahayag ni Direk Bryan.
Sa November 12 ang susunod na screening ng Lost Sabungeros sa QCinema. Ipapalabas ito sa Cinema 15 ng Gateway Cineplex 18 sa Cubao, Quezon City.