Cited for contempt ang contractor na si Pacifico "Curlee" Discaya III at si dating DPWH Bulacan District Engineer Henry Alcantara dahil sa pagsisinungaling nila sa pagpapatuloy ng pagdinig ng Senate Blue Ribbon Committee sa maanomalyang flood control projects, Huwebes, Setyembre 18, 2025.
Ide-detain at mananatili sina Discaya at Alcantara sa kustodiya ng Senado at ng Office of the Senate Sergeant-at-Arms dahil sa hindi nila pagsasabi ng katotohanan.
Read: Maine Mendoza: Arjo Atayde not capable of stealing people's money
CURLEE discaya
Tinawag ni Senator Erwin Tulfo na "sinungaling" si Curlee Discaya nang sabihin ng contractor na hindi nakadalo sa pagdinig ang kanyang asawang si Sarah ngayong araw dahil sa mga karamdaman nito sa puso, hypertension, at diabetes.
Pero iba ang nakasaad na dahilan ni Sarah sa pinadala nitong "excuse letter" na may petsang Setyembre 17, at binasa ni Senate Blue Ribbon Chairperson Senator Panfilo Lacson.
Bahagi ng sulat ni Sarah: “Regrettably, I have an important meeting with my employees on the day of the hearing to explain the problem that the company is facing now and the effects this has on them.
"This meeting was already scheduled before I received the Honorable Committee’s invitation this late afternoon and some of my employees will be coming from various places, thus, I can no longer cancel the meeting set for tomorrow.”
Ikinagalit ng mga senador ang alibi ni Curlee, at hindi nakapagpigil si Senator Tulfo.
Paninita ni Tulfo kay Curlee: “Nanumpa ito to tell the truth and dito, harap-harapang nagsinungaling ka!
"Binabastos mo kami! Niloloko mo kami!
"Huwag mo kaming lokohin because the chairman has the power to cite you in contempt. Do not do that!
“Iba yung sinasabi mo. May medical condition. Kung may medical condition, sige nga, bigyan mo nga kami ng medical certificate.
"Iba yung sinasabi mismo ng misis mo. Hindi ba kayo nag-usap?
"Sana nag-usap muna kayong dalawa, 'Ano bang palusot ang gagawin natin, sweetheart or darling?'
"You lied! You lied! Paano pa kami maniniwala sa mga pinagsasasabi mo?"
Read: Discayas name congressmen who allegedly took cuts from DPWH deals
HENRY ALCANTARA and catalina cabral
Cited for contempt naman si Henry Alcantara dahil nanindigan itong wala siyang alam tungkol sa ghost flood control projects sa Bulacan.
Kinuwestiyon ni Senator Rodante Marcoleta si DPWH Secretary Vince Dizon dahil tinanggap nito ang courtesy resignation ni DPWH Undersecretary Catalina Cabral.
Inaakusahan ni Marcoleta si Cabral ng pagpapadala ng text message kay Senate President Tito Sotto tungkol sa budget insertions.
Saad ni Marcoleta: “Mag-concentrate po tayo sa text niya kay Senator Sotto. Iyon po ay ginawa niya nung kami po ay ma-proclaim bilang senador.
“Sinabi nga po ng ating chairman [Lacson] sa kanyang privilege speech, ‘Usec. Cabral was lying through her teeth.’
“Nagprisinta siya, gusto niya sigurong masiyahan si Senator Sotto sa pag-aakala niya noon... Senator Sotto kasi is a contender for Senate President.
“Dapat sana po bago ninyo in-allow siya na mag-resign, e, talagang pinagtatanong…dito po kasi nakasentro ang sinasabi ko sa inyong talamak at bulok na sistema ng DPWH. Hindi po siya dapat makalampas doon.
"Sayang po, pero sa mga susunod sanang pagkakataon, kailangan nakaharap siya rito dahil iisa-isahin ko sa kanya.
"Para po makita rin ninyo bilang kayo ay bagong pinuno ng DPWH, mami-mislead po kayo sa napakaraming pagkakataon.”
Padadalhan ng subpoena si Cabral para muli itong humarap sa susunod na Senate Blue Ribbon inquiry, bilang private citizen at hindi na opisyal ng DPWH.
Read: Curlee Discaya claims politicians, 120M Filipinos want them dead
MINA JOSE AND BRICE HERNANDEZ
Imbitado rin sa naganap na pagdinig sa Senado si Mina Elamparo Jose ng WJ Construction.
Si Jose ang babaeng nakunan ng CCTV na nagsadya sa Senado noong Agosto 19, 2025.
Idinawit siya ni dating DPWH Bulacan First District Assistant Engineer Brice Hernandez sa testimonya nito sa congressional hearing sa flood control project anomalies noong Setyembre 9, 2025.
Sa naturang inquiry, binanggit ni Hernandez ang pangalan nina Senator Jinggoy Estrada at Senator Joel Villanueva na tumanggap umano kay Alcantara ng komisyon mula sa pondo ng flood control projects.
Sinabi niyang "staff member" ni Estrada ang Beng Ramos na tumanggap ng “obligasyon” [pera].
Lahad ni Hernandez: “This was the time na meron pong project na binigay si Boss Henry Alcantara kay Ms. Beng Ramos, through Ms. Mina of WJ Construction.
"So, yun yung ginamit na license or contractor.
"Nandiyan po yung pag-uusap kung kailan magde-deliver ng obligasyon dahil kailangan ni Boss Henry.”
Read: Zaldy Co, Martin Romualdez deny kickback claims by the Discayas
Pero ayon kay Jose, siya at hindi si Beng Ramos ang kapalitan ni Hernandez ng mga text message para sa isang proyekto noong Disyembre 2022 na hindi naman natuloy.
Si Ramos ay napatunayang empleyado ng Blue Ribbon Oversight Office Management (BROOM) at hindi staff member ni Estrada.
Inamin ni Jose ang pagpunta nito sa Senado noong Agosto 19, pero nagsadya raw siya sa opisina ni Senator Erwin Tulfo at hindi sa tanggapan ni Senator Estrada.
Hindi raw niya personal na kilala si Estrada.
Salaysay ni Jose, “I was invited to do an ocular of the supposed project po na dapat gagawin ko po sa office ng isa pong senator.”
Tumanggi noong una si Jose na pangalanan ang senador na tinutukoy niya dahil, aniya, “Your honor, if I may, it was already stated in the affidavit po that I have submitted and with due respect, sana po, not to name na lang po the good senator because he’s not really involved naman po in any of these.”
Pero napilitan si Jose na sabihin ang pangalan ni Senator Erwin Tulfo dahil sa suhestiyon ni Senator Lacson.
Paliwanag niya: “Meron po kasing problema yung terrace ni Senator Erwin na binabaha po siya, lalo po kapag umuulan.
"So, ako po yung na-refer na contractor nung staff niya na kung puwede tingnan namin, gawan ng solusyon, and mag-suggest po sa kanya.”
Matapos magsalita ni Jose, nagpaliwanag naman si Senator Erwin.
Saad niya: “The only time that I learned of the WJ Construction was through a staff of mine na recommended ng this group to fix my veranda on the fifth floor.
“But upon learning her name was mentioned by Engineer Brice, we immediately requested to cancel all contracts with WJ, while I specifically ordered to terminate our office refurbishment project with WJ.”
Bago nagpunta si Jose sa opisina ni Senator Erwin Tulfo, dumaan muna raw siya sa tanggapan ng BROOM para dalawin ang kanyang kaibigang si Beng Ramos na may sakit na Stage 4 cancer.
Hindi ito nagustuhan ni Senator Erwin.
Aniya: “Parang ginamit mo ang aming opisina na makapasyal sa BROOM na wala naman po sa agenda.
"Hindi rin po niya minention na may kilala siya sa Senate, diyan sa BROOM.
“So in other words, Mr. Chair, parang nagamit pa yung opisina ko para dumaan siya sa BROOM, kung anuman yung business niya doon.
“The question is, you should have told us na may kaibigan ka under investigation. My staff even asked me, if you would remember you lied. Sinabi namin, 'Baka ikaw sabit sa flood control?
“‘Wala po! Wala po kaming sabit diyan. Ang mga project ko, PHP30 million.’
“Do you remember that? You were asked, Miss Jose!”
Read: Vico Sotto warns public not to be deceived by Discayas' lies
HERNANDEZ-ESTRADA FACE-OFF
Nangyari rin sa Senate Blue Ribbon inquiry ang face-off ni Brice Hernandez at ni Senator Joseph Estrada.
Pero iba na ang pananalita ni Hernandez sa pagharap niya sa Senate Blue Ribbon Committee ngayong Setyembre 18.
Nang tanungin siya ni Marcoleta, hindi na matukoy ni Hernandez ang katauhan ng proponent na binigyan umano ng komisyon ni dating DPWH Bulacan District Engineer Henry Alcantara.
“Wala… naka-blind po ako doon kung sinong proponent po,” sagot ni Hernandez.
Reaksiyon ni Estrada: “Blind siya kung sino ang proponent. Pero nung nag-testify ka sa House, tahasang sinabi mo na ako at si Senator Joel Villanueva ang pinangalanan mo.”
Idiniin din ni Estrada na hindi nito naging empleyado ang Beng Ramos na tinutukoy ni Hernandez.
“Your honor, si Boss Henry [Alcantara] po ang nagpakilala sa akin. Si Boss Henry po ang nagsabi sa akin na staff ninyo si Beng Ramos,” giit naman ni Hernandez.
Pinanindigan din ni Jose na hindi niya kilala si Estrada at wala raw pagkakataon na nagpunta siya sa opisina ng senador.
Ang mga testimonya ni Jose at ang pabagu-bagong pahayag ni Hernandez ang dahilan para sabihin ni Marcoleta kay Estrada, “So, talagang safe ka na.”
Read: Estrada, Villanueva willing to open bank accounts for scrutiny