Ang Kapamilya actress na si Krystal Mejes, 17, at Kapuso actor na si Heath Jornales, 16, ang pinakabagong housemates sa Pinoy Big Brother (PBB) Celebrity Collab Edition 2.0.
Ito ang inanunsiyo ngayong Huwebes ng gabi, October 23, 2025, sa 24 Oras ng GMA-7.
Si Krystal ay nakilala sa pagganap niya bilang Becca sa 2015 afternoon drama series na Doble Kara; habang si Heath naman bilang Gelo sa GMA Prime series na Mga Batang Riles (2025).
Krystal Mejes says she’s ready to inspire other teens
Hindi naitago ni Krystal ang kanyang excitement nang malaman na isa siya sa mapalad na napiling papasok sa Bahay Ni Kuya.
Sa kabila ng kanyang mga pinagdaanan, naniniwala raw siya na nakaplano ang pagpasok niya sa PBB house upang magbigay inspirasyon sa mga kagaya niyang kabataan.
Aniya kay Nelson Canlas ng 24 Oras, "That was actually kind of a dilemma, honestly, because I'm a very private person and I value privacies.
"But then sabi ko kasi, you know, maybe it's one way of God nudging me to tell my story, maybe I could inspire other people."
Pagbabalik-tanaw pa ni Krystal, noong sumabak siya sa audition ay wala siyang naramdaman na anumang kaba dahil alam daw niya na ipinagpasa-Diyos niya ito.
Pahayag niya: "I just felt ready. Di ba, sinasabi nila before any audition kinakabahan ka and everything. But me, I felt excitement. I felt peace.
"If someone, something is for you, or someone is for me, I would always ask God to give me peace.
"And at that time, I felt nothing but peace and excitement. So I knew that this was for me."
Katulad sa pelikula at seryeng kanyang ginanapan, handa ba siya sa drama sa loob ng PBB house?
Nakangiting sagot ng teen actress, "Definitely ready, but I wouldn't be the one starting it or I wouldn't really be interfering with it.
"You know, whatever happens, happens. And I will just always try my best to do everything and to show up with grace."
Heath Jornales all set to take on household chores
Ibang preparasyon naman ang ginagawa ni Heath bago siya tuluyang pumasok sa Bahay Ni Kuya.
Pagbabahagi niya, pinupokus niya ngayong matuto sa mga gawiing bahay—at ang kanya raw ina ang nagtuturo sa kanya.
Kuwento ni Heath: "Ready na po sa household chores. Pinapraktis ko na nga sa bahay bago magpunta dito, e.
"My mom was teaching me how to cook adobo para doon sa loob I'm gonna try to cook adobo.
"Tapos cleaning the house.
"My mom was helping me and teaching me how to sweep properly kasi yung pag-sweep ko daw, parang pangit yung form ko, so kailangan kong matuto yung proper form."
Gaya ni Krystal, excited na rin si Heath na pumasok sa PBB house upang ipakilala at ipakita ang kanyang kakayahan at talento.
Pahayag ni Heath, "Dumating yong opportunity and I had to take it na kasi ito na yung chance para makilala ako and makita ng tao kung sino talaga ako.
"Gusto ko mapakilala sa tao yung Heath na helpful, athletic, kind, caring na action star."
Sa huli, may hirit din siyang hiling kay Big Brother na kung papayagan ay sana ay maipasok din daw niya sa loob ng bahay ang kanyang gitara.
Sabi niya, "I can't live without my guitar. Sa music po ako nare-relax, nakaka-calm, napi-peace of mind. So, I always have my guitar anywhere I go."
Sina Krystal at Heath ang ikalima at ika-anim na celebrity housemates na papasok sa Bahay Ni Kuya.
Una nang naisapubliko ang mga makakasama nilang housemates na sina Sofia Pablo, Joaquin Arce, Princess Aliyah, at Miguel Vergara.
Sa Sabado, October 25, ang pilot telecast ng PBB: Celebrity Collab Edition 2.0.
Read: