Laging grand finalist at ilang beses naging first runner-up si Arabelle dela Cruz sa ilan sa pinakamalalaking singing competitions sa bansa, pero hindi naging grand champion.
Yun pala ay pagiging grand champion sa isang international competition ang nakatakda sa kanya.
Si Arabelle, 25, ang kauna-unahang Pilipino na nanalo sa South Korean international singing competition na Veiled Cup.
Read: Arabelle dela Cruz grand champion in South Korea's Veiled Cup
Kung tutuusin, pareho sila ng naging tadhana ni Sofronio Vasquez, na itinanghal na grand champion sa The Voice Season 26 sa Amerika.
Coincidentally, sina Arabelle at Sofronio ay magka-batch at parehong grand finalists sa "Tawag Ng Tanghalan" Season 2 ng It's Showtime noong 2016.
Si Arabelle ay dalawang beses naging runner-up sa GMA-7 singing competition na The Clash, noong Season 5 (2023) at Season 7 (2025).
Tulad ni Sofronio, sa international competition naging grand champion si Arabelle.
Read: Sofronio Vasquez prioritizes career in PH after winning The Voice
ARABELLE DELA CRUZ ON CRITICISMS
Sa dami ng malalaking singing competitions sa bansa na sinalihan ni Arabelle, hindi siya pinalad maging grand champion.
Kuwento niya sa PEP.ph (Philippine Entertainment Portal), iyon ang naging pangungutya sa kanya.
“Sabi nga nung iba, nagko-comment ng, 'Sali nang sali, di naman nananalo,'” pahayag ng Sparkle artist.
Pero katuwiran ng singer, mas mainam na may ginagawa habang naghihintay kesa basta na lang maghintay nang walang ginagawa.
“For me, at least, ako, sumasali. I try mag-compete kesa yung inaantay ko lang.”
Aminado si Arabelle na may mga pagkakataong nagduda siya kung magbubunga ba ang patuloy niyang pagsali sa mga singing competition.
“Merong ganoon minsan sa isip ko. Pero sabi ko kasi, baka hindi pa iyon yung time…Kailangan ko lang maghintay.
"Pero while waiting, kailangan may ginagawa ako kaya ako, sali nang sali. I am trying my luck…”
Hindi naman daw siya apektado sa pangungutya ng iba kung hindi siya naging grand winner.
Mas natsa-challenge daw siya kapag mayroong hindi magandang sinasabi tungkol sa kanya.
Paliwanag niya: “I like reading negative comments kasi, siyempre pag binasa mo yon, pag masyado nang mabigat yung sinasabi sa iyo, masasaktan ka.
"Pero sa akin, kilala ko naman yung sarili ko.
“Every time I read negative comments, ‘So, ganito nila ako nakikita. So, dapat yung susunod nilang makikita sa akin mas magaling ako.’
“Kung ganito tingin nila, ganito ako kumanta, hindi nila nagustuhan. Sige, next time gagawin ko.
“Mas natsa-challenge ako na, ‘Ah, ganoon yung tingin niyo sa akin. Sige, gagawan ko yan ng paraan.'”
SECOND THOUGHTS IN JOINING VEILED CUP
Matapos ang The Clash 2025, sumali si Arabelle sa singing competition sa All-Out Sundays, ang "Veiled Musicians Philippines."
Kasama sina Garrett Bolden at Thea Astley, silang tatlo ang naging kinatawan ng Pilipinas sa Veiled Cup sa South Korea.
Kuwento pa ni Arabelle sa PEP, nagdalawang-isip siya noon kung sasali pa siya.
Bukod kasi sa hindi niya makakasama ang pamilya, ito rin ang unang beses niya sa ibang bansa.
“Kasi when I joined this competition, my thoughts were... I thought the competition will be local lang din, na magkakaroon lang ng Korean people here.
"That time, hindi ako nakinig nung bini-brief kami about dito.
“Tapos yun pala, nung napili, ‘Kayo ang magre-represent ng Philippines!’”
Ikinagulat daw iyon ng singer at naramdaman ang pressure dahil sila ang magiging kinatawan ng Pilipinas.
Naisip din daw ni Arabelle na mas mabibigat ang kalaban dahil international stage ang Veiled Cup.
Tumuloy pa rin si Arabelle pero hindi naging mataas ang kanyang expectations, lalo pa't kakatanghal lang niya noon bilang first runner-up sa The Clash.
Sa mga sumunod na kumpetisyon, natanggal si Thea, gayundin si Garrett.
Si Arabelle ang natirang kinatawan ng Pilipinas at siya ring hinirang na grand champion.
Read: Ten Years, One Night: DAY6 lights up Manila at The Decade concert
DIFFICULT LIFE ABROAD
Naibahagi rin ni Arabelle na hindi naging madali ang laban niya sa South Korea.
Bukod sa iniisip ang kumpetisyon, na-homesick daw siya.
Unang biyahe raw niya iyon abroad at nasanay na laging kasama ang pamilya sa lahat ng sinasalihang kumpetisyon.
Sa loob daw ng halos dalawang buwan, naging cycle ang ginagawa niya: gigising, matutulog, magpa-practice.
Lalo raw siyang nangulila sa Pilipinas.
Pinapayagan naman daw silang makapamasyal. Pero sadyang naging matagal daw ang pananatili niya sa Korea.
Sabi ni Arabelle, “Kasi if you are a tourist, one to two weeks okay na yon. A month, parang paulit-ulit na yung nakikita ko.”
Marami raw siyang na-miss sa Pilipinas.
“Especially the food. Sabi ko nami-miss ko na yung gulay, nami-miss ko na yung isda sa amin.
“Iba pa rin yung lutong bahay. Iba talaga. Yun ang nakaka-miss,” nangingiti niyang kuwento.
Pero nagbunga ang lahat ng paghihirap na tiniis ni Arabelle dahil siya ang nagwagi sa kumpetisyon.
Sa ngayon, may nakaplanong world tour para sa Veiled Cup contestants.
Bukod dito, regular na raw mapapanood si Arabelle sa All-Out Sundays, at may iba pa siyang singing commitments.
Read: Likha Music International shows artists how to earn beyond gigs and streams