Muling pinatunayan ng TV host-comedian na si Vice Ganda ang kanyang katapatan at pagmamahal sa ABS-CBN matapos niyang pumirma ulit ng bagong kontrata sa kanyang home network.
Nitong Biyernes, August 7, 2026, naganap ang contract signing ni Vice, kasama ang ABS-CBN executives na sina ABS-CBN Chairman Mark Lopez, President and CEO Carlo Katigbak, Chief Operating Officer Cory Vidanes, at Chief Financial Officer Ricardo B. Tan Jr.
Sa panayam ni Vice sa TV Patrol, inihayag niya ang labis na kagalakan.
Aniya, may kontrata man o wala, nananatili siyang tapat sa ABS-CBN at habambuhay siyang magiging Kapamilya.
Nakangiting pahayag ni Vice: "Pumirma na ulit ako ng kontrata sa ABS-CBN, ang aking pagpapatuloy ng pagiging Kapamilya.
"I am very, very happy.
"Actually, kahit wala namang contract, habang-buhay akong Kapamilya.
"Isang malaking honor and privilege na matawag na Kapamilya."
Read: How is It's Showtime faring in the ratings game without Vice?
Hindi rin nakaligtaang magpasalamat ni Vice sa kanyang mga bosses sa ABS-CBN dahil sa patuloy na pagtitiwala ng mga ito sa kanya.
Saad niya: "Siyempre, we always professionalize the partnership kaya maraming-maraming salamat po sa lahat ng aking mga bosses.
"Sa lahat ng pagmamahal na patuloy kong natatanggap mula sa mga Kapamilya."
VICE GANDA TEASES UPCOMING PROJECTS WITH GMA-7
Kasunod nito, nangako si Vice na patuloy niyang gagawin ang lahat ng kanyang makakaya upang makapaghatid ng saya at de-kalidad na mga proyekto sa mga manonood.
"Patuloy akong gagawa ng proyekto sa mga Kapamilya under ABS-CBN.
"Sila na ang pinakamalaking supplier ng pinakamalaking content sa iba’t ibang platforms.
"Masaya ako na isa pa rin ako sa pinipili nila na magdala at gumawa ng contents nila na maipapalabas sa iba’t ibang platforms."
Read: Vice Ganda apologizes over criticized It’s Showtime jokes
Sundot na tanong sa kanya, "So, marami pang aabangan sa iyo?"
Mabilis na sagot ng It's Showtime host, "Yes, next month mayroon silang nakalinyang project sa akin sa GMA-7 at marami pang susunod."
Diin pa niya: "Sa lahat naman ng projects ko, kung saang platform man ako makita, hindi puwedeng hindi ko kasama ang ABS.
"Sa lahat ng project na gagawin ko sa ibang platforms ay kasama ko ang ABS."
NETIZENS REACT TO VICE GANDA’S UPCOMING GMA-7 PROJECT
Bagamat walang detalye na ibinigay si Vice tungkol sa proyektong gagawin sa GMA-7, marami sa kanyang mga tagahanga ang excited.
Read: Vic Sotto-Vice Ganda movie among first 4 MMFF 2026 entries
Sabi ng isang netizen sa X: "I hope GGV ito. Kasi kung ito nga, mas masaya ito kasi mas malawak ang sakop ng magiging guest niya."
Hiling pa ng isa, "Sana GGV!!!"
Ang tinutukoy nilang GGV ay ang Gandang Gabi Vice, ang dating late-night talk show ni Vice sa Kapamilya Network na umere mula 2011 hanggang 2020.