Napaluha si Ai-Ai delas Alas nang mabasa niya ang interbyu ng Philippine Entertainment Portal (PEP.ph) kay Mygz Molino, ang YouTuber na nag-aalaga, sumusubaybay, at nagmamalasakit kay Mahal.
Napaiyak si Ai-Ai dahil magkasama sila ni Mahal sa lock-in taping ng Owe My Love ng GMA-7. Nasaksihan nila ng kanyang mga kasamahan sa programa ang taos-puso at unconditional love ni Mygz para sa maliit na comedienne.
“Naiyak ako kasi kilala ko si Mygz. Napaka-genuine ng concern niya kay Mahal.
”Halimbawa, nakabukaka si Mahal, si Mygz ang nag-aayos ng damit niya para hindi makita ang kanyang panty.
”Si Mygz din ang kumakarga sa kanya kapag umaakyat sa third floor. Basta, ibang klase ang pagmamahal niya, nakakatuwa,” kuwento ni Ai-Ai.
Si Ai-Ai ang naging instrumento ng Cabinet Files para makumbinsi si Mygz na magpainterbyu sa PEP.ph tungkol sa kakaibang klase ng pagkakaibigan nila ni Mahal.
Kuwento ni Ai-Ai, “Bilib ako kay Mygz. Sobrang humahanga ako sa kanya. Hinahainan din niya ng pagkain si Mahal.
"Nung naglaro kami ng guess the word para sa vlog ni Kiray, nag-split si Mahal. Napabukaka siya, to the rescue agad si Mygz."
Patuloy niya, "Makikita mo sa kilos at sa mga mata ni Mygz na genuine siyang tao, pati ang love niya kay Mahal.
"Kung anuman ang meron sila, platonic man, pero pure love ‘yon.
"Blessed na blessed si Mahal. Gift ni Lord si Mygz sa kanya."
Hindi naniniwala si Ai-Ai na may motibo o pansariling interes si Mygz kaya pinakikisamahan nito si Mahal.
Hindi lamang si Ai-Ai ang humahanga sa pag-aasikaso ni Mygz kay Mahal dahil pareho ang opinyon nila ni Kiray.
Saksi si Kiray sa pag-alalay ni Mygz kay Mahal sa bawat kilos nito at sa pag-aayos ng mga gamit ng kanyang kapwa comedienne.
Kahapon, February 26, natanggap ni Mygz ang malungkot na balitang namatay ang kanyang kapatid na lalake kaya umuwi siya sa Tanauan, Batangas.
Ayaw ni Mahal na magpaiwan sa set ng Owe My Love kaya sumama siya kay Mygz sa Tanauan.
Sa pakikipag-usap kay Mygz ng Cabinet Files nitong Sabado nang hapon, tiniyak niyang babalik si Mahal sa lock-in taping ng Owe My Love kaya muli silang sasailalim sa COVID 19- swab test.