Ilang araw nang hindi napapanood si Vice Ganda at ang kanyang boyfriend na si Ion Perez sa live telecast ng It’s Showtime.
Ito ay dahil pinaghandaan ng magkarelasyon ang kanilang biyahe sa Amerika.
Mahigit sa dalawang taon na hindi nakalabas ng bansa sina Vice at Ion dahil sa coronavirus pandemic kaya excited sila nang dumating sa U.S. ngayong Huwebes ng tanghali, October 7 (Miyerkules ng gabi, October 6, Los Angeles time).
Ayon sa U.S.-based Filipino entertainment journalist na si Oliver Carnay, napaaga ang biyahe nina Vice at Ion sa Los Angeles dahil sa October 11 pa dapat ang lipad nila para sa kanilang concert sa October 15 at October 16.
Kabilang si Oliver sa mga sumalubong sa grupo ni Vice sa Tom Bradley International Airport na nakakapanibago dahil kakaunti lamang ang mga pasaherong dumating
Kasama si Angeline Quinto at ang mga comedian na sina Lassy Marquez at MC Muah sa entourage nina Vice at Ion dahil special guests sila sa Vax Ganda: A Dose of Laughter.
Kasabay ng pagdating ni Vice sa Los Angeles ang shipment mula sa China ng giant props na ipinagawa para gamitin sa kanyang two-night show sa Pechanga Resort Casino sa Temecula, California.
Sinabi ni Oliver na sold-out na ang mga ticket para sa concert ni Vice dahil talagang nasabik ang mga taong makapanood ng live show na makapagpapasaya sa kanila sa gitna ng pandemya.
Ang Starmedia Entertainment ni Ana Puno ang producer ng Vax Ganda at ng mga susunod na concert ni Vice sa 2022.
“Madaling naubos ang tickets ng Vax Ganda kaya plano ni Ana na mag-produce uli ng show ni Vice sa Los Angeles for 2022.
“Magkakaroon din sila ng mga show sa East Coast at sa ibang U.S. states,” dagdag na impormasyon mula kay Oliver tungkol sa magiging activities ni Vice sa susunod na taon.
Matagal pang mapapanood si Vice sa It’s Showtime dahil sa kanyang U.S. show at sa mandatory hotel quarantine na kanilang gagawin sa pagbabalik nila sa Pilipinas ng mga kasama niya.