Nakabalik na si Miss World Philippines 2021 Tracy Maureen Perez sa San Juan, Puerto Rico para sa finale pageant ng 70th Miss World.
Magaganap ito sa Jose Miguel Agrelot Coliseum sa March 16, 2022, at live na mapapanood sa Pilipinas sa Huwebes ng umaga, March 17, sa UPSTREAM.ph.
Siyamnapu’t pito (97) mula sa iba’t ibang bansa ang kalahok sa 70th Miss World, na hindi natuloy ang grand coronation noong December 16, 2021 dahil sa mga kandidata at production staff na nagkaroon ng COVID-19.
Ipinagpaliban ng Miss World Organization ang pageant finale sa March 16, pero apatnapu’t apat (44) na kandidata na lamang, kabilang si Tracy, sa mga mapapalad na pinabalik sa Puerto Rico.
Nakatulong kay Tracy ang pagkakaudlot ng koronasyon ng 70th Miss World noong December 2021 dahil nakapaghanda siyang mabuti sa sasalihang international beauty pageant.
Kung papalarin, masusundan niya ang yapak ni Megan Young, ang kauna-unahang Pilipina na itinanghal na Miss World.
Kasama si Tracy sa Top 30 candidates ng 70th Miss World dahil kabilang siya sa mga nanalo sa second round ng Head-to-Head Challenge at kasama sa Top 5 finalists para sa Beauty with A Purpose Challenge.
Mag-uumpisa sa ganap na alas-otso ng umaga sa March 17 ang live online at commercial-free streaming ng 70th Miss World sa UPSTREAM.ph, kaya iniimbitahan ang lahat na panoorin at suportahan si Tracy sa pangarap nitong makuha ang pangalawang korona ng Miss World para sa Pilipinas.