Sold-out ang dalawang gabing shows ni Vice Ganda, ang Vice-Cinated, sa Pechanga Resort Casino sa Temecula, California noong July 2 at July 3, 2022.
Ayon ito sa U.S.-based entertainment writer na si Oliver Carnay.
Pinag-uusapan ang "kissing photos" ni Vice at ng kanyang partner na si Ion Perez dahil isyu pa rin ito sa ibang mga Pilipino na hindi matanggap ang same-sex relationship ng dalawa kaya patuloy ang kanilang paghuhusga.
Hindi kusa ang lip service ni Ion nang tawagin ito ni Vice para umakyat siya sa stage dahil ang audience ang nagbuyong halikan niya ang kanyang karelasyon.
Tumanggi si Vice pero pinagbigyan ni Ion ang pangungulit at pangangantiyaw ng mga taong halikan niya ang Unkabogable Star.
Dalawang beses na nangyari ang "kissing scene" nina Vice at Ion — noong Sabado at Linggo ng gabi.
Walang partisipasyon si Ion sa Vice-Cinated pero tinawag siya ni Vice sa stage para batiin niya ang manonood.
Bentang-benta sa audience ang pagsasalita ni Ion sa lengguwahe ng mga Kakampangan at ang kuwento niya tungkol sa mga kaibigang langgam na kanyang madalas na ginagawa sa It’s Showtime.
Special guests ni Vice sa Vice-Cinated sina Darren Espanto, Lassy Marquez, at MC Calaquian.