Isang malaking sorpresa na trending sa lahat ng mga social media platform ang cast reveal ng The Rain in España ngayong Huwebes ng gabi, November 3, 2022.
Ang The Rain in España ay ang series adaptation ng Wattpad University series na isinulat ni Gwy Saludes, may 550 million combined reads, at popular na popular sa millennials.
Ang Viva Films ang producer at si Theodore Boborol ang direktor ng The Rain in España.
Ang mga napiling magbida rito ay sina Heaven Peralejo at Marco Gallo.
Gumawa ng sobrang ingay sa social media ang cast reveal dahil hindi makapaniwala ang fans ng Wattpad University series na sina Heaven at Marco ang gaganap sa mga karakter ni Luna, ang architecture student sa University of Sto. Tomas, at ni Kalix, ang law student na nag-aaral sa Ateneo de Manila University.
July 2022 nang makumpirma ang balitang magkakaroon ng series ang Wattpad novel ni Gwy kaya inabangan ng fans nito ang mga artistang magbibida.
Alam nina Heaven at Marco na marami ang tutol dahil sila ang napiling lead actors ng The Rain in España.
Pero imbes na panghinaan ng loob, isang hamon sa kanila ang mga negative comment na nababasa para lalo nilang pagbutihin ang pag-arte.
Nagsimula ang mga showbiz career nina Heaven at Marco nang sumali sila sa Pinoy Big Brother: Lucky 7 noong 2016.
Makalipas ang anim na taon, muling nagkita at nagkasama ang dalawa sa The Rain in España.
Ilan sa mga co-star nina Heaven at Marco ay sina Bea Binene, Gab Lagman, Aubrey Caraan, Andre Yllana, at Francis Magundayao.
Ang The Rain in España ang unang proyekto ni Bea sa Viva mula nang pumirma siya ng exclusive contract sa Viva Artists Agency noong September 23, 2022.
Hindi inaasahang magiging maingay ang cast reveal ng The Rain in España na naganap nitong Huwebes ng gabi sa isang events place sa Quezon City, pero pabor ito kay Bea dahil pinag-uusapan nang husto sa social media ang kanilang serye.