Isang mainit na pagsalubong ang naghihintay sa veteran TV host na si Boy Abunda sa pagpirma niya ng kontrata sa GMA Network ngayong Huwebes ng hapon, December 15, 2022.
Ang GMA-7 ang unang nagtiwala sa kakayahan ni Boy bilang television host sa pamamagitan ng talk show na Show & Tell noong 1994 at ng showbiz-oriented program na Startalk noong October 1995.
Pero noong 1999 ay lumipat siya sa ABS-CBN kaya sa "pag-uwi" niya sa Kapuso Network, akmang-akma ang pagbati sa kanya ng “Maligayang Pagbabalik sa Tahanan.”
Matagal na ang mga haka-hakang magbabalik si Boy sa kanyang orihinal na home studio, ilang buwan matapos hindi bigyan ng panibagong prangkisa ang ABS-CBN.
Pero walang kumpirmasyon.
Hanggang maglabas ang GMA-7 ng teaser noong December 7, 2023: “Handa na BA ang lahat para sa HOMECOMING ng isang SHOWBIZ Icon? Abangan ang kanyang pagbabalik sa GMA coming soon!”
Read: Kapuso artist, lilipat sa NET25; showbiz icon, babalik sa GMA
Sigurado nang mangyayari ito dahil sa nakatakdang pagpirma ng kontrata ni Boy sa Kapuso network ngayong Huwebes ng hapon.
Pagkatapos ng contract signing, haharap si Boy sa mga miyembro ng media sa isang lugar sa Pasig City.
Iinaasahang sasagutin niya sa idaraos na press conference ang lahat ng mga katanungan tungkol sa kanyang desisyong umuwi sa dating tahanan makalipas ang dalawampu’t tatlong (23) taon.