Ang Star for All Seasons na si Vilma Santos ang special guest ni Boy Abunda sa Fast Talk with Boy Abunda ngayong Martes ng hapon, February 14, 2023.
Ito ang kauna-unahang live guesting ni Vilma sa GMA-7 makalipas ang matagal na panahon.
Hindi matatawaran ang loyalty ni Vilma sa ABS-CBN dahil dito nagsimula ang kanyang showbiz career, pero tumatanaw rin siya ng malaking utang na loob sa GMA-7.
Read: Mag-inang Vilma Santos at Luis Manzano, nananatiling loyal sa ABS-CBN kahit walang prangkisa
Ang pagkakaalam ng lahat, unang lumabas si Vilma sa telebisyon sa D’Sensations, ang youth-oriented program ng ABS-CBN noong 1971. Pero lumitaw sa mga pagsasaliksik na kasama siya sa cast ng Larawan ng Pag-ibig, ang soap opera na napanood sa ABS-CBN Channel 3 noong February 1964.
Kahit matapat siya sa ABS-CBN, itinuturing din ni Vilma na tahanan ang GMA-7 dahil ito ang naging home network niya mula August 1986 hanggang September 1995.
Si Vilma ang host ng musical-variety show na Vilma! na napapanood tuwing Biyernes ng gabi. Napilitan siyang iwanan ang programa dahil sa maselang pagbubuntis niya kay Ryan Christian, ang bunsong anak nila ni House Representative Ralph Recto na isinilang noong March 29, 1996.
Tiyak na marami ang mga alaalang magbabalik kay Vilma sa muling pagtuntong niya ngayon sa bakuran ng Kapuso Network na makasaysayan dahil mangyayari ito sa mismong Araw ng mga Puso.
Ipagdiriwang ni Vilma ang 60th anniversary ng kanyang entertainment career ngayong 2023 sa pamamagitan ng isang TV special na mapapanood sa Kapamilya Channel sa February 18, ang Anim na Dekada, Nag-iisang Vilma.
Read: Vilma Santos marks 60th showbiz anniversary with ABS-CBN show
Kasabay ng pagdiriwang ng 60th showbiz anniversary ni Vilma ang paglitaw ng mga billboard na may nakasulat na "NASAN SI Vi?" kahapon, Lunes, February 13.
May mga haka-hakang may kinalaman sa anniversary show ni Vilma ang mga nakakaintrigang billboard, pero may mga dudang tungkol ito sa isang bagong endorsement ng Star for All Seasons.
May mga kumukuwestiyon din sa spelling o pagbaybay sa salita na "NASAN" dahil kulang umano ito ng titik A.
Kung magiging mapanuri ang mga mata ng mga nagsasabing mali ang spelling, mapapansin nila ang maliit na letrang "A" na parang nalaglag mula sa salitang "NASAN" kaya nagtagumpay ang naglabas ng intriguing billboard na makuha ang atensiyon ng publiko at ng mga eksperto sa wikang Pilipino.
