Ang kapwa sexy star na si Stella Suarez Jr. ang isa sa mga matalik na kaibigan ng yumaong aktres na si Jaclyn Jose noong nagsisimula pa lamang ang kanilang acting career.
Read: Multi-awarded actress Jaclyn Jose dies at 60
Kung ang Chikas ang unang pelikula ni Jaclyn, Mahilig naman ang title ng launching movie ni Stella noong 1984.
Pinky Suarez ang tunay na pangalan ni Stella at half-sister siya ng aktor ding si Richard Gomez.
Read: Stella Strada: '80s sexy star na nagbigti sa kabila ng kanyang kasikatan
Kasama ang make-up artist na si Bernadette Dueñas, nangupahan ng kuwarto sina Jaclyn at Pinky sa isang bahay sa kanto ng Aurora Boulevard at Gilmore Avenue, Quezon City.
Tanaw mula sa nirerentahang kuwarto nina Jaclyn at Pinky ang tahanan ni Maria Kalaw-Katigbak, ang MTRCB chair mula 1981 hanggang 1985.
Noong panahong iyon, mga sexy star ang imahe nina Jaclyn at Pinky at naghihigpit ang MTRCB sa mga sexy movie. Kaya "a stone’s throw away" ang biruan tungkol sa napakalapit na paninirahan nila sa tahanan ni Katigbak.
“Nang magpakamatay si Pepsi Paloma noong 1985, pinuntahan at sinundo kami ni Tita Chato [Charito Solis] sa inuupahan naming bahay para puntahan namin si Pepsi sa morgue,” lahad ni Bernadette sa Cabinet Files.
Malapit sa nirerentahang kuwarto nina Jaclyn at Pinky ang King Kong, ang disco house sa kanto ng Doña M. Hemady Street at Aurora Boulevard, Quezon City.
Malaki ang kinalaman ng King Kong sa love story ng Star for All Seasons na si Vilma Santos at current Finance Secretary Ralph Recto dahil sa naturang disco house sila unang nagkita at nagkakilala.
Read: Vilma Santos details how she keeps romance alive in her marriage
“Malapit lang sa kuwarto na inuupahan namin ang King Kong. Magkasama kami ni Pinky na pumupunta sa disco, nilalakad lang namin, kahit buntis na siya noon [sa anak nila ni Al Tantay].
“Si Jaclyn, hindi sumasama sa amin. Mas gusto lang niya sa bahay. Nagluluto siya ng picadillo,” pagbabalik-tanaw ni Bernadette tungkol sa magandang samahan nila nina Jaclyn at Pinky noong mga struggling actress pa ang dalawa.
Stella Suarez Jr. and Al Tantay
Kahit matagal nang hindi aktibo sa pag-aartista si Pinky, may komunikasyon pa rin sila ni Jaclyn dahil sa chat group na kanilang binuo.
Sa kanyang social media post ngayong Lunes, Marso 4, isang mensahe tungkol sa pagkawala ni Jaclyn ang ibinahagi ni Pinky:
“Happy memories with you Jane will remain forever in our hearts. May the perpetual light shine upon your soul. You may rest in peace.”
JACLYN'S FIRST MOVIE
Nag-umpisa ang acting career si Jaclyn Jose nang ilunsad siya bilang isa sa limang babaeng bida sa pelikulang Chikas ng Baby Pascual Films.
Ang iba pa ay sina Lovely Rivero, Tanya Gomez, Rachel Avila (Rachel Ann Wolfe), at Karla Kalua.
Ang Chikas, na ipinalabas noong 1984, ang kauna-unahang pelikulang ginawa ni Jaclyn, hindi ang Private Show (1984) tulad ng maling akala ng karamihan.
Mary Jane Guck ang tunay na pangalan ni Jaclyn.
Ang producer na si Baby Pascual ang nagbigay sa kanya ng screen name na "Jacklyn Jose."
Kinalaunan, inalis ang letrang K sa Jaclyn para mas maging feminine ang tunog ng screen name ni Jaclyn, ayon sa kanyang dating manager na si Ed Instrella.
Read: Jaclyn Jose, naranasang sindakin ng sikat na sexy stars noon
Nang makausap ng Cabinet Files si Ed ngayong Lunes, Marso 4, 2024, sinabi niyang siya ang manager ni Jaclyn sa loob ng mahigit sa dalawang dekada.