Kahit buwag na ang reel at real-life loveteam nina Daniel Padilla at Kathryn Bernardo, ikinagulat at ikinagalak ng mga tagahanga ng 29-year-old actor ang paglabas ng black-and-white teaser ng Incognito ngayong Biyernes, Agosto 23, 2024.
Ang Incognito ang upcoming action-drama series ng Star Creatives na mapapanood sa Kapamilya Channel, TV5, at A2Z.
Read: Daniel Padilla, suportado pa rin ng solid fans
Dalawang taon nang hindi napapanood sa telebisyon si Daniel.
Ang huli niyang proyekto na 2 Good 2 Be True, na pinagtambalan nila ni Kathryn, ay ipinalabas mula Mayo 16, 2022 hanggang Nobyembre 11, 2022.
Matagal nang nagwakas ang 2 Good 2 Be True kaya mainit ang pagtanggap ng mga tagahanga ni Daniel sa 52-second teaser ng Incognito.
"AND" DANIEL PADILLA
Binigyan ng importansiya si Daniel sa teaser ng kanyang bagong TV series dahil siya ang huling ipinakilala at may "and" ang pangalan niya.
Kasama ni Daniel sa Incognito sina Richard Gutierrez, Ian Veneracion, Baron Geisler, Kaila Estrada, at ang loveteam nina Maris Racal at Anthony Jennings.
Ang producer ng Incognito ay ang Star Creatives TV, na may likha rin sa mga teleseryeng Iron Heart at Can’t Buy Me Love.
Bago pa inilunsad ng Star Creatives TV ang teaser ng Incognito, nauna nang lumabas ang balitang kasama sa cast si Barbie Imperial, pero wala ito sa teaser dahil ang mga pangunahing tauhan lamang ang ipinakita.
Ang Incognito ang unang TV project ni Daniel matapos nilang kumpirmahin ni Kathryn sa publiko noong Nobyembre 2023 ang kanilang paghihiwalay.