GORGY RULA
Umalis ang ilang artists na kabilang sa isang group chat na tinatawag nilang "Grupo COVIDyante" dahil sa talakan uli nina Janno Gibbs at Kitkat.
Nagsimula ito nang mag-post si Gene Padilla tungkol sa isang komedyante na nagpapatulong daw sa kanyang makaraket.
Sinagot ni Gene na magtatanong siya, pero hindi niya alam kung bakit nagalit at pinagmumura raw siya ng komedyante.
Hindi binanggit ni Gene kung sino itong komedyante, pero masama ang loob niya dahil gusto na nga raw niyang tulungan ay pinagmumura pa siya.
Nag-comment sa thread na iyon si Kitkat.
Sabi ni Kitkat: "May iba nga bigla na lang nagmumura sa kapwa ng PI, e… isipin na lang natin meron silang pinagdadaanan. Kawawa din.
"Kasi yun nga kahit sino walang karapatan! May mga matatanda talagang walang pinagkatandaan."
Nag-react si Jeff Tam at sinabing ang lakas daw ng tama ng di pinangalanang komedyante, na may topak ang taong iyon.
Pumasok sa thread si Janno Gibbs.
Diretsahang sabi niya patungkol kay Kitkat: "Pero mas may topak parin si Kitkat jan!!"
Hindi iyon pinalagpas ni Kitkat.
Sa pagkakataong ito, naungkat ang alitan nina Kitkat at Janno na nagresulta sa pagkatanggal nila pareho sa NET25 noontime show na Happy Time.
Balik-sagot ni Kitkat kay Janno: "Sino ang nagmumura ng PI mo at pumapatol sa babae? Talaga lang?
"Alam ng lahat ang topak mo! Wag ako! @Janno isa kang BASTOS na matanda!"
Humaba na ang patutsadahan ng dalawa.
Tila nagpa-survey pa raw sa thread si Janno sa ibang kagrupo nila kung sino sa kanilang dalawa ni Kitkat ang nagsasabi ng totoo.
Sa interview ni Ogie Diaz kay Kitkat, sinabi ng komedyana na hindi na niya pinagsasagot ang iba pang sinasabi ni Janno laban sa kanya, dahil humahaba na ang usapan at nag-aalisan na ang iba sa GC.
"Gusto ko mang sagutin kaya lang kawawa naman ang iba. Ayoko nang madamay. Ang dami na nga pong nag-'left,' e. Nag-leave na si Paolo Contis, si Mitoy Yonting.
"Si Kuya Jeffrey Tam, niyaya na rin akong mag-leave. Sabi ko, 'Sige, tingnan ko lang.' Gusto ko pa makita kung ano pa ang talak niya, e," pahayag ni Kitkat.
Tinext ko si Paolo tungkol sa pag-leave niya sa GC pagkatapos magtalakan nina Janno at Kitkat.
"Ang toxic na," sagot sa akin ni Paolo.
Ang tagal na nga naman ng away na ito nina Janno at Kitkat. Natanggal na ang Happy Time, tuloy pa rin ang away nila.
Ikinairita ito ng ilang artists at gusto na ring umalis sa kanilang group chat.
JERRY OLEA
Pebrero 18, 2021 pa naganap ang isyung murahan nina Kitkat at Janno Gibbs sa defunct noontime show ng TV5 na Happy Time.
Nagtamo ng mga karangalan si Kitkat bilang host ng nasabing programa, kahit tinanggal sila pareho ni Janno sa Happy Time matapos ang kanilang patutsadahan.
Tuluy-tuloy naman ang movie career ni Janno sa Viva Films.
Hindi naman siguro gusto lang paingayin ni Janno ang bagong movie niyang Mang Jose kaya nagparunggit siyang muli kay Kitkat.
In the first place, hindi naman si Janno ang tinutukoy ni Gene Padilla na komedyanteng nagmura sa kanya.
Mukhang aabot ng Pasko, Bagong Taon, Three Kings, Chinese New Year, Valentine’s Day, at first anniversary ang hidwaan nina Janno at Kitkat.
Kahit siguro masawata ang coronavirus sa buong mundo, magpapatuloy ang panggigigil nila sa isa’t isa!
NOEL FERRER
Pasko na, may ganito pa rin talaga?
Hindi ba masasaya ang mga tao at nakatanim pala nang ganun kalalim ang samaan ng loob?
Nakakalungkot ang balitang ito!