GORGY RULA
Sinabi ni Mon Confiado sa PEP Troika nanghinayang sila ni Ian Veneracion na hindi kay Heaven Peralejo napunta ang Best Actress trophy sa katatapos lang na Metro Manila Film Festival (MMFF) 2022 Gabi ng Parangal.
Si Mon ang nagwaging Best Supporting Actor at si Ian naman ang Best Actor para sa pelikulang Nanahimik ang Gabi.
Deserved naman ni Nadine Lustre ang Best Actress para sa pagganap nito sa Deleter, pero mas okay raw sana kung silang tatlo ang nakakuha ng acting awards para lalong makatulong sa promo ng pelikula.
“To be honest, medyo may panghihinayang talaga,” pakli ni Mon.
Pagkatapos daw niyang manalo, at si Ian naman ang sumunod na nanalong Best Actor, mas na-pressure daw si Heaven kung makukuha niya ang Best Actress trophy.
“Grabe ang hawakan namin ni Heaven kagabi, kasi na-pressure siya. Nanalo ng best supporting, nanalo rin si Ian, ang next na ia-announce. Ano ba ang mangyayari?” dagdag ni Mon nang nakapanayam namin sa DZRH nung Miyerkules, December 28.
“Napakaganda sana kung tatlo kami, napakagandang vehicle nun para i-promote namin ang aming pelikula. Pero ganun talaga, e.
"Sabi nga namin sa kanya, 'Tatlumpung taon na ako sa industriyang ito, maraming beses na akong natalo.
"'Ang mga jury naman, e, kanya-kanyang taste yan. Maaring hindi ka sumapat dun sa kanilang panlasa. Pero hindi nangangahulugan na hindi ka mahusay sa pelikulang ito.
"'Nakita naman natin ang mga reviews, ang mga papuri sa iyo, isa kang revelation.'
“Sabi nga namin ni Ian, bata pa naman si Heaven. Napakadami pang pagdadaanan at kumbaga, e, marami pang awards na naghihintay sa kanya.
“Imagine, tatlumpung taon na ako sa pelikula. Si Ian Veneracion, 40 years na.
"Sabi nga namin, kahit kaming mga beterano, nakita naman ang acting ni Heaven na hindi talaga siya nagpahuli, at marami talagang pumuri dun. Hindi yun matatapatan ng kahit anong award.
“Ang totoong award ay yung feedback ng mga taong nakapanood. Kasi yung award, taste lang yan ng jury, e. Ilan lang sila sa jury,” sabi pa ni Mon.
NOEL FERRER
Nabuo raw ang maganda nilang samahan sa lock-in shooting ng Nanahimik ang Gabi, pero lalong naging solid nang nagpu-promote sila.
Hanggang ngayon ay tuluy-tuloy pa rin ang promo nila para lalong gumanda ang performance ng pelikula nila sa takilya. Magkakasama silang nagti-theater tour, at nae-enjoy nila ito.
Lahad ni Mon, “Tatlo lang naman kasi kaming main actors sa pelikula, at iba din kasi yung sistema at pakikisama na ibinibigay ng Rein Entertainment.
“Nag-domino effect pati sa actors. Good vibes lahat, pati ang aming director na si Direk Shugo Praico, ang napakabait ng aming producer Direk Lino Cayetano, Direk Philip King, Ms. Cham Guzman.”
Sabi ko nga, kung may award para sa pinaka-consistent at pinag-isipan at thorough na marketing, PR, at publicity ng MMFF entry, hands down, iba at katangi-tangi ang ginawa ng team ng Nanahimik ang Gabi.
JERRY OLEA
Nang tinanggap ni Mon ang Best Supporting Actor trophy, nakaw-eksena si Ian nang lumapit kay Mon at niyakap at nahalikan niya ito.
Sabi ni Mon, “Grabe yung bonding naming tatlo… kami nina Heaven at ni Ian. Kaya napayakap siya at nahalikan niya ako nang di oras.
“Nung nalaman niyang nanalo ako, that time nasa backstage siya at biglang lumabas.
"Nakakatuwa naman na naramdaman ko ang pagkatuwa nila. Grabe nga ang hiyawan ng sa upuan namin. Akala mo, kami na ang nanalong Best Picture, e!”
Iyon na, Aling Mameng! Love and Joy!