JERRY OLEA
Lumampas na sa PHP50 million ang gross sales ng pelikulang Five Breakups And A Romance (FBAAR) nina Alden Richards at Julia Montes.
Ibinalita iyon ni Alden sa Facebook, Instagram at X (dating Twitter) nitong Oktubre 31, 2023, Martes ng gabi.
“Hindi po ito possible kung hindi dahil sa inyong suporta. Maraming maraming salamat po,” post ni Alden, kalakip ang artcard niyon.
Ang sipag-sipag ni Alden sa pagpo-promote ng 5BAAR.
Sa Dear Heart concert noong Oktubre 27, Biyernes, ay sandali lang si Alden dahil may block screening pa ng 5BAAR na pupuntahan niya.
Nanood ng ShaGab concert that night si Julia kasama ang giliw niyang si Coco Martin.
Read: Coco Martin, Julia Montes, other stars spotted at Sharon Cuneta and Gabby Concepcion's concert
Sina Sharon Cuneta at Alden ang mga bida bilang mag-ina sa MMFF 2023 entry na Family of Two (A Mother and Son Story).
Mula nang mag-showing sa local cinemas ang 5BAAR noong Oktubre 18, wala pang ibang Pinoy movie na ipinalabas.
Kasabay ng 5BAAR sa October 18 playdate ang Killers of the Flower Moon, Deep Fear, Target, at Love Reset.
Noong Oktubre 25 nag-umpisa ang Sine Sindak 4 sa SM Cinemas. Tampok dito ang siyam na foreign films na katatakutan.
Pinagkaabalahan ng mga tao ang BSKE, bakasyon at Halloween parties.
Ngayong Nobyembre 1, Miyerkules, Todos Los Santos, ang opening day sa local cinemas ng Five Nights at Freddys, The Piper, at The Tunnel to Summer, the Exit of Goodbyes.
Ang Five Nights at Freddys ay rumatsada sa North America last weekend. Ang opening weekend gross nito ay $80M.
Iyong Dune: Part Two na napabalitang today ang local showing ay inilipat sa March 2024 playdate.
Nakatakdang ipalabas sa Nobyembre 8 iyong The Marvels na hindi kalakasan ang pre-sales ng tiket; 1521: The Quest for Love and Freedom na hindi ipino-promote ng bidang babae na si Bea Alonzo; at City Hunter the Movie: Angel Dust.
Kasado sa November 15 ang Trolls Band Together, The Concierge, at The Hunger Games: The Ballad of Songbirds & Snakes.
Para sa Nobyembre 22, andiyan ang Wish, Thanksgiving, at Tokyo MER: Mobile Emergency Room The Movie.
At sa Nobyembre 29, two local movies ang magso-showing, ang In His Mother’s Eyes at Shake, Rattle & Roll Extreme na parehong naligwak sa 49th MMFF.
Kasabay ng mga ito ang showing ng Asian Persuasion nina Dante Basco at KC Concepcion, at ang bagong obra ni Hayao Miyazaki na The Boy and the Heron.
Nasa December 6 playdate ang Wonka ni Timothee Chalamet, at magpapasiklab sa December 20 ang Aquaman and The Lost Kingdom.
Para sa updates, bisitahin sa tuwi-tuwina ang Facebook pages ng Cinema Exhibitors Association of the Philippines (CEAP) at SM Cinema, ganoon din ang website ng Click The City.
Paalala ng MTRCB sa Facebook ngayong Miyerkules ng umaga, “While Halloween specials are a trend this time of the month, let’s not lose sight of the essence of All Saints’ Day (November 1) and All Souls’ Day (November 2).
“These commemorations hold a special place in our Filipino tradition, a time where we venerate all the holy men and women who have been canonized by the Catholic Church and on the Commemoration of All the Faithful Departed, we remember and pray for those who’ve gone before us.
“Use MTRCB ratings to guide you on your entertainment choices and create lasting family memories that are in harmony with the spirit of remembrance and togetherness.”
NOEL FERRER
Congratulations talaga sa mga kumikitang Pinoy films.
Ang tanong, aabot kaya sa P100M ang kikitain ng Five Breakups and A Romance? Iyan ang aabangan natin!!!
Plus, ano kaya ang kahihinatnan ng Shake, Rattle & Roll Extreme at In His Mother’s Eyes sa takilya pati na ang Asian Persuasion na ipapalabas at the end of this new month?
Sana, November will be kind talaga sa ating local movie industry.
GORGY RULA
In fairness sa mga producer ng Five Breakups And A Romance, hindi padded ang inilalabas nilang press release.
Tugma sa nakukuha naming figures sa aming reliable source nung inilabas nila ang more than PHP30M na kinita ng naturang pelikula sa loob ng isang linggong showing nito.
Sabi ng aming source, posibleng umabot ng PHP50M sa pangalawang linggo nito, at tama naman.
Ang maganda sa pelikulang ito, pataas nang pataas ang daily gross nung unang linggo, kasi maganda naman talaga ang pelikula. Kaya lang, duda pa ako kung naibalik na ang puhunan nila sa mahigit P50M na kinita nito.
Puwedeng mabawi nila kapag nagkasarahan na sa TV rights, streaming, at iba pang platforms na puwedeng ibenta ang pelikula. Kaya okay na rin.
Tiyak na tuloy pa rin sa pagpu-produce ang Cornerstone, Myriad, at GMA Films.
Sabi ni Direk Irene Villamor, kapag umabot ng PHP100M ang Five Breakups And A Romance ay magpa-part two sila. Kaya ewan kung magkaka-sequel pa ito. Pero malay natin!
Abangan na lang natin ang susunod na ipu-promote ni Alden, ang Family of Two na entry nila ni Sharon Cuneta sa nalalapit na Metro Manila Film Festival 2023.