JERRY OLEA
Confidently handsome si Mark Joseph “MJ” Macalintal na magwawagi siya sa Man Hot Star International 2024 na gaganapin sa Bangkok, Thailand, sa Disyembre 6, 2024.
“Kasi, I can be a good role model now sa society,” pagmamatwid ni MJ sa send-off mediacon nitong Nobyembre 27, Miyerkules, sa Pandan Asian Cafe, Sct. Limbaga St., Quezon City.
“And mas dedicated ako lalo kapag may mga taong sumusuporta din. And bukod dun, yung pagiging Man Hot Star ko, hindi ko lang naman siya gagamitin na para sumikat.
“Kumbaga, magagamit ko rin ito para ituloy ko ang advocacy ko. Kasi, gustung-gusto ko po talaga ituloy yung quality education.
“Kasi, ayun yung nakikita ko po na kakulangan po na kailangan pa nating mas pagtuunan ng pansin.”
Read: Kirk Bondad breaks silence after failed Mr. World 2024 bid
Si MJ ang nagkamit ng titulong Mr. Grand Philippines-Heritage sa coronation night ng Mr. Grand Philippines 2024 noong Nobyembre 13 sa Metrotent Convention Center sa Meralco Avenue, Pasig City.
Bilang SK Chairperson sa Caloocan City, noon pa isinusulong ni MJ ang quality education.
“Nakikita ko po na yung edukasyon po sa atin ay mas kailangan pa po nating tutukan,” sabi ni MJ.
“Kasi ngayon po sa social media, mas pinu-promote po yung diskarte kumpara sa pag-aaral. Para sa akin po kasi, mas OK po yung edukasyon.”
MJ MACALINTAL TO FOLLOW HIS FATHER'S FOOTSTEPS
Hindi maiiwasang pagkumparahin si MJ at ang tatay niyang character actor na si Dennis Coronel.
May nagsasabing mas pogi si MJ kesa sa ama, at meron ding nananalig na mas guwapo si Dennis.
Read: Mr. Grand PH 2024 candidate, gusto ring mag-artista gaya ng ama
Napangiting saad ni MJ, “OK lang, sa kanya po ako nagmana. Marami rin pong nagsasabi na kamukha ko po siya.
“And ayun, siya rin ang mas pogi! Ha! Ha! Ha! Ha! So, OK lang po sa akin yun.”
Hurado sa Mr. Grand Philippines 2024 ang Regal heiress na si Miss Roselle Monteverde, at ang BenTria executive producer na Engr. Benjamin Austria.
May ilalaan na project para kay MJ ang Regal at ang BenTria. Magpo-focus ba siya sa pag-aartista?
“Yes po, after this pageant.”
Ano ang advice ng father niya? Naisip ba niyang dapat malagpasan niya ang kasikatan ni Dennis?
Natawa si MJ, “Ha! Ha! Ha! Ha! Ang lagi po niyang ina-advice sa akin, yung health ko po, mas pahalagahan ko po.
“Dahil yung project, nandidiyan lang iyan, pero yung kalusugan, puwedeng mawala.
“Kaya lagi po niyang sinasabi sa akin, ‘Huwag kang magmadali. Bata ka pa, and i-priority mo ang sarili mo.’ Ayun po.”
Ngayong Huwebes, Nobyembre 28, ang flight ni MJ pa-Bangkok para lumaban sa Man Hot Star International 2024.
Ano ang pinakamahalagang baon niya?
“Siguro po yung rosary. Kasi, dun sa Mr. Grand at dun sa school namin nung nag-compete po ako, may rosary na po ako nun.
“Yun din po ang dadalhin ko sa Bangkok,” pagsisiwalat ni MJ.
Read: Marvin Diamante, second runner-up sa 16th Mister International
NOEL FERRER
First national pageant na nilahukan ni MJ Macalintal ang Mr. Grand Philippines 2024.
First international pageant siyempre niya itong Man Hot Star International 2024.
“Marami pong nagsasabi na fit naman po ako sa pageant, and nakita ko rin naman na magpi-fit ako sa Mr. Grand,” lahad ni MJ, na graduate ng Culinary Technology.
“And also gusto ko rin pong pasukin ang showbiz. Nakikita ko po na yung Mr. Grand, para po yun sa akin.”
Malaking tulong ba sa plano niyang pag-aartista ang kanyang ama?
“Si Papa naman, madami siyang kaibigan na ipinakilala niya sa akin before,” tugon ni MJ.
“Yung mga taong yun, pakiramdam ko po ay matutulungan din ako.”
MJ MACALINTAL'S EDGE
Ano ang edge niya sa ibang mga kalahok sa Man Hot Star International 2024?
“I think iyong leadership ko po and yung advocacy ko. Kasi, yung advocacy ko, hindi lang naman siya sinasabi,” tugon ni MJ.
“Kasi may nasimulan naman po ako. Kasi yung pagiging SK chairperson ko po, nakatulong yun kung saan nakakagawa po ako ng project for education.”
Sa paglahok sa Man Hot Star International 2024, ano ang pinaghandaan niya nang lubos?
“I think yung communication skills, e. Kasi a lot of them are saying na yung communication ko, di pa ganun ka-level up, no,” pahayag ni MJ.
“And nakikita ko din naman na kailangan ko pang pag-focus-an at pagpraktisan din. Dun ako mas nag-focus and at the same time, work out.”
Read: Miss Grand Myanmar national director, naungkat ang nakaraan
GORGY RULA
Wala akong idea kung ano itong Man Hot Star International na gaganapin sa Bangkok, Thailand.
Nang napabalita ang pagre-resign ng kandidato nating nanalo last year na si RJ de Vera, doon ko lang nalamang may ganito palang pa-contest.
Read: RJ de Vera secures back-to-back victory for the Philippines at Man Hot Star International 2023
Tipong pang-artista raw ang hinahanap ng titulong ito, at bagay naman diyan si MJ.
Tinanong ko siya, hindi kaya makakaapekto sa pagsali niya itong isyu ni RJ?
Sabi ni MJ, “Wala naman po siguro dahil magkaiba naman po yung sa past and now. So I think, we should focus na sa present po.”
MR. GRAND PHILIPPINES 2024 WINNERS
Siyangapala, ang Mr. Grand Philippines 2024 ay si Jonathan “Than” Perez ng lalawigan ng Bulacan. Siya iyong sinasabing kahawig nina Alden Richards at Ronnie Liang.
Ang Mr. Grand Philippines - Tourism 2024 ay si Dale Danielle Fisher na kumatawan sa Filipino community ng Australia.
Ang Mr. Grand Philippines - Fitness 2024 ay si Aljay “Al” Dado ng Zambales.
Ang Mr. Grand Philippines - Culture ay si Jayden Fernandez aka Jonas Harina ng San Antonio, Quezon.
Ang first runner-up ay si Jake Lawrence Coronado ng Rizal, Laguna, at ang second runner-up ay si Sandy “Zandro” Go Sales ng Mandaluyong City.
Humabol si Zandro sa send-off mediacon ni MJ.
Ini-announce doon ng president ng Mr. Grand Philippines na si Sir Rex Belarmino na ang title ni Zandro ay Mr. Grand Philippines - Icon 2024.
Kabilang pa sa napagkalooban ng titles ay sina Aaron Jo “Ron” Reyes (Filipino community ng KSA) na Mr. Grand Philippines Ambassador-Influence 2024, Christian Geca (San Pedro, Laguna) na Mr. Grand Philippines Ambassador-Diversity 2024, at Kim Cenia (Cebu) na Mr. Grand Philippines Ambassador-Excellence.
Si Joe Marzon “Joem” Dunuan (Cordillera Region) ang Mr. Grand Philippines Ambassador-Innovation. Si John Denmark Tomelden (Quezon City) ang Mr. Grand Philippines Ambassador-Leadership. At si Tranx Risch (Taguig City) ang Mr. Grand Philippines Ambassador-Charity.
Read: Mr. Grand Philippines 2024 candidate may pasilip habang rumarampa