Masaya si Beauty Gonzalez na isang tagumpay ang Stolen Life, ang GMA-7 serye na pinagbibidahan niya kasama sina Gabby Concepcion at Carla Abellana.
“Thankful,” umpisang sinabi ni Beauty sa panayam ng PEP.ph (Philippine Entertainment Portal) kamakailan.
“Kasi it’s a very soap opera, di ba? Double role and then nasakyan ng mga tao so yehey," sabay-palakpak ng aktres.
“Good job, Beauty,” sabay-tapik sa kanyang kaliwang balikat.
“Good job, Carla,” sabay-tapik naman sa kanyang kanang balikat, “Good job, Gabby!”
Kuwento pa ni Beauty, dapat sana ay may extension ang Stolen Life.
“Pero paano? Carla’s doing a new soap, Gabby’s also doing a new soap.”
Kasalukuyang nagte-taping si Carla para sa Widows’ War with Bea Alonzo.
Read: Bea Alonzo moved to tears over V-day surprise from her staff; PA reacts to Bea's bashers
Si Gabby naman ay malapit na ring mapanood sa My Guardian Alien katambal si Marian Rivera.
“But you know, we’ll never know, nayayanig yung schedules everyday, e, so baka there’s an extension.”
Read: Marian Rivera slams spread of fake quotes attributed to her: "Nakakarami na po kayo. tama na!"
Game naman daw si Beauty kung sakali na ituloy ang kanyang karakter n si Farrah sa Stolen Life.
“I love Farrah, psycho Farrah is fun,” at tumawa si Beauty.
BEAUTY ON ROLE AS POLICEWOMAN
Nasa ikalawang season na ang Walang Matigas Na Pulis Sa Matinik Na Misis, na pinagbibidahan nina Beauty at Senator Ramon "Bong" Revilla Jr.
Sa Season 2 ay binaligtad na ang kuwento—kung noon ay si Senator Bong ang pulis na si Tolome, ngayon ay ang karakter naman ni Beauty na si Gloria ang pulis.
Pabor si Beauty sa pagbabagong ito sa kuwento.
“Oh yeah, gustung-gusto ko,” sabi ni Beauty.
Never daw niya naging pangarap na maging isang policewoman, kahit noong bata pa siya. At hindi rin daw niya inakalang darating ang araw na gaganap siya bilang isang pulis sa isang TV series.
Dagdag pa ni Beauty, “At hindi ko ma-imagine na magkaroon ako ng action/comedy. Akala ko comedy lang, but now nadagdagan ng action.
“Well siyempre iba naman yung action na ma-try ko naman na makipagbakbakan, magpapaputok, magpasabog.
“Pero ang hirap din pala,” at tumawa si Beauty.
Popular ang pagsigaw ni Gloria ng “Tolomeee!” kapag nagseselos ito o hinahanap ang kanyang mister.
“Baka dito siya naman ang sisigaw ng ‘Gloriaaa,’” pagbibiro pa ni Beauty.
THANKFUL TO GMA-7 FOR DIVERSE PROJECTS
Samantala, malaki ang pasasalamat ni Beauty sa GMA-7 para sa mga proyektong ipinagkaloob sa kanya.
Aniya, "Sobrang thankful ako sa GMA. I’m really, really thankful for them kasi ang daming mga proyekto na iba-iba na binibigay nila sa akin.
“From drama to comedy, action, suspense/thriller with Dingdong before. Sobrang bongga!”
Nagkasama sina Beauty at Dingdong Dantes sa GMA show na I Can See You: AlterNate noong 2022.
Halos hindi pa nagpapahinga si Beauty mula nang lumipat siya sa GMA noong 2021.
“May pinapatayo akong bahay, e, so keep it coming please,” at tumawa si Beauty.
Sa punto ngayon ng kanyang karera bilang Kapuso, ano ang saloobin niya, na inaalagaan at pinahahalagahan siyang mabuti ng GMA-7?
“I’m very happy and thankful for them kasi despite of just… I don’t have a contract with GMA, I’m [hired] per project, they still give me these beautiful projects, and, thank you.
“It really proves to me na you don’t have to be a contract star. Just keep doing what you’re doing and show them that you have the skills for it and you’ll be okay.”
Ito rin daw ang maipapayo ni Beauty sa mga young stars sa kasalukuyan.
“Just be yourself and give your best. Blessings will come to you!”
Paano kung papirmahin na siya ng GMA ng kontrata?
“Well, go! Bakit pa ba ako aarte? If the offer is amazing at bilang nagpapagawa ako ng bahay at ako ay alipin sa salapi,” at humalakhak si Beauty, “Yeah, yeah."
“Magiging happy yung manager ko,” sabay-turo ni Beauty kay Katrina Aguila, ang kanyang manager na kasama niya sa mediacon ng Walang Matigas Na Pulis Sa Matinik Na Misis noong January 26, 2024, sa Seda Vertis North Hotel sa Quezon City.
Bukod kina Beauty at Senator Bong ay kasama sa Walang Matigas Na Pulis Sa Matinik Na Misis Season 2 sina Carmi Martin as Lucing, Jestoni Alarcon as Police Colonel Gener Alberto, Ejay Falcon as Police Captain Ace Catacutan, Liezel Lopez as Jacqueline “Jacq” Dela Torre, Niño Muhlach as Sergeant Sylvester Salonga, Dennis Padilla as Police Major Vincent Policarpio, Maey Bautista as Kapitana Candida, Raphael Landicho as Kiko, Nikki Co as Dustin, Jeffrey Tam as Onofre “Bunso” Batumbakal, at Angel Leighton as Master Sergeant Pretty Competente.
Special guest stars naman sa serye sina Max Collins as Elize, Herlene Budol as Mia, Kelvin Miranda as Gary, Dion Ignacio as Blake, Lianne Valentin as Atty. Loretta Montecillo, Mika Salamanca as Megan Espinosa, at Sanya Lopez as Mildred Darlene Yabut.
Kasama rin sa serye sina Ramon Christopher Gutierrez as Redentor Pigsart, ER Ejercito as Juancho “Kamao” Dehado, Roi Vinzon as Vito Poblete, Jay Manalo as Pancho Blanco, ,Antonio Aquitania as Rafael “Paeng” Advincula, Brent Valdez as Alfred, MJ Ordillano as Harry, at Michael De Mesa as Luther Abueva.
Umeere ang programa tuwing Linggo, 7:15 p.m., sa direksiyon nina Enzo Williams at Rechie del Carmen.