Humihingi ng dasal ang Kapamilya actress na si Liza Soberano para sa ABS-CBN Corporation at sa lahat ng empleyado nito.
Ito ay matapos matanggap ng 22-year-old Filipino-American actress ang tinatawag niyang isa sa “most heart breaking text messages” mula sa isang ehekutibo ng network.
Tweet ni Liza ngayong Biyernes, July 3 (published as is):
“I received what was probably one of the most heart breaking text messages from one of our leaders in ABS-CBN.
“The little fan girl in me is probably crying so hard right now.”
Hindi ibinunyag ni Liza kung ano ang nilalaman ng text message, at kung sinong ABS-CBN executive ang nagparating nito sa kanya.
Pero pinaniniwalaang may kinalaman ito sa pagsuspinde ng network sa kontrata ng lahat ng Kapamilya talents.
Dahil dito, maaari nang lumipat ng kumpanya o tumanggap ng trabaho sa ibang network ang Kapamilya stars.
Posibleng ito nga ang natanggap na text message ni Liza kung pagbabasehan ang halatang emosyonal na tweets niya para sa kanyang home network.
Aminado ang young actress na bata pa lang ay Kapamilya fan na siya.
Nakalakihan na raw niya ang panonood sa ABS-CBN at pagsubaybay sa mga teleserye nito.
“I grew up watching the kapamilya channel and almost all of their teleseryes.”
FOREVER GRATEFUL TO KAPAMILYA NETWORK
Bagamat hindi sinasagot ang mga nagtatanong sa comments section kung tungkol saan ang text message, mistulang pamamaalam na sa Kapamilya network ang mga sumunod na tweets ni Liza.
Habambuhay raw siyang magpapasalamat sa ABS-CBN sa naging impluwensiya nito sa kanya bilang tao.
Nagpasalamat din si Liza na binigyan siya ng network ng pagkakataong magsilbing inspirasyon sa kanyang mga tagasuporta.
“I will forever be grateful towards this company, who has instilled values in me through their programs and gave me the opportunity to inspire those who watch and support my projects,” tweet ni Liza.
PRAYERS FOR ABS-CBN AND ITS EMPLOYEES
Kasunod nito, umapela ng dasal ang young actress mula sa kanyang 3.9 million Twitter followers.
Sa harap ng posibilidad na tuluyang ipasara ang ABS-CBN, hiling ni Liza sa mga tagasuporta niya at ng network na ipanalangin ang kumpanya at ang libu-libong empleyado nito.
Panawagan ni Liza: “To all of my loving supporters, if it’s not too much to ask, and if ABS-CBN has ever positively impacted you in one way or another, I humbly ask that you please pray for the company and all of its employees.”
FRANCHISE RENEWAL WOES
Magdadalawang buwan na ang nakalipas nang ipinahinto ng National Telecommunications Commission (NTC) ang operasyon ng ABS-CBN broadcasting unit.
Ito ay matapos mag-expire ang prangkisa ng network noong May 5.
Nitong June 30, iniutos din ng NTC ang tigil-operasyon ng ABS-CBN TV Plus at SKY Direct direct-to-home transmission ng SKY Cable.
Patuloy ngayong dinidinig sa Kamara ang pagbibigay ng panibagong 25-taong legislative franchise sa ABS-CBN.
LIZA APPEALS TO SOLONS
May pakiusap din si Liza sa mga kongresistang magpapasya kung aaprubahan ang prangkisa para sa Kapamilya network.
“To the congressmen and women who are tasked to decide upon our franchise renewal, please, open up your hearts and hear our voices.”
Sa Lunes, July 6, nakatakda ang huling pagdinig ng Kamara sa franchise renewal issue.
Pagkatapos ay magbobotohan na ang 46 kongresistang kasapi ng House Committee on Legislative Franchises kung bibigyan ng panibagong 25-taong prangkisa ang ABS-CBN.
Anuman ang maging kahihinatnan ng masalimuot na franchise renewal battle, nanindigan si Liza na mananatiling naglilingkod sa Pilipino ang kanyang home network.
“ABS-CBN has always and will always be in service of the filipino people. #kapamilyaforever #IbalikAngABSCBN,” saad sa tweet ni Liza.
KAPAMILYA FOR NINE YEARS
Taong 2011 nang ipakilala ng ABS-CBN si Liza sa Wansapanataym.
Pero taong 2014 siya sumikat nang magbida sa primetime series na Forevermore, katambal si Enrique Gil.
Matapos nito ay nagsunud-sunod na ang teleserye at pelikula ng tambalan nina Liza at Enrique, na tinaguriang LizQuen.
Ang teleseryeng Make It With You ang huling project ni Liza sa ABS-CBN, katambal ang reel-and-real life partner niyang si Enrique.
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika