Negatibo sa COVID-19 ang resulta ng swab test kay Miss Eco International 2020 first runner-up Kelley Day.
Si Kelley ang representative ng Pilipinas sa international pageant na ginanap sa Egypt noong April 5.
Kasunod ng kanyang muntikang pagkapanalo sa Miss Eco International, kumalat naman ang balitang marami raw mga kandidata ang nagka-COVID-19.
Isa raw sa kanila si Kelley.
Sa Instagram account ng Miss Eco International noong gabi ng April 14, masaya nilang ibinalita na negatibo ang kandidata ng Pilipinas sa COVID-19.
Ngunit kailangan daw muna nitong mamalagi sa Egypt dahil sa quarantine protocols ng Pilipinas.
Nakalagay sa post ng Miss Eco International (published as is): “Miss Eco Philippines Tested negative yesterday While she will stay In egypt till she go back Home Due the lockdown Of the Philippines @msworldphil”
Ipinakita rin nila ang mismong resulta ng test ni Kelley kung saan mababasa rito na “Negative” ang resulta ng kanyang RT-PCR test.
Nauna nang siniguro ng Miss World Philippines na masusi nilang sinusubaybayan ang kalagayan ni Kelley habang nasa Egypt.
Sinisiguro rin nila ang kaligtasan nito laban sa COVID-19.
Pero ang bansang Japan ay kinondena ang anila’y kapabayaan ng Miss Eco International upang mapangalagaan ang kalusugan at kaligtasan ng mga kandidatang lumahok sa recently concluded pageant.
Dahil dito, hindi na sila magpapadala ng representative sa Miss Eco International.